ສຳນັກຂ່າວຕ່າງປະເທດ ລາຍງານໃນວັນທີ 13 ກໍລະກົດຜ່ານມານີ້ວ່າ ລົດເມໂດຍສານສາທາລະນະຂະໜາດນ້ອຍ ແບບໄຮ້ຄົນຂັບ EZ10 ໄດ້ທົດລອງແລ່ນເປັນຄັ້ງທຳອິດ ຢູ່ພາຍໃນວິທະຍາເຂດຂອງ ມະຫາວິທະຍາໄລແຫ່ງຊາດໄຕ້ຫວັນ ຊຶ່ງລົດເມຂະໜາດນ້ອຍດັ່ງກ່າວນີ້ ບັນທຸກຜູ້ໂດຍສານສູງສຸດໄດ້ເຖິງ 15 ຄົນ, ພາຍໃນມີບ່ອນນັ່ງ 6 ບ່ອນ ແລະ ມີພື້ນທີ່ວ່າງສຳລັບຄົນຢືນໄດ້ອີກ 9 ຄົນ ໂດຍລົດເມດັ່ງກ່າວນີ້ ໃຊ້ພະລັງງານໄຟຟ້າ ແລ່ນດ້ວຍຄວາມໄວສູງສຸດ 40 ກິໂລແມັດຕໍ່ຊົ່ວໂມງ ແລະ ພາຍໃນລົດຈະມີປຸ່ມກົດຕ່າງໆ ທີ່ຜູ້ໂດຍສານຈະເປັນຜູ້ກົດເອງ ຫາກຕ້ອງການຈອດລົດ ຫລື ເປີດ-ປິດປະຕູລົດ.

ໃນລະຫວ່າງການທົດສອບ ໄດ້ມີການທົດລອງໃຫ້ນັກສຶກສາຄົນໜຶ່ງ ຍ່າງອອກມາຕັດໜ້າລົດເມຄັນດັ່ງກ່າວ ໂດຍທັນໃດນັ້ນລົດກໍຈະຫລຸດຜ່ອນຄວາມໄວລົງ ຈົນກວ່າຈະມີຄົນຍ່າງຜ່ານໄປ ຈຶ່ງຈະສືບຕໍ່ແລ່ນຕາມປົກກະຕິ, ທາງການໄຕ້ຫວັນ ວາງແຜນຈະນຳເອົາລົດເມດັ່ງກ່າວນີ້ ເຂົ້າໃຫ້ບໍລິການໃນຫລາຍໆສະຖານທີ່ໃນທ້າຍປີໜ້າ ໂດຍທຳອິດຈະແລ່ນບໍລິການຕາມສະຖາບັນການສຶກສາ ແລະ ຈະໃຊ້ສຳລັບການເຊື່ອມຕໍ່ລະບົບຂົນສົ່ງສາທາລະນະ.