ຂປລ. ແຂວງສະຫວັນນະເຂດ ​ໄດ້​ຈັດ​ຕັ້ງປະຕິບັດຄຳສັ່ງ ເລກທີ 15/ນຍ ຢ່າງ​ເຂັ້ມ​ງວດ ​ໃນ​ການ​ຕິດຕາມ​ກວດກາ ​ບັນດາໂຮງງານປຸງແຕ່ງໄມ້ ​ແລະ ເຟີນີເຈີທົ່ວ​ແຂວງ​ ມີທັງໝົດ 526 ແຫ່ງ, ໃນນີ້ ມີ ໃບອະນຸຍາດຖືກຕ້ອງພຽງແຕ່ 273 ແຫ່ງ ແລະ ບໍ່ມີໃບອະນຸຍາດ 253 ແຫ່ງ. ສຳລັບໂຮງງານທີ່ມີ ໃບອະນຸຍາດຖືກຕ້ອງນັ້ນ ໂດຍຜ່ານການກວດກາດັດສົມ ມີໂຮງງານທີ່ໃຫ້ສືບຕໍ່ 56 ແຫ່ງ, ໃຫ້ປັບປຸງ 107 ແຫ່ງ, ຢຸດເຊົາຊົ່ວຄາວອີກ 38 ແຫ່ງ ແລະ ໃຫ້ຍຸບເລີກ-ຮື້ຖອນ ຈຳນວນ 74 ແຫ່ງ.

ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ ຜູ້ຊີ້ນຳວຽກງານເສດຖະກິດ ໄດ້ລາຍງານ ຕໍ່ກອງປະຊຸມ ສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ສະຫວັນນະເຂດ ​ໃນ​ບໍ່ດົນ​ມາ​ນີ້ວ່າ: ສຳລັບວຽກງານກວດກາໄມ້ ເຫັນວ່າມີໄມ້ຄ້າງສະໜາມ II ຈຳນວນ 6.344 ກວ່າແມັດ ກ້ອນ, ສົ່ງໃຫ້ພະແນກ ອຸດສາຫະກຳ-ການຄ້າ ແຂວງຈຳນວນ 4.828 ກວ່າແມັດກ້ອນ, ຂາຍອອກ 2.634 ກວ່າແມັດກ້ອນ ຄິດເປັນເງິນ 3,4 ຕື້ກວ່າກີບ ແລະ ໄດ້ສຳລະເຂົ້າງົບປະມານ ເປັນທີ່ຮຽບຮ້ອຍ.

ພ້ອມ​ນັ້ນ ຍັງ​ກວດ​ພົບໄມ້ຄ້າງສະໜາມ III ຢູ່ໂຮງງານ 129 ແຫ່ງ ເປັນໄມ້ແປຮູບຈຳນວນ 50.225 ກວ່າແມັດກ້ອນ, ໃນນັ້ນ ເປັນໄມ້ທີ່ມີເອກະສານ ແຫລ່ງທີ່ມາຖືກຕ້ອງຈຳນວນ 47.595 ກວ່າ ແມັດກ້ອນ ​ແລະ ບໍ່ມີເອກະສານແຫລ່ງທີ່ມາ (ໄມ້ຜິດລະບຽບ) ຈຳນວນ 2.630 ກວ່າແມັດກ້ອນ ​ເຊິ່ງ​ເປັນ​ໄມ້​ຂອງ 87 ໂຮງງານ ແລະ ໄມ້ຈຳນວນດັ່ງກ່າວ ກໍ່ໄດ້ຢຶດເຂົ້າເປັນຂອງລັດ, ທັງ​ໄດ້​ເຊີນຜູ້ປະ ກອບ ການທັງໝົດ ມາສຶກສາອົບຮົມຕັກເຕືອນ ແລະ ເຮັດບົດບັນທຶກ, ພ້ອມຄິດໄລ່ຄ່າປັບໄໝ ແລະ ພັນທະໄມ້ ແຕ່​ເຈົ້າ​ຂອງ​ ໂຮງງານດ່ັງກ່າວ ໄດ້ມາພົບຄະນະກຳມະການ 81 ໂຮງງານ ​ເພື່ອອອກໃບສັ່ງ ມອບເງິນ ປັບໄໝ, ໃບຄິດໄລ່ເສຍພັນທະມອບ ແລະ ມອບເງິນແລ້ວ 17 ໂຮງງານ, ລວມມູນຄ່າ 535 ລ້ານ ກວ່າກີບ.

ເຈົ້າໜ້າທີ່ຕິດຕາມກວດກາ​ໄມ້ ຍັງໄດ້ພົບເຫັນການລະເມີດ ລະບຽບປ່າໄມ້, ເຄື່ອງປ່າຂອງດົງ ແລະ ສັດນ້ຳ-ສັດປ່າ ຈຳນວນ 150 ກໍລະນີ, ໃນນີ້ສາມາດຮູ້ຜູ້ກະທຳຜິດ 125 ກໍລະນີ ​ໃນນີ້, ກ່ຽວກັບ ພະນັກງານລັດ 9 ກໍລະນີ ທີ່ເອົາໄມ້ຂຶ້ນລົດ ໄປວາງສະແດງ ຢູ່ນະຄອນດານັງ ສສ.ຫວຽດນາມ ຫລາຍກວ່າ 16 ແມັດກ້ອນ,  ຜູ້ປະກອບການ ໂຮງງານປຸງແຕ່ງໄມ້ 3 ກໍລະນີ, ປະຊາຊົນທົ່ວໄປ 113 ກໍລະນີ ແລະ ຍັງບໍ່ຮູ້ຜູ້ລະເມີດອີກ 25 ກໍລະນີ ​ເຊິ່ງ​ເຈົ້າໜ້າທີ່ສາມາດ ຢຶດພາຫະນະທີ່ນຳໃຊ້ ເຂົ້າໃນເຄື່ອນຍ້າຍ ແລະ ຂຸດຄົ້ນໄມ້ ຈຳນວນ​ຫລາຍຄັນ.

ແຫລ່ງຂ່າວ: ຂປລ