ໂດຍຕອບສະໜອງຕາມການເຊື້ອເຊີນ ຂອງທ່ານ ນາຍົກລັດຖະມົນຕີແຫ່ງ ສະຫະພັນຣັດເຊຍ, ທ່ານ ທອງລຸນ ສີສຸລິດ ນາຍົກລັດຖະລັດຖະມົນຕີ ແຫ່ງ ສປປ ລາວ, ໄດ້ນໍາພາຄະນະຜູ້ແທນເດີນທາງໄປຢ້ຽມຢາມ ສະຫະພັນຣັດເຊຍ ຢ່າງເປັນທາງການ, ໃນລະຫວ່າງວັນທີ 26-27 ກັນຍາ 2017 ນີ້, ຊຶ່ງການຢ້ຽມຢາມດັ່ງກ່າວ ໄດ້ກາຍເປັນຂີດໝາຍທີ່ສຳຄັນໃຫ້ແກ່ການເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືທີ່ມີມາແຕ່ດົນນານ ລະຫວ່າງສອງປະເທດ ທີ່ໄດ້ຮັບການພັດທະນານັບມື້ນັບກ້ວາງຂວາງ ແລະ ມີຄວາມເລິກເຊິ່ງຂຶ້ນເລື້ອຍໆ ນັບແຕ່ສອງປະເທດໄດ້ສ້າງຕັ້ງສາຍພົວພັນການທູດນຳກັນ ມາຕັ້ງແຕ່ວັນທີ 07 ຕຸລາ 1960 ເປັນຕົ້ນມາ.
ໃນໂອກາດຢ້ຽມຢາມຄັ້ງນີ້, ທ່ານນາຍົກລັັດຖະມົນຕີ ທອງລຸນ ສີສຸລິດ ໄດ້ພົບປະສອງຝ່າຍຢ່າງເປັນທາງການ ກັບ ທ່ານ ເດີມີຕລີ ເມດເວແດບ ນາຍົກລັດຖະມົນຕີ ແຫ່ງ ສະຫະພັນຣັດເຊຍ, ພາຍໃຕ້ບັນຍາກາດແຫ່ງຄວາມສະ ໜິດສະໜົມ, ໄມຕີຈິດ ແລະ ມິດຕະພາບ, ຄວາມເຂົ້າອົກເຂົ້າໃຈ ເຊິ່ງກັນ ແລະ ກັນ. ກ່ອນອື່ນໝົດ, ສອງຝ່າຍໄດ້ທົບທວນຄືນ ແລະ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອອັນດີງາມ ທີ່ມີມາແຕ່ຍາວນານ, ບົນພື້ນຖານແຫ່ງຄວາມໄວ້ເນື້ອເຊື່ອໃຈ, ການຊ່ວຍເຫລືອເຊິ່ງກັນ ແລະ ກັນ, ທັງການເປັນ ຄູ່ຮ່ວມມືຍຸດທະສາດ ນຳກັນໃນຂົງເຂດອາຊີ-ປາຊີຟິກ. ສອງທ່ານ ມີຄວາມເຫັນເປັນເອກະພາບກັນວ່າ ການພົວພັນ ແລະ ຮ່ວມມືດັ່ງກ່າວ ແມ່ນໄດ້ຮັບການເສີມຂະຫຍາຍ ແລະ ສືບຕໍ່ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ, ຊຶ່ງສະແດງອອກໃນການແລກປ່ຽນ ການຢ້ຽມຢາມເຊິ່ງກັນ ແລະ ກັນ ຢ່າງເປັນປົກກະຕິ ຂອງການນຳສອງປະເທດໃນທຸກລະດັບໃນໄລຍະຜ່ານມາ.
ໃນອະນາຄົດສອງປະເທດ ມີຄວາມມຸ່ງຫວັງ ທີ່ຈະອອກແຮງເພີ່ມທະວີການພົວພັນຮ່ວມມືທີ່ມີແລ້ວນັ້ນໃຫ້ດີຍິ່ງໆຂຶ້ນ ແລະ ມີໝາກຜົນກວ່າເກົ່າ ເພື່ອຍົກລະດັບການພົວພັນສອງຝ່າຍໃຫ້ຂຶ້ນສູ່ລະດັບສູງໃນໄລຍະໃໝ່, ສີືບຕໍ່ໃຫ້ ການຊ່ວຍ ເຫລືອເຊິ່ງກັນ ແລະ ກັນດ້ວຍການຊຸກຍູ້ການ ຮ່ວມມືໃນຂົງ ເຂດເສດຖະກິດ-ການຄ້າ, ການລົງທຶນ, ພະລັງ ງານ, ການສຶກສາ, ວັດທະນະທຳ, ສາທາລະນະສຸກ, ວິທະຍາສາດ-ເຕັກໂນໂລຊີ, ການທ່ອງທ່ຽວ, ໂທລະຄົມມະນາ ຄົມ, ການທະຫານ ແລະ ຂະແໜງການອື່ນໆ ທີ່ສອງຝ່າຍມີທ່າແຮງ ແລະ ຄວາມສົນໃຈຮ່ວມກັນ; ສືບຕໍ່ແລກປ່ຽນການຢ້ຽມຢາມເຊິ່ງກັນ ແລະ ກັນ ໃນລະດັບສູງ ຕະຫລອດຮອດລະດັບວິຊາການ, ລວມທັງລະຫວ່າງສອງລັດ ສະພາແຫ່ງຊາດ ແລະ ນະຄອນຫລວງ ເພື່ອຜັນຂະຫຍາຍຜົນການຢ້ຽມຢາມ ແລະ ຊຸກຍູ້ບັນດາສັນຍາຮ່ວມມືກັນ ໃຫ້ໄດ້ຮັບການຈັດຕັ້ງປະຕິບັດເປັນຮູບປະທຳ.
ພາຍຫລັງສຳເລັດການພົບປະ, ສອງຝ່າຍໄດ້ລົງນາມໃນເອກະສານຮ່ວມກັນ ຈຳນວນ 7 ສະບັບ ເປັນຕັ້ນ ແມ່ນສົນ ທິສັນຍາ ລະຫວ່າງ ສປປ ລາວ ແລະ ສະຫະພັນຣັດເຊຍ ວ່າດ້ວຍການໂອນຕົວນັກໂທດ, ສັນຍາລະຫວ່າງລັດຖະບານ ແຫ່ງ ສປປ ລາວ ແລະ ສະຫະພັນຣັດເຊຍ ວ່າດ້ວຍ ການຂົນສົ່ງທາງອາກາດ, ເອກະສານການຮ່ວມມືໃນຂະແໜງການພະລັງງານ ແລະ ບໍ່ແຮ່ 3 ສະບັບ, ເອກະສານໃນວຽກງານການສ້າງຄວາມອາດສາມາດ ໃຫ້ແກ່ພະນັກງານໃນວຽກງານການຕ້ານການຟອກເງິນ ແລະ ຕ້ານການສະໜອງທຶນໃຫ້ແກ່ການກໍ່ການຮ້າຍ 1 ສະບັບ ແລະ ເອກະສານຮ່ວມມືທາງດ້ານເຕັກນິກການທະຫານ 1 ສະບັບ. ຫລັງຈາກນັ້ນ ໄດ້ມີການຖະແຫລງຂ່າວຮ່ວມກັນ ຕໍ່ສື່ມວນຊົນ ກ່ຽວກັບຜົນຂອງການພົບປະ ແລະ ຜົນສຳເລັດຂອງການຢ້ຽມຢາມທາງການຢູ່ ສະຫະພັນຣັດເຊຍ ໃນຄັ້ງນີ້, ຊຶ່ງໃນໂອກາດນີ້, ທ່ານ ທອງລຸນ ສີສຸລິດ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ແລະ ຕາງ ໜ້າໃຫ້ລັດ ຖະບານ ແຫ່ງ ສປປ ລາວ ສະແດງຄວາມຂອບໃຈຢ່າງຈິງໃຈຕໍ່ການສະໜັບສະໜູນ ແລະ ຊ່ວຍເຫລືອອັນລ້ຳຄ່າ ຂອງລັດຖະບານຣັດເຊຍ ໃຫ້ແກ່ ສປປ ລາວ ໃນໄລຍະທີ່ຜ່ານມາ ກໍຄືໃນປັດຈຸບັນ.
ນອກຈາກນັ້ນ, ໃນໂອກາດຢ້ຽມຢາມດັ່ງກ່າວ, ທ່ານ ທອງລຸນ ສີສຸລິດ ໄດ້ພົບປະກັບປະທານສະພາສະຫະພັນ ແຫ່ງ ສະຫະພັນຣັດເຊຍ (ສະພາສູງ) ທ່ານ ນາງ ວາເລັນຕີນາ ມັດວຽນໂກ, ພົບປະກັບປະທານສະມາຄົມມິດຕະພາບ ຣັດເຊຍ-ລາວ ແລະ ຢ້ຽມຢາມສະຖານທີ່ວັດທະນະທໍາຂອງຣັດເຊຍ ຈໍານວນໜຶ່ງ. ການຢ້ຽມຢາມ ສະຫະພັນຣັດເຊຍ ຂອງຄະນະຜູ້ແທນ ນຳໂດຍທ່ານ ນາຍົກ ລັດຖະມົນຕີ ແຫ່ງ ສປປ ລາວ ໃນຄັ້ງນີ້, ໄດ້ຮັບຜົນສຳເລັດ ຕາມຄາດ ໝາຍທີ່ໄດ້ວາງໄວ້.
ແຫລ່ງຂ່າວ: Sengaloun Sayalath