ສຳນັກຂ່າວຕ່າງປະເທດ ລາຍງານໃນວັນທີ 7 ສິງຫານີ້ວ່າ ໃນວັນອາທິດທີ 6 ສິງຫາຜ່ານມານີ້ ນັກເຄື່ອນໄຫວເພື່ອສັນຕິພາບ ແລະ ປະຊາຊົນຊາວຍີ່ປຸ່ນກວ່າ 5 ໝື່ນຄົນ ໄດ້ເດີນທາງເຂົ້າຮ່ວມພິທີລະນຶກ ວັນຄົບຮອບ 72 ປີ ທີ່ກອງທັບສະຫະລັດອາເມຣິກາ ຖິ້ມລະເບີດປະລະມະນູ ໃສ່ເມືອງຮິໂຣຊິມາ ລະຫວ່າງສົງຄາມໂລກຄັ້ງທີສອງ ເມື່ອວັນທີ 6 ສິງຫາ 1945 ທີ່ອະນຸສາວະລີສັນຕິພາບ (Peace Memorial Park) ເມືອງຮິໂຣຊິມາ ຊຶ່ງຈັດຂຶ້ນຢ່າງເປັນປະຈຳໃນທຸກໆປີ.

ທ່ານ ຊິນໂຊະ ອາເບະ ນາຍົກລັດຖະມົນຕີຍີ່ປຸ່ນ ໄດ້ເຂົ້າຮ່ວມກ່າວສູນທອນພົດພາຍໃນພິທີດັ່ງກ່າວນີ້ ແລະ ໄດ້ມີການພົບປະກັບກຸ່ມຜູ້ລອດຊີວິດຈາກເຫດການດັ່ງກ່າວ, ໃນນີ້ ຜູ້ລອດຊີວິດ ແລະ ນັກເຄື່ອນໄຫວເພື່ອສັນຕິພາບ ໄດ້ສະແດງຄວາມບໍ່ພໍໃຈ ທີ່ລັດຖະບານຍີ່ປຸ່ນ ຍັງຄົງປະຕິເສດບໍ່ເຂົ້າຮ່ວມເປັນພາຄີ ໃນສົນທິສັນຍາເກືອດຫ້າມອາວຸດນິວເຄລຍ ຂອງສະຫະປະຊາຊາດ ຈົນເຖິງປັດຈຸບັນ.