ລົມພາຍຸ ດອກສຸຣິ (DOKSURI) ຫົວທີ 19 ໃນເວລາ 07 ໂມງເຊົ້າ ຂອງວັນທີ 14 ກັນຍາ ປີ 2017, ເຊີ່ງມີຈຸດທີຕັ້ງ ຢູ່ເສັ້ນຂະໜານ ທີ 16.1 ອົງສາເໜືອ ແລະ ເສັ້ນແວງທີ 112.2 ອົງສາຕາເວັນອອກ ພວມເຄື່ອນທີ່ມາທາງທິດຕາເວັນຕົກດ້ວຍຄວາມໄວ 25 ກິໂລແມັດຕໍ່ຊົ່ວໂມງ ຄາດວ່າພາຍຸຫົວນີ້ ຈະເຄື່ອນທີ່ຜ່ານແຂວງ ພາກກາງຂອງປະເທດລາວໃນຕອນບ່າຍຂອງວັນທີ 15 ກັນຍາ 2017. ຊຶ່ງຈະເຮັດໃຫ້ມີຝົນຕົກຟ້າຮ້ອງຟ້າເຫຼຶ້ອມໃນລະດັບປານກາງ ຫາຕົກໜັກຢູ່ບາງທ້ອງຖິ່ນແຂວງພາກກາງ ແລະ ພາກເໜືອ ໃນໄລຍະວັນທີ 14 – 16 ກັນຍານີ້.
ດັ່ງນັ້ນ, ຈຶ່ງຂໍແຈ້ງເຕືອນເຖິງອຳນາດການປົກຄອງທຸກພາກສ່ວນ ແລະ ພໍ່ແມ່ປະຊາຊົນ ທີ່ອາໄສຢູ່ບັນດາແຂວງ ພາກເໜືອ ແລະ ພາກກາງ ຈົ່ງມີສະຕິກຽມພ້ອມ ຮັບມືກັບສະພາບຝົນຕົກໜັກ ແລະ ລົມພັດແຮງ ທີ່ຈະກໍ່ໃຫ້ເກີດນໍ້າຖ້ວມຊຸ, ດິນເຈື່ອນ, ນໍ້າຖ້ວມອັ່ງ ຊື່ງຈະເປັນອັນຕະລາຍຕໍ່ຊີວິດ ແລະ ຊັບສິນ ຂອງພໍ່ແມ່ປະຊາຊົນ, ພ້ອມນີ້ກໍ່ໃຫ້ກະກຽມເຄື່ອນຍ້າຍວັດຖຸສີ່ງຂອງ ແລະ ສັດລ້ຽງໄປໄວ້ບ່ອນທີ່ປອດໄພ.
ແຫລ່ງຂ່າວ: ກົມອຸຕຸນິຍົມ ແລະ ອຸທົກກະສາດ