ສຳນັກຂ່າວຕ່າງປະເທດ ລາຍງານໃນວັນທີ 6 ສິງຫາຜ່ານມານີ້ວ່າ ເກີດເຫດເຮືອບິນທະຫານ MV-22 ຂອງກອງທັບສະຫະລັດອາເມຣິກາ ປະສົບອຸບັດເຫດຕົກນອກຊາຍຝັ່ງເມືອງຣັອກແຮມຕັນ ລັດຄວີນແລນ ປະເທດອົດສະຕາລີ ລະຫວ່າງການເຝິກຊ້ອມ ເມື່ອຕອນແລງຂອງວັນເສົາທີ 5 ສິງຫາຜ່ານມາ, ຖະແຫລງການຈາກກອງທັບເຮືອອາເມຣິກາ ໄດ້ລະບຸວ່າ ເຮືອບິນທະຫານ MV-22 ຖືກສົ່ງອອກຈາກກຳປັ່ນບັນທຸກເຮລິຄອບເຕີ້ລຳໜຶ່ງ ເພື່ອອອກປະຕິບັດພາລະກິດເຝິກຊ້ອມຕາມຕາຕະລາງກຳນົດໄວ້ ແຕ່ໄດ້ເກີດອຸບັດເຫດຕົກລົງໃນທະເລ, ທີມກູ້ໄພໄດ້ດຳເນີນການສົ່ງເຮືອອອກປະຕິບັດການຊ່ວຍເຫລືອ ຊຶ່ງສາມາດກອບກູ້ເອົາຊີວິດທະຫານໄວ້ໄດ້ 23 ຄົນ ແຕ່ຍັງຄົງມີຜູ້ສູນຫາຍອີກ 3 ຄົນ ຊຶ່ງຄາດວ່າເສຍຊີວິດແລ້ວ, ປັດຈຸບັນເຈົ້າໜ້າທີ່ກູ້ໄພ ກຳລັງຄົ້ນຫາຮ່າງຜູ້ເສຍຊີວິດ.