ຂປລ. ສູນກາງສະຫະພັນ ກຳມະບານລາວ ເປີດໃຫ້ບໍລິການ ເບີໂທລະສັບສາຍດ່ວນ 1512 ແລະ ສື່ທາງເຟສບຸກ (Facebook) ໂດຍອີງຕາມກົດໝາຍວ່າດ້ວຍ ກຳມະບານລາວ ສະບັບເລກທີ 106/ ສພຊ ລົງວັນທີ 27/12/2016 ແລະ ການອະນຸມັດ ເບີສາຍດ່ວນ 4 ຕົວເລກ 1512 ຈາກກົມໂທລະສັບກະຊວງໄປສະນີ ໂທລະຄົມມະນາຄົມ ແລະ ການສື່ສານ ສະບັບເລກທີ 197/ກທລ, ລົງວັນທີ 10/2/2017 ເພື່ອໃຫ້ຄຳປືກສາແກ່ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານ.
ທ່ານ ສີມູນ ອຸ່ນລາສີ ຮອງປະທານ ສູນກາງສະຫະພັນກຳມະບານລາວ ໄດ້ກ່າວໃນງານຖະແຫລ່ງຂ່າວ ເປີດໃຫ້ບໍລິການເບີໂທດັ່ງກ່າວ, ໃນວັນທີ 17 ກໍລະກົດນີ້ ຢູ່ນະຄອນຫລວງວຽງຈັນວ່າ: ຈຸດປະສົງ ໃນການເປີດໃຫ້ບໍລິການນີ້ ເພື່ອໃຫ້ມີຄວາມສະດວກ, ວ່ອງໄວ ແລະ ທັນສະໄໝ ແທດເໝາະກັບຍຸກການສື່ສານທີ່ບໍ່ມີພົມແດນ ໃຫ້ແກ່ສະມາຊິກກຳມະບານລາວ, ກຳມະກອນລາວ ແລະ ຊາວຜູ້ອອກແຮງງານໃນທົ່ວປະເທດ ໄດ້ເຂົ້າເຖິງວຽກງານກຳມະບານ, ວຽກງານແຮງງານ, ສາຍພົວພັນແຮງງານທີ່ດີ ເພື່ອຕອບຂໍ້ຂ້ອງໃຈ, ໃຫ້ຄຳແນະນຳທີ່ຖືກຕ້ອງ ແລະ ໃຫ້ການຊ່ວຍເຫລືອ ໂດຍສອດຄ່ອງກັບກົດໝາຍແຫ່ງລັດຂອງ ສປປ ລາວ ເປັນຕົ້ນ ກົດໝາຍແຮງງານ, ກົດໝາຍກຳມະບານລາວ, ກົດໝາຍປະກັນສັງຄົມ, ກົດໝາຍຕ້ານການຄ້າມະນຸດ ແລະ ບັນດານິຕິກຳຕ່າງໆ ທີ່ກ່ຽວຂ້ອງກັບການປົກປ້ອງສິດ, ຜົນປະໂຫຍດອັນຊອບທຳຂອງສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານ.
ທ່ານ ສີມູນ ອຸ່ນລາສີ ກ່າວຕື່ມວ່າ: ສຳລັບເບີໂທສາຍດ່ວນ 1512 ມີຄວາມໝາຍວ່າ 15 ໝາຍເຖິງວັນສ້າງຕັ້ງວັນກຳມະກອນສາກົນ (ວັນທີ 1ພຶດສະພາ), 12 ໝາຍເຖິງວັນສ້າງຕັ້ງ ອົງການກຳມະ ານລາວ (ວັນທີ 1 ກຸມພາ), ເຊິ່ງສາມາດໂທເຂົ້າໄດ້ທຸກເຄືອຄ່າຍຂອງລະບົບໂທລະສັບໂດຍບໍ່ເສຍຄ່າ ແຕ່ວັນຈັນ–ສຸກ ນັບແຕ່ເວລາ 8:00–16:00. ພ້ອມນີ້, ຍັງສາມາດຕິດຕໍ່ເບິ່ງຂໍ້ມູນ, ມີຄຳເຫັນ ຫລື ຕັ້ງຄຳຖາມ ເພື່ອສອບຖາມກ່ຽວກັບ ວຽກງານດ້ານແຮງງານ ແລະ ກຳມະບານຜ່ານທາງ Facebook ຂອງສູນກາງສະຫະພັນ ກຳມະບານລາວ ຕະຫລອດ 24 ຊົ່ວໂມງ ໂດຍພິມຄຳວ່າ ສູນກາງສະຫະພັນ ກຳມະບານລາວ ເຂົ້າໃນໂປແກມ Facebook.
ແຫລ່ງຂ່າວ: ຂປລ