ຂປລ. ໃນວັນທີ 4 ສິງຫາ 2017 ນີ້ ຄະນະເລຂາສະພາແຫ່ງຊາດ ໄດ້ຈັດກອງປະຊຸມສະຫລຸບຕີລາຄາການເຄື່ອນໄຫວວຽກງານ 6 ເດືອນຕົ້ນປີ ແລະ ແຜນການເຄື່ອນໄຫວ 6 ເດືອນທ້າຍປີ 2017 ໂດຍການເປັນປະທານຂອງ ທ່ານ ນາງ ສວນສະຫວັນ ວິຍາເກດ ເລຂາທິການສະພາແຫ່ງຊາດ, ມີທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ ພ້ອມດ້ວຍພະນັກງານ-ລັດຖະກອນ ຂອງຄະນະເລຂາທິການສະພາແຫ່ງຊາດເຂົ້າຮ່ວມ.
ໃນໂອກາດດັ່ງກ່າວ, ທ່ານ ສຸບັນ ສະວະບຸດ ຮອງເລຂາທິການສະພາແຫ່ງຊາດ ໄດ້ຊີ້ໃຫ້ເຫັນເຖິງການເອົາໃຈໃສ່ຊີ້ນຳ-ນຳພາ ດ້ານການເມືອງແນວຄິດຂອງພະນັກງານ-ລັດຖະກອນ ທັງຊຸກຍູ້ໃຫ້ເຂົ້າຮ່ວມຮັບຟັງການເຜີຍແຜ່ ແນວທາງນະໂຍບາຍຂອງພັກ, ກົດໝາຍຂອງລັດ, ບັນດາມະຕິຄຳສັ່ງ, ເອກະສານສຳຄັນຕ່າງໆ ແລະ ເຂົ້າຮ່ວມຮັບຟັງການປາຖະກະຖາເລົ່າມູນເຊື້ອວັນສຳຄັນອື່ນໆຂອງພັກ, ຂອງຊາດຕາມທີ່ສະພາແຫ່ງຊາດຈັດຂຶ້ນ; ເອົາໃຈໃສ່ຊຸກຍູ້ວຽກງານດ້ານວິຊາສະເພາະ ເປັນຕົ້ນວຽກງານຮັບໃຊ້ກອງປະຊຸມຄະນະປະຈຳສະພາແຫ່ງຊາດ, ປະສານສົມທົບກັບພາກສ່ວນກ່ຽວຂ້ອງ ກຳນົດເອົາເນື້ອໃນເອກະສານ ແລະ ຮ່າງບົດບັນທຶກກອງປະຊຸມ. ໃນໄລຍະ 6 ເດືອນຜ່ານມາ ໄດ້ຮັບໃຊ້ກອງປະຊຸມທັງໝົດຈຳນວນ 13 ຄັ້ງ ໃນນັ້ນ, ກອງປະຊຸມສະໄໝວິສາມັນຂອງຄະນະປະຈຳສະພາແຫ່ງຊາດ 7 ຄັ້ງ ເຊິ່ງຄະນະປະຈຳສະພາແຫ່ງຊາດ ໄດ້ຄົ້ນຄວ້າພິຈາລະນາພິຈາລະນາ ແລະ ຮັບຮອງເອົາເນື້ອໃນ ໄດ້ທັງໝົດຈຳນວນ 53 ເນື້ອໃນ, ນອກນີ້ ຍັງໄດ້ກະກຽມຮັບໃຊ້ກອງປະຊຸມໃຫ້ຄະນະປະທານສະພາແຫ່ງຊາດ ແລະ ກອງປະຊຸມອື່ນໆທີ່ປິ່ນອ້ອມ.
ສຳລັບທິດທາງແຜນການເຄື່ອນໄຫວວຽກງານ 6 ເດືອນທ້າຍປີ 2017 ແມ່ນໃຫ້ສືບຕໍ່ເອົາໃຈໃສ່ວຽກງານເລຂານຸການ ກະກຽມດ້ານເນື້ອໃນທີ່ຢູ່ໃນຂອບເຂດທີ່ຕົນຮັບຜິດຊອບ ແລະ ປະສານສົມທົບກັບພາກສ່ວນທີກ່ຽວຂ້ອງ ທັງພາຍໃນ ແລະ ພາຍນອກ ເພື່ອຮັບໃຊ້ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ VIII, ກອງປະຊຸມລະຫວ່າງຄະນະປະຈຳສະພາແຫ່ງຊາດ ກັບຄະນະລັດຖະບານ, ອົງການກວດສອບແຫ່ງລັດ, ອົງການປົກປ້ອງ ແລະ ກົດໝາຍ ແລະ ກອງປະຊຸມ 4 ຫ້ອງວ່າການທົ່ວປະເທດ.
ແຫລ່ງຂ່າວ: ຂປລ