ອີງຕາມລາຍງານຂ່າວຂອງໜັງສືພິມເສດຖະກິດ-ສັງຄົມ ສະບັບວັນທີ 12 ກໍລະກົດ 2017 ໄດ້ໃຫ້ຮູ້ວ່າ ສປປ ລາວ ມີຄວາມຄືບໜ້າໃນການດຳເນີນວຽກງານຕ້ານການຟອກເງິນ ແລະ ສະໜອງທຶນໃຫ້ແກ່ການກໍ່ການຮ້າຍ (AML/CFT) ອົງການຕ້ານການຟອກເງິນສາກົນ (FATF) ໄດ້ຖອດຖອນລາຍຊື່ຂອງ ສປປ ລາວ ອອກຈາກບັນຊີຕິດຕາມ ຫຼື ບັນຊີສີເທົາມາຢູ່ບັນຊີປົກກະຕິ ເຊິ່ງຖືເປັນໝາກຜົນແຫ່ງຄວາມພະຍາຍາມຂອງລັດຖະບານໃນການແກ້ໄຂບັນຫາຕ່າງໆຕາມຂໍ້ແນະນຳຂອງ FATF ໂດຍບົດລາຍງານຜົນການຈັດຕັ້ງປະຕິບັດດັ່ງກ່າວໄດ້ຮັບການແຈ້ງຢ່າງເປັນທາງການໃນກອງປະຊຸມສະໄໝສາມັນ ຄັ້ງທີ II ປະຈຳປີ 2017 ເຊິ່ງຈັດຂຶ້ນຢູ່ທະນາຄານແຫ່ງ ສປປ ລາວ ທີ່ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ປະທານ ຄຕຟງ ແລະ ມີບັນດາສະມາຊິກ ຄຕຟງ ເຂົ້າຮ່ວມຢ່າງພ້ອມພຽງ.
ຜູ້ເຂົ້າຮ່ວມປະຊຸມໄດ້ຮັບຊາບເຖິງຄວາມຄືບໜ້າໃນການຈັດຕັ້ງປະຕິບັດວຽກງານທີ່ຜ່ານມາກໍຄືມະຕິຂອງກອງປະ ຊຸມສະໄໝສາມັນ ຄັ້ງທີ I ແລະ ປຶກສາຫາລືບາງບັນຫາຂໍ້ບົກຜ່ອງທີ່ຍັງຄົງຄ້າງ ພ້ອມທັງ ແຜນການໃນຕໍ່ໜ້າຂອງ ສປປ ລາວ ກ່ຽວກັບການຈັດຕັ້ງປະຕິບັດວຽກງານການຕ້ານການຟອກເງິນ ແລະ ສະໝອງທຶນໃຫ້ແກ່ການກໍ່ການຮ້າຍ ຢ່າງໃດກໍດີ ມາຮອດປັດຈຸບັນນີ້ ຄຕຟງ ແມ່ນມີຄວາມຄືບໜ້າໃນການປະຕິບັດວຽກງານດັ່ງກ່າວ ສະແດງອອກທີ່ການຖືກຖອນຊື່ອອກຈາກບັນຊີສີເທົາຂອງອົງການຕ້ານການຟອກເງິນສາກົນ ມາຢູ່ບັນຊີປົກກະຕິໄດ້ ເຊິ່ງມະຕິດັ່ງກ່າວມີຂຶ້ນໃນກອງປະຊຸມຄົບຄະນະປະຈຳເດືອນມິຖຸນາ 2017 ທີ່ປະເທດແອັດສະປາຍ ທີ່ຈັດຂຶ້ນເມື່ອວັນທີ 23 ມິຖຸນາ 2017 ວ່າດ້ວຍການຈັດຕັ້ງປະຕິບັດການປະເມີນຄວາມສ່ຽງລະດັບຊາດກ່ຽວກັບການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍ (NRA) ການຮ່ວມມືສາກົນ ການສ້າງຍຸດທະສາດວຽກງານ ແລະອື່ນໆ.
ຢ່າງໃດກໍດີ ພາຍຫຼັງທີ່ ສປປ ລາວ ໄດ້ຖືກຖອນຊື່ອອກຈາກບັນຊີຕິດຕາມ (ບັນຊີສີເທົາ) ຂອງອົງການ FATF ແລ້ວ ກໍຍັງຈະຕ້ອງສືບຕໍ່ການຈັດຕັ້ງປະຕິບັດວຽກງານທີ່ຕິດພັນກັບການປະເມີນຄວາມສ່ຽງລະດັບຊາດກ່ຽວກັບການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍ ໂດຍໄດ້ຮັບການຮ່ວມມື ແລະ ຊ່ອຍເຫຼືອດ້ານວິຊາການຈາກທະນາຄານໂລກ ເຊິ່ງໄດ້ສຳເລັດການດຳ ເນີນງານໄລຍະທີ 1 ແລະ ພວມກ້າວເຂົ້າສູ່ໄລຍະທີ 2 ໂດຍຄາດວ່າການປະເມີນດ່ັງກ່າວຈະສຳເລັດໃນທ້າຍປີ 2018.
ສຳລັບຜົນການປະເມີນຄວາມສ່ຽງແມ່ນຖືເປັນຂໍ້ມູນສຳຄັນໃນການສ້າງຍຸດທະສາດກ່ຽວກັບວຽກງານຕ້ານການຟອກເງິນ ແລະສະໜອງທຶນໃຫ້ແກ່ການກໍ່ການຮ້າຍ ຈຸດປະສົງຂອງວຽກງານນີ້ກໍເພື່ອຮັບປະກັນບໍ່ໃຫ້ ສປປ ລາວ ຕົກຢູ່ໃນການຕິດຕາມຂອງສາກົນກ່ຽວກັບວຽກງານ AML/CFT ແລະ ເພື່ອກະກຽມໃຫ້ແກ່ການປະເມີນ ສປປ ລາວ ຮອບດ້ານກ່ຽວກັບວຽກງານຕ້ານການຟອກເງິນ ແລະສະໜອງທຶນໃຫ້ແກ່ການກໍ່ການຮ້າຍ ໃນປີ 2020.
ຜົນການຈັດຕັ້ງປະຕິບັດວຽກງານ AML/CFT ທີ່ຍົກມາຂ້າງເທິງນັ້ນ ແມ່ນນຶ່ງໃນຄວາມຄືບໜ້າຂອງ ສປປ ລາວ ເຊິ່ງການຈັດຕັ້ງປະຕິບັດວຽກງານດັ່ງກ່າວແມ່ນມີສ່ວນສຳຄັນໃນການຂັບເຄື່ອນລະບົບເສດຖະກິດ-ການເງິນ ໃຫ້ມີຄວາມເປັນລະບຽບຮຽບຮ້ອຍ ເຂັ້ມແຂງ ໝັ້ນຄົງ ແລະ ສາມາດເຊື່ອມໂຍງກັບພາກພື້ນ ແລະສາກົນ ທັງໃນປັດຈຸບັນ ແລະອະນາຄົດ.
ຮຽບຮຽງຂ່າວໂດຍ: ສ.ບົວພາ