ເປັນອີກໜຶ່ງຄວາມພາກພູມໃຈຂອງຊາວລາວທຸກຖ້ວນໜ້າ ໂດຍສະເພາະຊາວຫຼວງພະບາງ ທີ່ປີນີ້ເມືອງຫຼວງພະບາງໄດ້ຮັບລາງວັນ “ສິ່ງແວດລ້ອມຍືນຍົງຂອງອາຊຽນ” ເຊິ່ງລາງວັນດັ່ງກ່າວຈະເດີນທາງມາຈາກປະເທດ ບຣູໄນ ຮອດສະໜາມບິນສາກົນຫຼວງພະບາງໃນຕອນບ່າຍຂອງວັນພະຫັດທີ 14 ກັນຍາ 2017 ທີ່ຈະມາຮອດນີ້
ທ່ານ ສົມດີ ພອນສະຫວັດ ຮອງປະທານອົງການພັດທະນາ ແລະ ບໍລິຫານຕົວເມືອງຫຼວງພະບາງ ແລະ ອົງການປົກຄອງເມືອງຫຼວງພະບາງຈະໄດ້ມີການຈດພິທີຕ້ອນຮັບລາງວັນສິ່ງແວດລ້ອມຍືນຍົງຂອງອາຊຽນ ຢ່າງຍິ່ງໃຫຍ່ ໂດຍຈະເລີ່ມແຫ່ຈາກສະໜາມບິນສາກົນຫຼວງພະບາງເຂົ້າຫາຕົວເມືອງ ຫຼັງຈາກນັ້ນຈະມີພິທີສູດມຸງຄຸນຢູ່ວັດຊຽງທອງ
ທ່ານ ນາງ ອິນຖາວອນ ພົມມະຈັນ ຮອງເຈົ້າເມືອງຫຼວງພະບາງ ໄດ້ຮຽກຮ້ອງໃຫ້ພະນັກງານ ທະຫານ ຕຳຫຼວດ ຕະຫຼອດຮອດປະຊາຊົນເຂົ້າຮ່ວມໃນພິທີຄັ້ງນີ້
ລາງວັນສິ່ງແວດລ້ອມຍືນຍົງຂອງອາຊຽນ ໄດ້ມີການມອບ-ຮັບມາແລ້ວ 4 ຄັ້ງ ນັບຕັ້ງແຕ່ປີ 2008 ເປັນຕົ້ນມາ ໂດຍເມືອງຫຼວງພະບາງ ໄດ້ຮັບລາງວັນດັ່ງກ່າວ 3 ຄັ້ງ ແລະ ເມືອງຊຳເໜືອໄດ້ຮັບ 1 ຄັ້ງ
ສຳລັບຕົວຊີ້ວັດຂອງລາງວັນດັ່ງກ່າວແມ່ນອີງໃສ່ 3 ເງື່ອນໄຂຄື: ຄຸນນະພາບດິນ, ຄຸນນະພາບນ້ຳ ແລະ ຄຸນນະພາບອາກາດ.
ແຫລ່ງຂ່າວຈາກ: tonamcha