ສຳນັກຂ່າວຕ່າງປະເທດ ລາຍງານໃນວັນທີ 14 ກໍລະກົດນີ້ວ່າ ຄະນະກຳມະການຄຸ້ມຄອງ ແລະ ປ້ອງກັນໄພພິບັດແຫ່ງຊາດຫວຽດນາມ ໄດ້ລະບຸ ມີປະຊາຊົນເສຍຊີວິດຢ່າງໜ້ອຍ 14 ຄົນ ແລະ ເຮືອນຊານປະຊາຊົນເສຍຫາຍ ປະມານ 500 ຫລັງ ຈາກເຫດນ້ຳຖ້ວມກະທັນຫັນ ອັນເນື່ອງມາຈາກຝົນຕົກໜັກ ໃນພື້ນທີ່ 9 ແຂວງທາງພາກເໜືອຂອງປະເທດ ໃນໄລຍະໜຶ່ງອາທິດຜ່ານມາ ຊຶ່ງຄາດການອີກວ່າ ຝົນຍັງຈະສືບຕໍ່ຕົກເພີ່ມອີກ.

ນອກຈາກນັ້ນ, ໄພພິບັດໃນຄັ້ງນີ້ ຍັງສົ່ງຜົນເຮັດໃຫ້ເກີດດິນເຈື່ອນ ແລະ ລະບົບລະບາຍນ້ຳເປ່ເພ, ຂົວ ແລະ ຫົນທາງເສຍຫາຍ ລວມມູນຄ່າຫລາຍກວ່າ 40 ຕື້ດົງ ຫລື ປະມານ 1.76 ລ້ານໂດລາ ອີກດ້ວຍ.