ສຳນັກຂ່າວຣອຍເຕີ້ ລາຍງານໃນວັນທີ 14 ກໍລະກົດນີ້ວ່າ ວິກິດການທູດໃນອາຊີຕາເວັນອອກກາງ ຍັງບໍ່ທັນຈົບລົງງ່າຍໆ ຫລັງຈາກທີ່ 4 ຊາດພັນທະມິດຂອງອາຣັບບີ ຊາອຸດິດ ຍັງຈະສືບຕໍ່ພ້ອມໃຈກັນຂວ້ຳບາດກາຕາຕໍ່ໄປເລື້ອຍໆ ຈົນກວ່າອີກຝ່າຍໜຶ່ງຈະມີການປ່ຽນແປງພຶດຕິກຳ, ທ່ານ ອັນວາ ອັນ-ກາກາດ ລັດຖະມົນຕີການຕ່າງປະເທດ ສະຫະລັດອາຣັບເອມິເຣດ ໄດ້ໂພສຕ໌ຂໍ້ຄວາມລົງທາງທະວິດເຕີ້ສ່ວນຕົວຂອງຕົນວ່າ ພວກເຮົາກຳລັງມຸ່ງໄປສູ່ການຕັດສຳພັນທີ່ຍາວນານ ວິທີແກ້ບັນຫາທາງການເມືອງ ຊຶ່ງຕ້ອງລວມເຖິງການປ່ຽນແປງພຶດຕິກຳຂອງຝ່າຍກາຕາ ເບິ່ງແລ້ວຈະຍັງອີກຍາວນານຫລາຍ, ດັ່ງນັ້ນ ຈະຍັງບໍ່ມີຫຍັງປ່ຽນແປງ ແລະ ເຮົາຄົງຕ້ອງເບິ່ງການປະຕິສຳພັນໃນຮູບແບບອື່ນ.

ຄຳຖະແຫລງດັ່ງກ່າວຂອງສະຫະລັດອາຣັບເອມິເຣດ ໄດ້ສະແດງໃຫ້ເຫັນວ່າ ວິກິດການທາງການທູດຄັ້ງນີ້ຍັງໄຮ້ສັນຍານທາງອອກ ຫລັງຈາກທີ່ ທ່ານ ເຣັກ ທິນເລີສັນ ລັດຖະມົນຕີການຕ່າງປະເທດ ສະຫະລັດອາເມຮິກາ ສຳເລັດການເດີນທາງຢ້ຽມຢາມພາກພື້ນອາຊີຕາເວັນອອກາງ ເປັນເວລາ 3 ວັນ ເພື່ອຊ່ວຍໄກ່ເກ່ຍຂໍ້ຂັດແຍ່ງດັ່ງກ່າວ ຊຶ່ງວິກິດຂຶ້ນໃນຮອບຫລາຍປີ.

ທັງນີ້ ອາຣັບບີຊາອຸດິດ, ສະຫະລັດອາຣັບເອມິເຣດ, ບາເຣນ ແລະ ເອຢິບ ໄດ້ປະກາດຕັດສຳພັນທາງການທູດກັບກາຕາ ເມື່ອວັນທີ 5 ມິຖຸນາຜ່ານມາ ໂດຍກ່າວຫາວ່າເປັນລັດທີ່ສະໜັບສະໜູນລັດທິກໍ່ການຮ້າຍ ແລະ ຝັກໄຝ່ອີຣ່ານ ຊຶ່ງເປັນຄຳກ່າວຫາທີ່ຝ່າຍກາຕາ ປະຕິເສດມາໂດຍຕະຫລອດ.