ດ່ານສາກົນຂົວມິດຕະພາບ ລາວ-ໄທ 1 ນະຄອນຫຼວງວຽງຈັນ ເປັນດ່ານແຫ່ງໜຶ່ງທີ່ມີລົດ ແລະ ຄົນເຂົ້າ-ອອກເປັນຈຳນວນຫຼວງຫຼາຍ ສະເພາະແຕ່ພາຫະນະລົດມື້ໜຶ່ງຫຼາຍຮ້ອຍຄັນ ອັນໄດ້ເຮັດໃຫ້ການຈາລະຈອນຢູ່ພາຍໃນດ່ານເບື້ອງຂາອອກອັ່ງອໍ ເນື່ອງຈາກໃນປັດຈຸບັນເສັ້ນທາງຂາອອກທີ່ມີທັງລົດທົ່ວໄປ ແລະ ລົດບັນທຸກສິນຄ້າໃຊ້ຮ່ວມກັນ ເຊິ່ງຄາດວ່າໃນອະນາຄົດບັນຫາດັ່ງກ່າວ ຈະໄດ້ຮັບການແກ້ໄຂເນື່ອງຈາກບໍລິສັດ ເອັສທີກຣຸບ ຈຳກັດ ໄດ້ໃຫ້ທຶນຊ່ວຍເຫຼືອສ້າງເສັ້ນທາງສຳລັບໃຊ້ແຕ່ລົດບັນທຸກສະເພາະ ຈະບໍ່ໃຫ້ໄປປົນເປກັບຊ່ອງທາງລົດທົ່ວໄປ 8 ຕື້ກວ່າກີບ ເປັນເສັ້ນທາງເບຕົງເສີມເຫຼັກມີຄວາມກວ້າງ 13 ແມັດ ແລະ ຄວາມຍາວ 426.065 ແມັດ ໂດຍແມ່ນພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ເປັນເຈົ້າຂອງໂຄງການ ແລະ ບໍລິສັດ ຄອງຊັບກໍ່ສ້າງ-ຂົວທາງ ຈຳກັດຜູ້ດຽວ ເປັນຜູ້ຮັບເໝົາກໍ່ສ້າງ ເລີ່ມລົງມືຈັດຕັ້ງປະຕິບັດມາແຕ່ປີ 2015 ແລະ ສຳເລັດຕົ້ນປີ 2017 ເປັນທາງຕັດໃໝ່ອອກທະລຸໃສ່ເສັ້ນທາງທ່າເດື່ອ ເພື່ອສະດວກເວລາລົດບັນທຸກຂາອອກໄປໄທຈະຜ່ານເສັ້ນທາງດັ່ງກ່າວ ເນື່ອງຈາກວ່າແຕ່ລະມື້ມີລົດບັນທຸກຜ່ານດ່ານແຫ່ງນີ້ ສະເລ່ຍມື້ໜຶ່ງປະມານ 100 ຄັນ ສະເພາະແຕ່ລົດບັນທຸກຂົນສົ່ງນ້ຳມັນເຊື້ອໄຟສະເລ່ຍອາທິດໜຶ່ງ 200 ຄັນ ຖືວ່າເປັນຈຳນວນຫຼາຍສົມຄວນ ໃນເມື່ອລົດບັນທຸກຈຳນວນນີ້ໄປໃຊ້ເສັ້ນທາງເຂົ້າດ່ານຮ່ວມກັບລົດທົ່ວໄປ ຈະເຮັດໃຫ້ການສັນຈອນແອອັດ ແລະ ໄປອັ່ງອໍຢູ່ຈຸດບໍລິການແລ່ນເອກະສານ.
ທ່ານ ທອງທິບ ສີວິໄຊ ຍັງໃຫ້ຮູ້ຕື່ມວ່າ: ພາຍຫຼັງໂຄງການກໍ່ສ້າງເສັ້ນທາງດັ່ງກ່າວສຳເລັດ ທາງດ່ານກໍ່ໄດ້ມີການກະກຽມດ້ານຕ່າງໆເພື່ອບໍລິການ ເປັນຕົ້ນ ຕັ້ງຈຸດກວດຄົນພາສີ ກະສິກຳ ຊິງຊັງນ້ຳໜັກ ແລະ ອື່ນໆ ໂດຍລວມແລ້ວ ມາຮອດປັດຈຸບັນແມ່ນສຳເລັດໂດຍພື້ນຖານ ຍັງເຫຼືອແຕ່ສ້າງປະຕູໂຂງສົ້ນຂາເຂົ້າຢູ່ຕິດກັບເສັ້ນທາງທ່າເດື່ອ ແລະ ພ້ອມທີ່ຈະເປີດໃຫ້ບໍລິການຢ່າງເປັນທາງການໃນຕົ້ນເດືອນພະຈິກ 2017 ດັ່ງນັ້ນ ຈຶ່ງແຈ້ງມາຍັງບັນດາຜູ້ປະກອບການທຸລະກິດ ຂົນສົ່ງສິນຄ້າຜ່ານດ່ານສາກົນຂົວມິດຕະພາບ ລາວ-ໄທ 1 ໃຫ້ໄປໃຊ້ເສັ້ນທາງດັ່ງກ່າວ ພາຍຫຼັງທີ່ເປີດໃຫ້ບໍລິການ ແລະ ຈະບໍ່ໃຫ້ໄປໃຊ້ເສັ້ນທາງຂາອອກຮ່ວມກັບລົດທົ່ວໄປຄືຜ່ານມາອີກ ສ່ວນລົດທົ່ວໄປກໍ່ບໍ່ໃຫ້ໄປໃຊ້ຮ່ວມກັບເສັ້ນທາງລົດບັນທຸກຂາອອກຢ່າງເດັດຂາດເຊັ່ນດຽວກັນ.
ແຫລ່ງຂ່າວ: ໜັງສືພິມວຽງຈັນໃໝ່