ຂປລ. ໃນວັນທີ 17 ກໍລະກົດ 2017, ໄດ້ມີການເປີດງານວາງສະແດງຮູບພາບ ຄວາມສວຍງາມຂອງປະເທດຊາດ ແລະ ຂອງຄົນລາວ ຢູ່ນະຄອນຫລວງຮ່າໂນ້ຍ ສສ ຫວຽດນາມ ເຊິ່ງໄດ້ມີການນຳສະເໜີ ມູນເຊື້ອມິດຕະພາບຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງຊາດ ລາວ-ຫວຽດນາມ. ພ້ອມຮູບພາບ ກ່ຽວກັບຜົນສຳເລັດ ໃນການປົກປັກຮັກສາ ແລະ ພັດທະນາປະເທດຊາດ ໃນໄລຍະຜ່ານມາ, ນັບທັງທັດຊະນີຍະພາບດ້ານທຳມະຊາດ ແລະມູນເຊື້ອທາງວັດທະນະທຳຂອງ ສປປ ລາວ.
ງານວາງສະແດງຮູບພາບຄັ້ງນີ້, ມີ ທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫລງ ຂ່າວ, ວັດທະນະທຳ ແລະ ທ່ອງທ່ຽວ, ທ່ານ ເລ ແຄ້ງຫາຍ ຮອງລັດຖະມົນຕີກະຊວງວັດທະນະທຳ ກິ ລາ ແລະ ທ່ອງທ່ຽວ ສສ ຫວຽດນາມ, ພ້ອມພະນັກກ່ຽວຂ້ອງສອງຝ່າຍເຂົ້າຮ່ວມ.
ໃນໂອກາດນີ້, ທ່ານ ບົວເງິນ ຊາພູວົງ ກ່າວວ່າ: ລາວ-ຫວຽດນາມ ພວມດຳເນີນການຈັດຕັ້ງສະເຫລີມສະຫລອງ 2 ວັນປະຫວັດສາດ ກໍຄື ງານສັບປະດາວັດທະນະທຳ ແລະ ທ່ອງທ່ຽວລາວ ຢ່າງຟົດ ຟື້ນດ້ວຍຫລາກຫລາຍກິດຈະກຳ. ລາວ-ຫວຽດນາມ ມີແມ່ນ້ຳລຳເຊ ແລະ ສາຍພູຫລວງຕິດຈອດກັນຕາມທຳມະຊາດ ແຕ່ເໜືອຕະຫລອດໃຕ້, ປະຊາຊົນສອງຊາດເຄີຍຮ່ວມສຸກຮ່ວມທຸກ ແລະ ຊ່ວຍເຫລືອເຊິ່ງກັນ ແລະ ກັນ ໃນການຕໍ່ສູ້ກູ້ຊາດ ເພື່ອຍາດເອົາເອກະລາດ, ອິດສາລະພາບ ແລະ ປົດປ່ອຍປະເທດຊາດ ໃນເມື່ອກ່ອນ ກໍຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃນປັດຈຸບັນ.ສອງຊາດໄດ້ໄດ້ພ້ອມກັນ ສູ້ຊົນພັດທະນາເສດຖະກິດ-ສັງຄົມ ເພື່ອຍົກລະດັບຊີວິດການເປັນຢູ່ຂອງປະຊາຊົນ ໃຫ້ດີຂຶ້ນເປັນກ້າວໆ ຕາມຄຳຂວັນທີ່ວ່າ: “ປະຊາຊົນຮັ່ງມີຜາສຸກ ປະເທດຊາດມັ່ງຄັ່ງເຂັ້ມແຂງ ສັງຄົມມີຄວາມສາມັກຄີປອງດອງ ປະຊາທິປະໄຕ ຍຸຕິທຳ ແລະ ສີວິໄລ, ພ້ອມທັງຮ່ວມມືກັນຍົກສູງບົດບາດໃນເວທີພາກພື້ນ ແລະ ສາກົນຢ່າງຕັ້ງໜ້າ.
ປະຊາຊົນລາວບັນດາເຜົ່າ ຍາມໃດກໍມີຄວາມຮັບຮູ້ບຸນຄຸນ ຕໍ່ການຊ່ວຍເຫລືອອັນລ້ຳຄ່າ ນັບທັງເຂົ້າເມັດຫັກຜັກເສັ້ນໜຶ່ງ ກໍແບ່ງປັນກັນກິນຕະຫລອດເຖິງຊີວິດ ແລະ ເລືອດເນື້ອຂອງປະຊາຊົນຫວຽດນາມອ້າຍນ້ອງ ທີ່ມີຕໍ່ການປະຕິວັດຊາດລາວຕະຫລອດມາ. ພວກເຮົາຕ້ອງພ້ອມກັນສຶກສາອົບຮົມມູນເຊື້ອມິດຕະພາບ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງຊາດ ລາວ-ຫວຽດນາມ ໃຫ້ແກ່ຄົນຮຸ່ນຫລັງໄດ້ຈົດຈຳ ແລະ ສຶກສາຄົ້ນຄ້ວາທັງປົກປັກຮັກສາ ແລະ ເສີມຂະຫຍາຍມູນເຊື້ອດັ່ງກ່າວໃຫ້ຍືນຍົງຕະຫລອດໄປ.
ແຫລ່ງຂ່າວ: ຂປລ