ພິທີໄຂສົກຮຽນໃໝ່ 2017-2018 ຂອງພະແນກສຶກສາທິການ ແລະ ກີລາ ນະຄອນຫຼວງວຽງຈັນ ຈັດຂຶ້ນໃນວັນທີ 31 ສິງຫາ 2017 ທີ່ໂຮງຮຽນມິດຕະພາບນະຄອນຫຼວງວຽງຈັນ-ໂຮ່ຈີມິງ ໂດຍການເປັນປະທານຂອງທ່ານ ຊົມພູ ແກ້ວປັນຍາ ຫົວໜ້າພະແນກສຶກສາທິການ ແລະ ກີລາ ນວ ເປັນກຽດເຂົ້າຮ່ວມຂອງທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ ຕາງໜ້າຈາກກະຊວງສຶກສາທິການ ແລະ ກີລາ ແຂກຖືກເຊີນ ພະນັກງານ ຄູ-ອາຈານ ແລະ ນັກຮຽນ ເຂົ້າຮ່ວມ.
ທ່ານ ຊົມພູ ແກ້ວປັນຍາ ກ່າວວ່າ: ໃນສົກຮຽນຜ່ານມາ ທົ່ວນະຄອນຫຼວງມີຈຳນວນໂຮງຮຽນທັງໝົດ 1.031 ແຫ່ງ ເພີ່ມຂຶ້ນ 38 ແຫ່ງ ຈຳນວນຄູສອນມີ 8.190 ຄົນ ຍິງ 6.260 ຄົນ ຈຳນວນນັກຮຽນມີ 195.765 ຄົນ ຍິງ 95.245 ຄົນ ທຽບໃສ່ປີຜ່ານມາເພີ່ມຂຶ້ນ 9.400 ຄົນ ເທົ່າກັບ 4,8% ເວົ້າລວມແລ້ວ ນວ ສາມາດບັນລຸການສຶກສາເພື່ອທຸກຄົນແຕ່ອາຍຸ 11 ປີຂຶ້ນໄປ ຍັງຮຽນຢູ່ຊັ້ນປະຖົມສຶກສາ ຈຳນວນ 4.563 ຄົນ ທຽບໃສ່ຈຳນວນນັກຮຽນຊັ້ນປະຖົມທັງໝົດ 6,07% ສຳລັບການປັບປຸງຄຸນະພາບການຮຽນ-ການສອນ ມີນັກຮຽນເກ່ງລະດັບຊາດຂັ້ນ ປ5 ໄດ້ອັນດັບ 1 ມີ 2 ວິຊາຄື: ພາສາລາວ ແລະ ວິຊາຄະນິດສາດ ອັນດັບ 2 ວິຊາໂລກອ້ອມຕົວ ຂັ້ນ ມ4 ໄດ້ອັນດັບທີ 1 ທັງ 4 ວິຊາ ຂັ້ນ ມ7 ໄດ້ອັນດັບທີ 2 ທັງ 4 ວິຊາ.
ສຳລັບການສຶກສານອກໂຮງຮຽນ ຫຼັງຈາກມີການປະກາດຈົບວຽກງານບຳລຸງມັດທະຍົມຕົ້ນສຳລັບປະຊາຊົນເປັນທາງການ ກໍ່ໄດ້ສືບຕໍ່ສຳຫຼວດສະຖິຕິ ເພື່ອຍົກລະດັບການສຶກສາໃຫ້ແກ່ຊາວໜຸ່ມ ພະນັກງານ ທະຫານ ຕຳຫຼວດຢູ່ 6 ຈຸດ ໄດ້ມີການຍົກລະດັບແຕ່ ມ1-ມ7 ມີທັງໝົດ 975 ຄົນ ຍິງ 448 ຄົນ ໃນນັ້ນ ມ7 ມີ 614 ຄົນ ຍິງ 239 ຄົນ ພ້ອມທັງສົ່ງເສີມວຽກງານວິຊາຊີບຂັ້ນພື້ນຖານ ແລະ ຜົນງານອື່ນໆອີກຫຼາຍດ້ານ.
ສຳລັບແຜນພັດທະນາການສຶກສາໃນສົກຮຽນ 2017-2018 ເພື່ອບັນລຸໄດ້ຕາມຄາດໝາຍ ນະໂຍບາຍ ແລະ ຍຸດທະສາດປະຕິຮູບລະບົບການສຶກສາແຫ່ງຊາດໄລຍະສອງ ເພື່ອຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ໂດຍຕິດພັນກັບຂະບວນຮັກຊາດ ແລະ ພັດທະນາ ດ້ວຍຈິດໃຈ 4 ບຸກທະລຸຄາດໝາຍລວມ ນັກຮຽນທຸກຄົນຕ້ອງມີຄວາມຮູ້ ຄວາມສາມາດຂັ້ນພື້ນຖານທີ່ຈຳເປັນ ພ້ອມທັງມີສຸຂະພາບແຂງແຮງ ເພື່ອສາມາດເຂົ້າເຮັດວຽກຕາມຕະຫຼາດແຮງງານ ຫຼື ສືບຕໍ່ຮຽນໃນການສຶກສາຫຼັງຂັ້ນພື້ນຖານ (ມັດທະຍົມຕອນປາຍ) ສະໜອງການສຶກສາຂັ້ນພື້ນຖານ ໃຫ້ສອດຄ່ອງກັບຄວາມຕ້ອງການຂອງການຂະຫຍາຍຕົວຂອງເສດຖະກິດ-ສັງຄົມ ໃນແຕ່ລະໄລຍະ ພ້ອມທັງສາມາດເຊື່ອມໂຍງກັບມາດຕະຖານຂອງພາກພື້ນ ແລະ ສາກົນ.
ແຫລ່ງຂ່າວ: ໜັງສືພິມວຽງຈັນໃໝ່