ເວັບໄຊຂ່າວບີບີຊີ ນິວສ໌ ຂອງອັງກິດ ລາຍງານຈາກນະຄອນລອນດອນ ເມື່ອວັນທີ 18 ສິງຫາ ໃນຄລິບວິດີໂອທີ່ກ່າວວ່າ ອິນເດຍ “ເຮັດບາບ” ສະແດງໂດຍໜຸ່ມຊາວຈີນທີ່ແຕ່ງຕົວເປັນຊາວຊິກ ເວົ້າພາສາຮຽນແບບອິນເດຍ ໂດຍສຳນັກຂ່າວຊິນຫົວຂອງທາງການຈີນເຜີຍແຜ່ຄລິບດັ່ງກ່າວຕັ້ງແຕ່ວັນພຸດທີ່ຜ່ານມາ ຈາກລາຍການສົນທະນາໃນກໍລະນີ ພິພາດເຂດແດນ ທີ່ກຳລັງມີບັນຫາກັນຢູ່ລະຫວ່າງ 2 ປະເທດ
ໃນຄລິບຊື່ “ບາບ 7 ປະການຂອງອິນເດຍ” ພິທີກອນສາວຊາວຈີນກ່າວເຖິງຄວາມຂັດຂ້ອງໃຈຕ່າງໆທີ່ມີຕໍ່ອິນເດຍ ໃນຄວາມຂັດແຍ້ງທີ່ກຳລັງດຳເນີນຢູ່ ເຂດພື້ນທີ່ ໂດຄລັມ ເຊິ່ງຕິດເຂດຊາຍແດນຈີນ ແລະ ພູຖານ
ໃນຄລິບວິດີໂອນີ້ເບິ່ງຄືວ່າຕ້ອງການສື່ສານໃຫ້ຊາວຕ່າງຊາດເທົ່ານັ້ນ ເນື່ອງຈາກສະເໜີເປັນພາສາອັງກິດ ແລະ ປະກົດຢູ່ຢູທູບ ທະວິດເຕີ ແລະ ເຟສບຸກ ຂອງຊິນຫົວ ເຊິ່ງຕ້ອງຫ້າມໃນຈີນ ຂະນະທີ່ລາຍງານຂອງສື່ຈີນກ່າວວ່າ ລາຍການສົນທະນາອອນໄລນນີ້ມີເປົ້າໝາຍເພື່ອ “ອອກຄວາມຄິດເຫັນໃນຫົວຂໍ້ຂ່າວຮ້ອນແຮງ ທັງພາຍໃນ ແລະ ນອກປະເທດ ຈາກມຸມມອງຂອງຈີນ ແລະ ດ້ວຍວິໄສທັດສາກົນ”
ທາງດ້ານປະຕິກິລິຍາຕອບສະໜອງຈາກສື່ຂອງອິນເດຍ ທັງໝົດລ້ວນກ່າວວ່າເປັນການຢຽດເຊື້ອຊາດ ໜັງສືພິມຮິນດູສະຖານໄທມ໌ ກ່າວວ່າ ຊິນຫົວເຜີຍແຜ່ຄລິບວິດີໂອຢຽດຢາມເຊື້ອຊາດ ດ້ວຍການຮຽນແບບຊາວອິນເດຍ ໂດຍສະເພາະຄົນຊົນເຜົ່າຊາວຊິກ ໃນຂະນະທີ່ໜັງສືພິມ ອິນເດຍທູເດກ່າວຫາສື່ຈີນວ່າລ້ຳເສັ້ນໄປອີກກ້າວໃນການຮຽນແບບອິນເດຍ