ອົງການປົກຄອງນະຄອນຫຼວງວຽງຈັນ ເຊິ່ງຕາງໜ້າໂດຍ ພະແນກແຜນການ ແລະ ການລົງທຶນນະຄອນຫຼວງ ແລະ ກຸ່ມ ບໍລິສັດ ພົງສະຫວັນ ຈຳກັດ. ໄດ້ຮ່ວມລົງນາມໃນບົດບັນທຶກຄວາມເຂົ້າໃຈ (MOU) ເພື່ອເກັບກຳຂໍ້ມູນ, ອອກແບບ ແລະ ສຶກສາຄວາມເປັນໄປໄດ້ ໃນການພັດທະນາໂຄງການຕ່າງໆ ຢູ່ເຂດນິຄົມອຸດສາຫະກຳ ນະຄອນຫຼວງວຽງຈັນ. ພິທີເຊັນບົດບັນທຶກດັ່ງກ່າວ ໄດ້ຈັດຂຶ້ນໃນວັນທີ 28 ກໍລະກົດຜ່ານມານີ້ ທີ່ຫ້ອງວ່າການປົກຄອງ ນະຄອນຫຼວງວຽງຈັນ ລະຫວ່າງ ທ່ານ ພູຂົງ ບັນນະວົງ ຫົວໜ້າ ພະແນກແຜນການ ແລະ ການລົງທຶນ ນະຄອນຫຼວງວຽງຈັນ ແລະ ທ່ານ ເທດລະຄອນ ດວງສົນທິ ຮອງປະທານຜູ້ປະຈຳການ ກຸ່ມບໍລິສັດ ພົງສະຫວັນ ຈຳກັດ ໂດຍຊ້ອງໜ້າທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ແລະ ທ່ານ ອ໋ອດ ພົງສະຫວັນ ປະທານກິດຕິມະສັກ ກຸ່ມບໍລິສັດ ພົງສະຫວັນ ຊຶ່ງມີບັນດາແຂກຖືກເຊີນ ພ້ອມດ້ວຍພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມຢ່າງພ້ອມພຽງ.

ການເຊັນບົດບັນທຶກຄວາມເຂົ້າໃຈໃນຄັ້ງນີ້ ແມ່ນເພື່ອເກັບກຳຂໍ້ມູນ, ສຳຫຼວດ ອອກແບບ ແລະ ສຶກສາຄວາມເປັນໄປໄດ້ໃນການພັດທະນາໂຄງການຕ່າງໆໃນເຂດນິຄົມອຸດສາຫະກຳ ຫຼັກ 21 ນະຄອນຫຼວງວຽງຈັນ ແລະ ຈະໃຊ້ເວລາຢູ່ 8 ເດືອນໃນການສຳຫຼວດຄວາມເປັນໄປໄດ້ ພາຍຫຼັງເຊັນລົງນາມບົດບັນທຶກ. ຫຼັງຈາກນັ້ນ ຈະສືບຕໍ່ດຳເນີນການສຳປະທານທີ່ດິນ ແລະ ແຜນການຊົດເຊີຍ ເພື່ອກ້າວໄປສູ່ການກໍ່ສ້າງໂຄງການຕ່າງໆ ອີງຕາມການສຳຫຼວດອອກແບບໂຄງການ ໃນເຂດນິຄົມອຸດສາຫະກຳນະຄອນຫຼວງ ໃນເບື້ອງຕົ້ນ ຈະເນັ້ນໃສ່ສຶກສາຄວາມເປັນໄປ ໃນທີ່ດິນຈຳນວນ 300 ເຮັກຕາ ທີ່ຈະດຳເນີນການລົງທຶນໂດຍ ກຸ່ມບໍລິສັດພົງສະ ຫວັນ. ຫຼັງຈາກນັ້ນ ກໍຈະສຶກສາຄວາມເປັນໄປໄດ້ ໃນການພັດທະນາພື້ນທີ່ດິນເພີ່ມອີກຈຳນວນ 1.000 ເຮັກຕາ ຮ່ວມກັບ ອົງການປົກຄອງນະຄອນຫຼວງ ເພື່ອພ້ອມກັນພັດທະນາ. ເບື້ອງຕົ້ນແມ່ນເລັ່ງໃສ່ພື້ນຖານໂຄງລ່າງ ຕາມທິດຊີ້ນຳຂອງນະຄອນຫຼວງ ສອດຄ່ອງກັບແນວທາງນະໂຍບາຍຂອງພັກ-ລັດກໍ ປະກອບສ່ວນເຮັດໃຫ້ແຜນພັດທະນາເສດຖະກິດ – ສັງຄົມຂອງລັດຖະບານແຫ່ງ ສປປ ລາວ ແລະ ເປົ້າໝາຍລຶບລ້າງຄວາມທຸກຍາກຂອງລັດຖະບານລາວ ພາຍໃນປີ 2020 ໄດ້ຮັບຜົນສຳເລັດ. ນອກນີ້, ໂຄງການພັດທະນາເຂດນິຄົມອຸດສາຫະກຳດັ່ງກ່າວນີ້ ຍັງຈະແນໃສ່ປະກອບສ່ວນຢ່າງຕັ້ງໜ້າ ໃນການບັນລຸເປົ້າໝາຍຫຼຸຸດພົ້ນອອກ ຈາກລາຍຊື່ປະເທດດ້ອຍພັດທະນາພາຍໃນປີ 2020 ນີ້.

ແຫລ່ງຂ່າວ: ປະຊາຊົນ