ຜູ້ອຳນວຍການກອງທຶນສາກົນ ຫຼື ໄອເອັມເອັບ (IMF) ຖະແຫຼງຖືກສານຂອງຝຣັ່ງຕັ້ງຂໍ້ຫາ ລະເລີຍການປະຕິບັດ
ໜ້າທີ່ ກ່ຽວກັບຄະດີສໍ້ລາດບັງຫຼວງເມື່ອ 6 ປີທີ່ແລ້ວ ໃນຂະນະທີ່ດຳລົງຕຳແໜ່ງເປັນລັດຖະມົນຕີການເງິນຂອງ
ປະເທດຝຣັ່ງ.
ທ່ານ ນາງ ຄຣິດສິນ ລາກາດ ຜູ້ອຳນວຍການກອງທຶນສາກົນ ໄດ້ຖະແຫຼງວ່າ ຕົນເອງຖືກສານຂອງຝຣັ່ງຕັ້ງຂໍ້ຫາ
ຢ່າງເປັນທາງການ ໃນຄວາມຜິດຖານລະເລີຍການປະຕິບັດໜ້າທີ່ ກ່ຽວກັບຄະດີສໍ້ລາດບັງຫຼວງ ເຊິ່ງເກີດຂຶ້ນເມື່ອ
6 ປີ ທີ່ແລ້ວ ໃນຂະນະທີ່ນາງດຳລົງຕຳແໜ່ງເປັນລັດຖະມົນຕີການເງິນຂອງຝຣັ່ງ, ທັງນີ້ ທ່ານ ນາງ ລາກາດ ຍັງ
ຄົງຢືນຢັນເຖິງຄວາມບໍລິສຸດໂປ່ງໃສຂອງທ່ານເອງ ແລະ ຢືນຢັນວ່າ ຈະບໍ່ມີແຜນລາອອກຈາກຕຳແໜ່ງປະທານ
ໄອເອັມເອັບ.
ທ່ານ ນາງ ລາກາດ ຍັງຖະແຫຼງອີກວ່າ ຄະນະກຳມະການສອບສວນຂອງສານຍຸດຕິທຳແຫ່ງສາທາລະນະລັດຝຣັ່ງ
ໄດ້ຕັດສິນໃຈທີ່ຈະດຳເນີນການສອບສວນຢ່າງເປັນທາງການ ພາຍໃຕ້ກົດໝາຍຂອງຝຣັ່ງ ແລະ ການຖືກສານ
ສັ່ງສອບສວນຢ່າງເປັນທາງການໃນຄັ້ງນີ້ ກໍປຽບໄດ້ກັບການຖືກຕັ້ງຂໍ້ຫາໃນເບື້ອງຕົ້ນ ເຊິ່ງໃນພາຍຫຼັງຈາກນັ້ນ
ຜູ້ພິພາກສາອາດຈະຍົກເລີກການສອບສວນ ຫຼື ບໍ່ກໍຕັ້ງຂໍ້ຫາຢ່າງເປັນທາງການ ແລ້ວຈິ່ງຈະເຂົ້າສູ່ຂະບວນການ
ພິຈາລະນາຄະດີຕໍ່ໄປ.