ຖ້າເວົ້າເຖິງເຟສບຸກແລ້ວ ຄືຊິບໍ່ມີໃຜແລ້ວເນາະທີ່ບໍ່ຮູ້ຈັກ ແລະຜູ້ຂຽນເຂົ້າໃຈວ່າທຸກຄົນທີ່ກຳລັງອ່ານບົດນີ້ຢູ່ ລ້ວນແຕ່ເປັນຜູ້ມີບັນຊີເຟສບຸກເປັນຂອງໂຕເອງ ຫຼືສາມາດເວົ້າໄດ້ວ່າ ເກືອບ 100% ຂອງຜູ້ໃຊ້ອິນເຕີເນັດຂອງລາວ ທີ່ມີຢູ່ປະມານ 2 ລ້ານກວ່າຄົນ ແມ່ນມີເຟສບຸກ.
ທ່ານຜູ້ອ່ານຄົງຈະຄິດຄືກັນກັບຜູ້ຂຽນວ່າ ຈຳນວນຜູ້ໃຊ້ເຟສບຸກລາວທຸກມື້ນີ້ສ່ວນຫຼາຍ ແມ່ນໃຊ້ແບບບໍ່ມີຈຸດປະສົງ ຄືເປັນພຽງເຄື່ອງມືຂ້າເວລາ (ບາງເທື່ອກໍໃຊ້ໃຫ້ເສຍເງິນ+ເສຍເວລາ) ໄປຊື່ໆ ໃນຂະນະທີ່ມີຜູ້ຄົນຈຳນວນໜ້ອຍໜຶ່ງທີ່ໃຊ້ເຟສບຸກ ພັດຖືເອົາເຟສບຸກເປັນຊ່ອງທາງທຳມາຫາກິນຢ່າງເປັນວຽກເປັນງານ ແລະບາງຄົນກໍກາຍເປັນຄົນດັງ ເປັນແບບຢ່າງທີ່ດີງາມໃຫ້ແກ່ສັງຄົມກໍມີຫຼາຍ ຄືດັ່ງ ນາງ ນຸດ ແກ້ວພະວົງ ນັກສຶກສາວິທະຍາໄລການເງິນ ດົງຄຳຊ້າງ ກໍແມ່ນຜູ້ໜຶ່ງທີ່ໃຊ້ເຟສບຸກເປັນຊ່ອງທາງຫາລາຍໄດ້ ເພື່ອໃຊ້ຈ່າຍໃນການຊື້ອາຫານ ຄ່າເຊົ່າຫ້ອງ ແລະຄ່າໃຊ້ຈ່າຍໃນການຮຽນ.
ນ້ອງນຸດເລົ່າວ່າ ຕົນເອງຮຽນຈົບ ມັດທະຍົມຢູ່ເມືອງປາກກະດິງ ແຂວງບໍລິຄຳໄຊ ພາຍຫຼັງຮຽນຈົບກໍໄດ້ຂຶ້ນມາສຶກສາຕໍ່ຊັ້ນສູງ ຢູ່ທີ່ວິທະຍາໄລການເງິນດົງຄຳຊ້າງ ນະຄອນຫຼວງວຽງຈັນ ໃນປີ 2014 ເນື່ອງຈາກສະພາບເສດຖະກິດຂອງຄອບຄົວພໍ່ແມ່ບໍ່ຄ່ອຍດີ ພໍເຂົ້າຮຽນໄດ້ໄລຍະໜຶ່ງຕົນເອງກໍໄດ້ສະໝັກເປັນພະນັກງານໂຄສະນາສິນຄ້າ ໃຫ້ບໍລິສັດເຄື່ອງດື່ມໃຫຍ່ແຫ່ງໜຶ່ງ (PG: Promotion Girl) ເຊິ່ງມີລົດຕູ້ຈາກບໍລິສັດມາຮັບຈາກຫໍພັກໄປບ່ອນເຮັດວຽກ ພໍແລ້ວວຽກເພິ່ນກໍມາຮັບຈາກບ່ອນເຮັດວຽກ ມາສົ່ງຫໍພັກ ເຊິ່ງກໍສະດວກສະບາຍແລະປອດໄພດີ ແຕ່ການເຮັດວຽກນັ້ນເປັນວຽກກາງຄືນ ເຮັດໄດ້ບໍ່ດົນຕົນເອງຈຶ່ງຫາຊ່ອງທາງຫາເງິນອື່ນແທນ ກໍຄືຮັບເອົາສີ້ນຝ້າຍ ສີ້ນໄໝ ຈາກທາງບ້ານມາຈ່າວຂາຍໃຫ້ໝູ່ຄູ່ທີ່ຮຽນຫຼືຢູ່ຫໍພັກດຽວກັນ, ລວມທັງໄດ້ປະກາດຂາຍທາງເຟສບຸກໄປນຳ ເຊິ່ງກໍມີຜູ້ສົນໃຈສັ່ງຊື້ ເຮັດໃຫ້ມີລາຍຮັບສາມາດຈ່າຍຄ່າຫ້ອງ, ຄ່າຮຽນ ແລະຄ່າອາຫານ ສາມາດແບ່ງເບົາພາລະທາງຄອບຄົວໄປໄດ້.
ທ້າຍປີ 2016 ພາຍຫຼັງທີ່ຕົນເອງຮຽນຈົບຊັ້ນສູງ ກໍໄດ້ໄປສະໝັກເຮັດວຽກເປັນພະນັກງານບັນຊີ ໃຫ້ບໍລິສັດມະຫາຊົນແຫ່ງໜຶ່ງ ຈົນຮອດກາງປີ 2017 ຈຶ່ງໄດ້ລາອອກມາສຶກສາຕໍ່ປະລິນຍາຕີ ຢູ່ວິທະຍາໄລການເງິນດົງຄຳຊ້າງອີກເທື່ອໜຶ່ງ.
ເນື່ອງຈາກເຄີຍຂາຍເຄື່ອງທາງເຟສບຸກມາແລ້ວ, ມາປີນີ້ຕົນເອງຈຶ່ງໄດ້ສ້າງເຟສບຸກແຟນເພຈສຳລັບຂາຍສີ້ນຂຶ້ນມາໂດຍສະເພາະ ຄື ເພຈ ສີ້ນໄໝຫຼາບສົດ ອາພອນລາວ ແລະໄດ້ນຳເອົາສີ້ນໄໝຈາກຮ້ານຂອງເອື້ອຍຢູ່ຕ່າງແຂວງມາປະກາດຂາຍ ເຊິ່ງກໍໄດ້ຮັບຄວາມນິຍົມຊົມຊອບຈາກສັງຄົມເປັນຢ່າງດີ ແລະມີລາຍໄດ້ທີ່ສາມາດລ້ຽງໂຕເອງໃນການດຳລົງຊີວິດໄດ້ ໂດຍບໍ່ໄດ້ເດືອດຮ້ອນຮອດຄອບຄົວ.
ລາວໂພສ: ການຂາຍເຄື່ອງທາງເຟສບຸກ ມີປະສັກຫຍັງບໍ?.
ນ້ອງນຸດ: “ນ້ອງຄິດວ່າທຸກຢ່າງມີອຸປະສັກໝົດ ປະສົບການຂອງເຮົາຈະເປັນສິ່ງພາເຮົາຂ້າມຜ່ານ“. ອຸປະສັກທີ່ເກີດຂຶ້ນໃນການຂາຍເຄື່ອງອອນລາຍ ໂດຍສະເພາະຂາຍສີ້ນແມ່ນຈະມີແຕ່ບາງເທື່ອລູກຄ້າສັ່ງແລ້ວບໍ່ເອົາ, ສົ່ງເຄື່ອງແລ້ວບໍ່ໂອນເງິນໃຫ້ ແລະເຮົາຕ້ອງຮູ້ເສັ້ນທາງດີ ເວລາລູກຄ້າສັ່ງເຄື່ອງກໍຈະສາມາດໄປສົ່ງໄດ້ຖືກແລະໄວ. ແລະອີກເລື່ອງໜຶ່ງ ເປັນເລື່ອງຂອງສັງຄົມ ບາງເທື່ອເຮົາເປັນຍິງສາວ ຖ້າທຽວອອກໄປນອກເລື້ອຍໆ(ໄປສົ່ງເຄື່ອງ) ກໍອາດຈະຖືກຄົນອື່ນທີ່ເຂົາບໍ່ຮູ້ວ່າເຮົາໄປເຮັດຫຍັງ ຢູ່ໃສ? ເຂົ້າໃຈຜິດກໍໄດ້ ແຕ່ຖ້າເຮົາຮູ້ວ່າເຮົາກຳລັງເຮັດຫຍັງແລ້ວກໍຈະບໍ່ມີບັນຫາ.
ລາວໂພສ: ຮຽນໄປນຳ ຂາຍເຄື່ອງໄປພ້ອມ ຈະບໍ່ສົ່ງຜົນກະທົບຕໍ່ການຮຽນບໍ?
ນ້ອງນຸດ: ເຮົາຕ້ອງແບ່ງເວລາໃຫ້ເປັນ ຕ້ອງບອກລູກຄ້າວ່າເຮົາສາມາດໄປສົ່ງເຄື່ອງໃນເວລາໃດ? ຖ້າເວລາໃດເຮົາຮຽນກໍຕ້ອງໄປຮຽນກ່ອນ. ເຊິ່ງສ່ວນຫຼາຍລູກຄ້າກໍຈະສອບຖາມມາທາງຂໍ້ຄວາມ ເມື່ອເລີກຮຽນຫຼືວ່າງຈາກການຮຽນ ເຮົາຈຶ່ງຕອບກໍໄດ້. ໃນກໍລະນີນ້ອງເອງ ແມ່ນຮຽນພາກຄໍ່າ ແຕ່ 17:00-20:30 ນ້ອງກໍຂາຍເຄື່ອງໄດ້ເກືອບໝົດມື້.
ລາວໂພສ: ລາຍໄດ້ເດເປັນແນວໃດ ເດືອນໜຶ່ງໄດ້ຫຼາຍປານໃດ?
ນ້ອງນຸດ: ລາຍໄດ້ບໍ່ສະໝໍ່າສະເໝີ ບາງເດືອນກໍໄດ້ຫຼາຍ ບາງເດືອນກໍໄດ້ໜ້ອຍ ແຕ່ກໍຢາກບອກວ່າມັນເປັນເລື່ອງປົກກະຕິ ເຖິງບໍ່ໄດ້ຂາຍກໍບໍ່ໄດ້ໝາຍຄວາມວ່າເຮົາເຈັ້ງ ເພາະເຮົາລົງທຶນໜ້ອຍ ຫຼືເກືອບວ່າບໍ່ໄດ້ລົງທຶນເລີຍ ເໝາະສົມສຳລັບຜູ້ບໍ່ມີເງິນຫຼາຍຄືນັກຮຽນ-ນັກສຶກສາ.
ລາວໂພສ: ນ້ອງມີຄຳແນະນຳແນວໃດ ສຳລັບໃຜທີ່ຢາກຂາຍເຄື່ອງອອນລາຍ?
ນ້ອງນຸດ: ທຸກຄົນສາມາດເຮັດໄດ້ ແຕ່ກໍບໍ່ແມ່ນທຸກຄົນຈະສຳເລັດ. ສິນຄ້າມີຫຼາຍຢ່າງ ບາງຄົນເໝາະກັບການຂາຍເຄື່ອງສຳອາງ, ບາງຄົນເໝາະກັບການຂາຍອາຫານເສີມ, ບາງຄົນເໝາະກັບການຂາຍເຄື່ອງປະດັບ ຫຼື ບາງຄົນເໝາະກັບເສື້ອຜ້າ ແລະອື່ນໆ ເຮົາຕ້ອງລອງເຮັດໄປເລື້ອຍໆ ອັນໃດຂາຍບໍ່ໄດ້ກໍເຊົາ ແລ້ວເອົາແນວໃໝ່ມາຂາຍ ທີ່ສຳຄັນແມ່ນຕ້ອງເປັນຄົນຊື່ສັດຕໍ່ລູກຄ້າ, ສິນຄ້າຕ້ອງມີຄຸນນະພາບ ແລະລາຄາທີ່ເຮົາຢູ່ໄດ້ແລະລູກຄ້າກໍຊື້ໄດ້. ແລະທີ່ສຳຄັນອີກອັນໜຶ່ງຕ້ອງລົງມືເຮັດໄປເລື້ອຍໆ ຖອດຖອນບົດຮຽນໄປນຳ ເພາະມັນຈະມີເຄັດລັບແລະວິທີການທີ່ບໍ່ສາມາດບອກກັນໄດ້ນຳ.
“ໝູ່ເພື່ອນທ່ານໃດຕ້ອງການສີ້ນໄໝຫຼາບທີ່ງາມ ແຕ່ລາຄາເປັນກັນເອງ ຢ່າລືມເຂົ້າເບິ່ງເພຈ ສີ້ນໄໝຫຼາບສົດ ອາພອນລາວ ໄດ້ເດີ ຫຼື ຄລິກລີ້ງນີ້: https://www.facebook.com/Aphonlaosilk/?ref=br_rs”
ນັ້ນຄືບົດຮຽນອັນລໍ້າຄ່າຈາກນ້ອງນຸດ ຜູ້ຖືເອົາເຟສບຸກເປັນຊ່ອງທາງທຳມາຫາກິນ ເຊິ່ງສາມາດມີລາຍຮັບມາໃຊ້ຈ່າຍເຂົ້າໃນການສຶກສາໄດ້ ໂດຍໄດ້ແບ່ງເບົາພາລະຂອງຄອບຄົວທາງບ້ານໄປໄດ້ເປັນຢ່າງດີ. ຈຶ່ງຢາກນຳສະເໜີເພື່ອເປັນແບບຢ່າງແລະກຳລັງໃຈໃຫ້ຜູ້ທີ່ກຳລັງຕົກງານ ຫຼືກຳລັງສຶກສາຮໍ່າຮຽນຢູ່ ກໍລອງເອົາວິທີການຂອງນ້ອງໄປໃຊ້ເບິ່ງ ຖ້າໄປໄດ້ດີຈັ່ງໃດ ກໍຢ່າລືມບອກລາວໂພສແດ່ເດີ ຈະໄດ້ນຳໄປຂໍສຳພາດມາເຜີຍແພ່ສູ່ສັງຄົມຕໍ່ໄປ.
ໂດຍ: ລິດຈະນາ ງາມວິໄລ