ລັດຖະບານປະເທດຍີ່ປຸ່ນ ໄດ້ເຊັນສັນຍາ ໃຫ້ການຊ່ວຍເຫລືອອາຫານທ່ຽງ ໃຫ້ແກ່ນ້ອງນັກ ຮຽນ ຈຳນວນ 1.450 ໂຮງຮຽນ ໃນ 32 ເມືອງເປົ້າໝາຍ, ຢູ່ 7 ແຂວງ ມີ ແຂວງ ຜົ້ງສາລີ, ອຸດົມໄຊ, ຫລວງນໍ້າທາ, ຫລວງພະບາງ, ສາລະວັນ, ເຊກອງ ແລະ ແຂວງອັດຕະປື, ເຊິ່ງລວມມີມູນຄ່າ ປະມານ 350 ລ້ານເຢັນ (ສະກຸນເງິນຍີ່ປຸ່ນ) ຫລື ປະມານ 3.2 ລ້ານໂດລາສະຫະລັດ. ປະກອບ ມີ ປອງປາຈໍານວນ 460 ໂຕນ ແລະ ເຂົ້າສານຈ້າວ 250 ໂຕນ. ໂຄງການດັ່ງກ່າວ, ຈະໄດ້ຈັດຕັ້ງ ໂດຍຜ່ານອົງການອາຫານໂລກ.
ພິທີເຊັນມອບ-ຮັບ ໄດ້ຈັດຂຶ້ນໃນວັນທີ 18 ກັນຍາ 2017 ນີ້ ທີ່ນະຄອນຫລວງວຽງຈັນ, ລະ ຫວ່າງ ທ່ານ lwaro Horii ຮອງລັດຖະມົນຕີ ກະຊວງການຕ່າງປະເທດຍີ່ປຸ່ນ ກັບ ທ່ານ Hakan Tongul ຮອງຜູ້ອໍານວນການ, ຜູ້ຕາງໜ້າອົງການ ອາຫານໂລກປະຈໍາ ສປປ ລາວ, ໂດຍມີ ທ່ານ ບຸນປັນ ໄຊມົນຕີ ຫົວໜ້າກົມແຜນການ ກະຊວງສຶກສາທິການ ແລະ ກິລາ, ບັນດາຫົວໜ້າກົມ, ຮອງກົມ, ເອກອັກຄະລັດຖະທູດຍີ່ປຸ່ນ ປະຈໍາ ສປປ ລາວ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ ເປັນສັກຄີພິຍານ.
ທ່ານ ບຸນປັນ ໄຊມົນຕີ ກ່າວວ່າ: ການລຶບລ້າງການຂາດອາຫານ ແມ່ນໜຶ່ງໃນບັນຫາທາງດ້ານນະໂຍບາຍ ທີ່ສໍາຄັນຂອງ ສປປ ລາວ ທີ່ຕ້ອງຮັບປະກັນວ່າ ແຜນງານເຫລົ່ານັ້ນ ຖືກຈັດຕັ້ງປະຕິບັດດ້ວຍວິທີການ ທີ່ມີຄວາມຍືນຍົງ, ດ້ວຍການລິເລີ່ມ ແລະ ຄວາມເປັນເຈົ້າການຂອງຊຸມຊົນ. ການຊ່ວຍເຫລືອອາຫານ ເຊິ່ງແມ່ນແຜນງານອາຫານທ່ຽງ ສໍາລັບນ້ອງນັກຮຽນໃນເຂດ ທີ່ບໍ່ມີອາຫານໃນໂຮງຮຽນ, ໂດຍສະເພາະ ເຂດຫ່າງໄກສອກຫລີກຢູ່ 32 ເມືອງເປົ້າໝາຍ ແລະ 7 ແຂວງ ໃນທົ່ວປະເທດ, ເຊິ່ງຈະມີຜູ້ໄດ້ຮັບຜົນປະໂຫຍດ ຫລາຍກວ່າ 62.500-140.00 ຄົນ.
ທ່ານ ບຸນປັນ ໄຊມົນຕີ ກ່າວຕື່ມວ່າ: ລັດຖະບານຍີ່ປຸ່ນ ມີເປົ້າໝາຍພັດທະນາ ຂີດຄວາມສາມາດໃຫ້ປະຊາຊົນລາວ, ໂດຍຄຽງຄູ່ກັບການໃຫ້ທຶນການສຶກສາ ໃນທຸກລະດັບ ແກ່ນັກສຶກສາລາວ ເພື່ອສາມາດພັດທະນາ ເສດຖະກິດ-ສັງ ຄົມ, ການຫລຸດພົ້ນຈາກຄວາມທຸກຍາກ ໃນປີ 2020.
ແຫລ່ງຂ່າວ: ຂັນໄຊ ແລະ ພາບປະກອບ: ສະຫວາດ (ສຳນັກຂ່າວສານປະເທດລາວ)