ໃນວັນທີ 5 ກັນຍາ 2017, ທີ່ຫ້ອງວ່າການ ປະທານປະເທດ ທ່ານ ບຸນຍັງ ວໍລະຈິດ ປະ ທານປະເທດ ແຫ່ງ ສປປ ລາວ ໄດ້ມອບສານແຕ່ງຕັ້ງໃຫ້ ທ່ານ ແສງ ສຸຂະທິວົງ ໄປດໍາລົງຕໍາແໜ່ງເປັນ ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສປປ ລາວ ປະຈຳຣາຊະອານາຈັກໄທ.
ໃນໂອກາດດັ່ງກ່າວ, ທ່ານປະທານປະເທດ ໄດ້ສະແດງຄວາມຍິນດີ ແລະ ຊົມເຊີຍ ຕໍ່ທ່ານທູດ ທີ່ໄດ້ຖືກແຕ່ງຕັ້ງ ໃຫ້ໄປປະຕິບັດໜ້າທີ່ການທູດ ປະຈຳຢູ່ຣາຊະອານາຈັກໄທ, ພ້ອມທັງ ໃຫ້ທິດຊີ້ນຳ ຢ່າງເລິກເຊິ່ງ ແລະ ໜັກແໜ້ນ, ໂດຍສະເພາະ ການປະທິບັດໜ້າທີ່ການທູດ ໃຫ້ເກີດປະໂຫຍດສູງສຸດ ແກ່ພາ ລະກິດ ປົກປັກຮັກສາ ແລະ ສ້າງສາພັດທະນາ ປະເທດຊາດ, ທັງເປັນການເສີມຂະຫຍາຍ ການພົວພັນຮ່ວມມື ລະຫວ່າງ ປະເທດໃຫ້ນັບມື້ດີຂຶ້ນເປັນກ້າວໆ.
ພ້ອມນີ້, ທ່ານທູດ ທີ່ຖືກແຕ່ງຕັ້ງ ກໍໄດ້ຖືໂອກາດສະແດງ ຄວາມຂອບອົກຂອບໃຈ ແລະ ຮູ້ບຸນຄຸນ ມາຍັງການນຳ ພັກ-ລັດຖະບານ ທີ່ໄດ້ໃຫ້ຄວາມໄວ້ເນື້ອເຊື່ອໃຈ ແຕ່ງຕັ້ງໃຫ້ເປັນ ເອກອັກຄະລັດຖະທູດໄປ ປະຈຳການ ຢູ່ປະເທດດັ່ງກ່າວ. ພ້ອມທັງ ສະແດງຄວາມຢືນຢັນວ່າ ຈະສຸມທຸກຄວາມພະຍາຍາມ ເພື່ອປະຕິບັດໜ້າທີ່ ທີ່ຖືກມອບໝາຍໃນຄັ້ງນີ້ ໃຫ້ເກີດປະໂຫຍດສູງສຸດ ມາສູ່ປະເທດຊາດ.
ຮຽບຮຽງຂ່າວ: ສົມຫວັງ,
ພາບປະກອບຂ່າວ: ໄອ່ຄຳ