ສຳນັກຂ່າວຕ່າງປະເທດ ລາຍງານໃນວັນທີ 16 ກໍລະກົດຜ່ານມານີ້ວ່າ ມຽນມາສ້າງລາຍຮັບຈາກການສົ່ງອອກອັນຍະມະນີ (ຢົກ) ໄດ້ 23 ລ້ານໂດລາ ໃນໄລຍະໄຕມາດທຳອິດຂອງສົກປີງົບປະມານ 2017-2018 ເພີ່ມຂຶ້ນ 746,000 ໂດລາ ເມື່ອທຽບກັບໄລຍະດຽວກັນຂອງປີກາຍນີ້ ໂດຍຜະລິດຕະພັນສ່ວນໃຫຍ່ຖືກສົ່ງອອກໄປຂາຍຢູ່ຈີນ ແລະ ອິນເດຍ, ຕາມສະຖິຕິຂອງທາງການ ສະເພາະປີງົບປະມານ 2016-2017 ມຽນມາສົ່ງອອກກ້ອນຢົກໄດ້ຫລາຍກວ່າ 11,000​ ໂຕນ ລວມມູນຄ່າເຖິງ 246 ລ້ານໂດລາ ໃຫ້ແກ່ປະເທດເພື່ອນບ້ານ ໂດຍສະເພາະໃນປະເທດຈີນ.

ທັງນີ້ ລັດຖະບານມຽນມາ ໄດ້ສະໜັບສະໜູນໃຫ້ຜູ້ປະກອບການພາຍໃນ ດຳເນີນການແປຮູບຜະລິດຕະພັນຟົກ ແທນການຂາຍກ້ອນຢົກດິບອອກຂາຍ ເພື່ອອະນຸລັກຊັບພະຍາກອນທຳມະຊາດ ແລະ ທັງເປັນການເກັບລາຍຮັບຈາກພາສີອາກອນ ໄດ້ຫລາຍຂຶ້ນກວ່າເກົ່າ.