ສຳນັກຂ່າວຕ່າງປະເທດ ລາຍງານໃນວັນທີ 17 ກໍລະກົດຜ່ານມານີ້ວ່າ ອິນເດຍໄດ້ເປີດໂຕລົດໄຟກາຊວນ ຂະໜາດ 1,600 ແຮງມ້າ ທີ່ຂັບເຄື່ອນດ້ວຍພະລັງງານແສງຕາເວັນ ໂດຍຂະບວນທຳອິດ ແມ່ນໄດ້ເລີ່ມເປີດແລ່ນໃນນະຄອນຫລວງນີວແດນລີ ເມືອງຫລວງຂອງປະເທດ.  ລົດໄຟດັ່ງກ່າວ ປະກອບດ້ວຍ 6 ຕູ້ໂດຍສານ, ເຊິ່ງຕິດຕັ້ງແຜງໂຊລາເຊວຢູ່ເທິງຫລັງຄາ ແຕ່ລະຕູ້ຈຳນວນ 16 ແຜງ ແລະ ຈະມີລະບົບໄຟຟ້າ ພ້ອມທັງພັດລົມຕິດຕັ້ງໄວ້ພ້ອມ.

ນອກຈາກນີ້ ຍັງມີພະລັງງານສຳຮອງ ທີ່ສາມາດແລ່ນໂດຍໃຊ້ໄຟແບດເຕີຣີອີກຢ່າງນ້ອຍ 72 ຊົ່ວໂມງ ແລະ ຈະບໍລິການ ຜູ້ໂດຍສານຈາກສະຖານີຊາຣາຍໂຣຮີນລາ ໃນນະຄອນຫລວງນີວແດນລີ ໄປຍັງເຂດຊຸມຊົນທາງຄາຣຮີຮາຣຊາຣູ ໃນລັດຮາຍານາ ທາງຕອນເໜືອຂອງປະເທດ.