ຂປລ. ປະຊາຊົນບ້ານອາຊິງໃຕ້ ເມືອງສະໝ້ວຍ ແຂວງສາລະວັນ ທີ່ປະສົບອັກຄີໄພ ຍັງໄດ້ຮັບການຊ່ວຍເຫລືອຢ່າງຕໍ່ເນື່ອງ ຈາກຫລາຍພາກສ່ວນທັງພາກລັດ, ເອກະຊົນ, ບໍລິສັດ, ຫ້າງຮ້ານຕ່າງໆທັງພາຍ ໃນແຂວງ, ຕ່າງແຂວງໃນທົ່ວປະເທດ ໂດຍສະເພາະ ແມ່ນເຂົ້າສານ, ອາຫານແຫ້ງ, ເຄື່ອງນຸ່ງຫົ່ມ, ເຄື່ອງຄົວເຮືອນ ແລະ ອື່ນໆ ເພື່ອຊ່ວຍບັນເທົ່າທຸກ ແກ່ຄອບຄົວທີ່ໄດ້ຮັບຜົນກະທົບໃນຄັ້ງນີ້.
ໃນທ້າຍອາທິດຜ່ານມາ ຢູ່ຫ້ອງການປົກຄອງ ເມືອງສະໝ້ວຍ ບໍລິສັດຈະເລີນສະຫວັນ ກໍ່ສ້າງຂົວທາງຈຳກັດ ຮ່ວມກັບ ສິດເກົ່າໂຮງຮຽນອຸດົມເອກ 4 ແຂວງສະຫວັນນະເຂດ ແລະ ທະນາຄານຮ່ວມ ພັດທະນາ (JDB) ໜ່ວຍບໍລິການສາລະວັນ ກໍໄດ້ນຳເອົາເຄື່ອງ ແລະ ເງິນຊ່ວຍເຫລືອເປັນຕົ້ນ ເຂົ້າສານ, ອາຫານແຫ້ງ, ເຄື່ອງນຸ່ງຫົ່ມ, ເຄື່ອງຄົວເຮືອນ ແລະ ອື່ນໆ ລວມມູນຄ່າ 24 ລ້ານກວ່າກີບ, ທະນາຄານ ຮ່ວມພັດທະນາ ໜ່ວຍບໍລິການ ແຂວງສາລະວັນ ກໍໄດ້ມອບເງິນ 5 ລ້ານກີບ ແລະ ກຸ່ມຕ່າງໆຈາກແຂວງສະຫວັນນະເຂດ ກໍໄດ້ມອບເຄື່ອງຊ່ວຍເຫລືອ ລວມມູນຄ່າ 38 ລ້ານກວ່າກີບ ແລະ ເງິນຈຳນວນໜຶ່ງມອບໃຫ້ ປະຊາຊົນແຕ່ລະຄອບຄົວ. ໂດຍມອບຜ່ານ ທ່ານ ພູທົງ ຄຳມະນີວົງ ຮອງເຈົ້າແຂວງໆສາລະວັນ, ປະທານຄະນະກໍາມະການຕ້ານແລ້ງ ຕ້ານຖ້ວມຂັ້ນແຂວງ. ຈາກນັ້ນ, ກໍໄດ້ຈັດແບ່ງໃຫ້ແຕ່ ລະຄອບຄົວ ທີ່ປະສົບເຄາະຮ້າຍ ຈຳນວນ 37 ຄອບຄົວ ເພື່ອໃຫ້ເຂົາເຈົ້າບັນເທົາ ຊີວິດການເປັນຢູ່ ໂດຍສະເພາະ ຢູ່ໃນໄລຍະພື້ນຟູບ້ານດັ່ງກ່າວອີກດ້ວຍ.
ແຫລ່ງຂ່າວ: ຂປລ