ຂປລ. ວັນທີ 13 ກໍລະກົດ 2017 ທີ່ນະຄອນຫລວງວຽງຈັນ, ທ່ານ ຄິໂຢຊິ ໂອດາວາຣະ (Mr. Kiyoshi ODAWARA), ສະມາຊິກສະພາຕ່ຳ ຮອງລັດຖະມົນຕີ ກະຊວງການຕ່າງປະເທດຝ່າຍລັດຖະສະພາຍີ່ປຸ່ນ ໄດ້ພົບປະກັບ ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ໃນໂອກາດ ເດີນທາງມາຢ້ຽມຢາມ ສປປ ລາວ ລະຫວ່າງວັນທີ 12-13 ກໍລະກົດ 2017.
ການພົບປະສອງຝ່າຍ ໄດ້ພ້ອມກັນຕີລາຄາ ແລະ ປຶກສາຫາລື ເພື່ອສືບຕໍ່ຈັດຕັ້ງປະຕິບັດແຜນການຮ່ວມມືລະຫວ່າງສອງປະເທດ ເພື່ອພັດທະນາ ສປປ ລາວ ແບບຍືນຍົງ ປັດຈຸບັນ ສປປ ລາວ ແລະ ຍີ່ປຸ່ນ ພວມຈັດຕັ້ງປະຕິບັດແຜນການ ຮ່ວມມືດັ່ງກ່າວ ຄຽງຄູ່ກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 8 ຂອງ ສປປ ລາວ, ແລະ ຈະຈັດກອງປະຊຸມປຶກສາຫາລືສອງຝ່າຍ ກ່ຽວກັບຄວາມໝັ້ນຄົງລະຫວ່າງ ສປປ ລາວ ແລະ ຍີ່ປຸ່ນຄັ້ງທີ 2 ຂຶ້ນໃນຕໍ່ໜ້າ.
ທ່ານ ນາງ ຄໍາເພົາ ເອີນທະວັນ ໄດ້ສະເໜີໃຫ້ສອງກະຊວງການຕ່າງປະເທດ ລາວ-ຍີ່ປຸ່ນ ມີການຮ່ວມມືກັນ ຫຼາຍຂຶ້ນກວ່າເກົ່າ, ໂດຍສະເພາະການຈັດໂຄງການຮ່ວມມື ເພື່ອແລກປ່ຽນບົດຮຽນເຊັ່ນ: ການຈັດຝຶກອົບຮົມໃຫ້ແກ່ນັກການທູດ ໜຸ່ມນ້ອຍຂອງ ສປປ ລາວ ແລະ ອື່ນໆເພື່ອຮັບໃຊ້ການພົວພັນຮ່ວມມືຂອງສອງປະເທດ ທີ່ນັບມື້ນັບຫລາຍຂຶ້ນ. ນອກຈາກນັ້ນ, ສອງຝ່າຍ ຍັງໄດ້ປຶກສາຫາລືແລກປ່ຽນຄຳຄິດເຫັນ ໃນບັນຫາພາກພຶ້ນ ແລະ ສາກົນ ທີ່ສອງຝ່າຍ ມີຄວາມສົນໃຈຮ່ວມກັນ.
ໃນໂອກາດດັ່ງກ່າວ,ທ່ານ ນາງ ຄຳເພົາ ເອີນທະວັນ ໄດ້ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ຍີ່ປຸ່ນ ທີ່ນັບມື້ນັບໄດ້ ຮັບການພັດທະນາ ແລະ ຂະຫຍາຍຕົວຂຶ້ນເລື້ອຍໆ ພາຍໃຕ້ການເປັນຄູ່ຮ່ວມມືຍຸດທະສາດ ແລະ ໄດ້ສະແດງຄວາມຂອບໃຈ ແລະ ຮູ້ບຸນຄຸນຕໍ່ການຊ່ວຍເຫຼືອ ທາງການເພື່ອການພັດທະນາ (ODA) ຂອງຍີ່ປຸ່ນ ໃນໄລຍະຜ່ານມາ,ຊຶ່ງເປັນການປະກອບສ່ວນສຳຄັນ ເຂົ້າໃນແຜນພັດທະນາ ເສດຖະກິດ–ສັງຄົມຂອງ ສປປ ລາວ, ໂດຍສະເພາະ ແມ່ນໂຄງການ ພັດທະນາຊັບພະຍາກອນມະນຸດ (JDS) ສຳລັບສົກປີ 2017-2018 ທີ່ສອງປະເທດໄດ້ລົງນາມ ເອກະສານແລກປ່ຽນຮ່ວມກັນ ໃນເດືອນມິຖຸນາ ທີ່ຜ່ານມາ. ພ້ອມນັ້ນ, ທ່ານຮອງລັດຖະມົນຕີ ຍັງສະແດງຄວາມຂອບໃຈ ຕໍ່ທ່ານ ຄິໂຢຊິ ໂອດາວາຣະ ທີ່ໄດ້ໃຫ້ກຽດຂຶ້ນປາຖະກະຖາຕໍ່ ພະນັກງານກະຊວງການຕ່າງປະເທດລາວ ພາຍໃຕ້ຫົວຂໍ້ “ການທູດແບບພິເສດ”, ທີ່ສູນການຮ່ວມມືສາກົນ ແລະ ການຝຶກອົບຮົມ (ICTC) ເຊິ່ງຈັດຮ່ວມໂດຍ ສະຖາບັນການຕ່າງປະເທດລາວ ແລະ ສະຖານທູດຍີ່ປຸ່ນ ປະຈໍາ ສປປ ລາວ.
ໃນໂອກາດນີ້, ທ່ານຮອງລັດຖະມົນຕີ ຕ່າງປະເທດຍີ່ປຸ່ນກໍໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນຂອງຝ່າຍລາວ ໃນການເຄື່ອນໄຫວຢ້ຽມຢາມ ສປປ ລາວ ຄັ້ງນີ້ ຂອງທ່ານ ແລະ ຕີລາຄາສູງ ຕໍ່ການຊຸກຍູ້ສົ່ງເສີມການ ຮ່ວມມືລະຫວ່າງ ສອງປະເທດລາວ-ຍີ່ປຸ່ນ ເພື່ອເປັນການປະກອບສ່ວນ ເຂົ້າໃນການພັດທະນາ ເສດຖະກິດ-ສັງຄົມຂອງ ສປປ ລາວ ໃຫ້ມີປະສິດທິຜົນ.
ໃນໂອກາດຢ້ຽມຢາມ ສປປ ລາວ ໃນຄັ້ງນີ້, ນອກຈາກ ທ່ານ ຄິໂຢຊິ ໂອດາວາຣະໄດ້ຂຶ້ນປາຖະກະຖາແລ້ວ, ທ່ານຍັງໄດ້ເຂົ້າຮ່ວມ ພິທີມອບ-ຮັບໂຮງຮຽນ ມັດຖະຍົມ ສົມບູນນ້ຳສັງ, ເມືອງສັງທອງ, ນະຄອນຫຼວງວຽງຈັນ ເຊິ່ງເປັນໂຄງການຊ່ວຍເຫລືອລ້າ ຈາກລັດທະບານ ແລະ ປະຊາຊົນຢີປຸ່ນ, ມູນຄ່າ 78,724 ໂດລາສະຫະລັດ.
ແຫລ່ງຂ່າວ: ຂປລ