ປລ. ໃນວັນທີ 13 ກໍລະກົດ 2017 ນີ້ ທີ່ນະຄອນຫລວງວຽງຈັນ, ກອງທັບປະຊາຊົນປະຕິວັດລາວ ໄດ້ເປັນເຈົ້າພາບຈັດກອງປະຊຸມ ຫົວໜ້າແພດທະຫານອາຊຽນ ຄັ້ງທີ 7 ແລະ ກອງປະຊຸມແລກປ່ຽນແພດທະຫານໜຸ່ມອາຊຽນ ໂດຍການເປັນປະທານຂອງທ່ານ ພັນເອກ ດຣ ບົວສິງ ອິນທະວົງ ຫົວໜ້າກົມເສນາຮັກ ກົມໃຫຍ່ພະລາທິການ ຂອງກອງທັບປະຊາຊົນລາວ, ມີ ທ່ານ ພົ.ຕ ຄຳສີ ວົງຄຳຊາວ ຫົວໜ້າຫ້ອງວ່າການກະຊວງປ້ອງກັນປະເທດ, ຫົວໜ້າຄະນະກົມເສນາຮັກ ແລະ ຕົວແທນແພດທະຫານໜຸ່ມ ຂອງກອງທັບບັນດາປະເທດສະມາຊິກອາຊຽນກໍໃຫ້ກຽດເຂົ້າຮ່ວມ.
ທ່ານ ພັນເອກ ດຣ ບົວສິງ ອິນທະວົງ ໄດ້ກ່າວວ່າ: ກອງປະຊຸມຫົວໜ້າແພດທະຫານອາຊຽນ ເຕີບໃຫຍ່ຂະຫຍາຍຕົວຢ່າງຕໍ່ເນື່ອງ ນັບແຕ່ໄດ້ຮັບການສ້າງຕັ້ງຂຶ້ນ ໃນປີ 2011 ທີ່ນະຄອນຫລວງຮ່າໂນ້ຍ, ສສ ຫວຽດນາມ ເຊິ່ງບາດກ້າວໃຫມ່ໃນການຮ່ວມມືວຽກງານດັ່ງກ່າວ ໂດຍສະແດງອອກໃນຄວາມເອົາໃຈໃສ່ ແລະ ການປະກອບສ່ວນຢ່າງຕັ້ງໜ້າ ຂອງບັນດາສະຖາບັນແພດທະຫານຂອງປະເທດສະມາຊິກອາຊຽນ ໃນການເປັນເຈົ້າພາບ ແລະ ການເປັນປະທານຈັດກອງປະຊຸມຫົວໜ້າແພດທະຫານອາຊຽນ ແລະ ກິດຈະກຳອື່ນໆ ທີ່ກ່ຽວຂ້ອງ, ກິດຈະກຳເຫລົ່ານີ້ເປັນການປະກອບສ່ວນອັນສຳຄັນ ເຂົ້າໃນການສ້າງຂີດຄວາມສາມາດໃນດ້ານຕ່າງໆ ໂດຍຜ່ານເວທີການປຶກສາຫາລື, ການແລກປ່ຽນຄວາມຮູ້ຄວາມສາມາດ, ການສຶກສາຄົ້ນຄວ້າ ແລະ ປະສົບການ ໃນການພົວພັນຮ່ວມມືແພດທະຫານ.
ພ້ອມນີ້, ທ່ານ ຫົວໜ້າກົມເສນາຮັກ ຍັງໄດ້ກ່າວຕື່ມອີກວ່າ: ກອງປະຊຸມແພດທະຫານອາຊຽນໃນຄັ້ງນີ້ ຈະໄດ້ແລກປ່ຽນທັດສະນະ ກ່ຽວກັບການເສີມສ້າງການຮ່ວມມື ຂອງແພດທະຫານອາຊຽນໃນການຊ່ວຍເຫລືອມະນຸດສະທຳ ແລະ ບັນເທົາທຸກໄພພິບັດ. ໃນປີທີ່ຜ່ານມາ ພາກພື້ນຂອງພວກເຮົາແມ່ນປະເຊີນໜ້າກັບສິ່ງທ້າທາຍ ຕໍ່ຄວາມໝັ້ນຄົງຫລາຍບັນຫາ ໂດຍສະເພາະແມ່ນໄພພິບັດທາງທຳມະຊາດ ເຊິ່ງໄພຂົ່ມຂູ່ດັ່ງກ່າວ ໄດ້ສົ່ງຜົນກະທົບອັນໃຫຍ່ຫລວງຕໍ່ຊີວິດ, ຊັບສິນຂອງປະຊາຊົນ ແລະ ການພັດທະນາເສດຖະກິດ-ສັງຄົມຂອງຊາດ ແລະ ພາກພື້ນ. ອີກດ້ານໜຶ່ງ ການຊ່ວຍເຫລືອມະນຸດສະທຳ ແລະ ການບັນເທົາທຸກໄພພິບັດ ແມ່ນໜຶ່ງ ໃນຂົງເຂດວຽກງານການຮ່ວມມືຂອງກອງປະຊຸມລັດຖະມົນຕີ ປ້ອງກັນປະເທດອາຊຽນ, ອາຊຽນບວກ ແລະ ເວດທີພາກພື້ນອາຊຽນ.
ລະຫວ່າງກອງປະຊຸມໃນຄັ້ງນີ້, ກອງທັບປະຊາຊົນລາວ ໄດ້ນຳສະເໜີ 3 ຫົວບົດ ຄື: ເຫລົ່າຮົບເສນາຮັກຂອງກອງທັບປະຊາຊົນລາວ ແລະ ຄວາມພ້ອມ ໃນການຊ່ວຍເຫລືອມະນຸດສະທຳ ແລະ ການບັນເທົາທຸກໄພພິບັດ; ການເຝົ້າລະວັງພະຍາດໄຂ້ຍຸງລາຍ ໃນນະຄອນຫລວງວຽງຈັນຂອງສະຖາບັນອະນາໄມກັນພະຍາດ ແລະ ສົ່ງເສີມສຸຂະພາບຂອງກອງທັບ; ແລະ ບົດຄົ້ນຄວ້າກ່ຽວກັບການກວດອາຈົມເພື່ອຊອກພະຍາດໃບໄມ້ໃນຕັບ ໃນໂຮງໝໍ 103. ພ້ອມນີ້, ກອງປະຊຸມຫົວໜ້າແພດທະຫານອາຊຽນ ຄັ້ງທີ 8 ແມ່ນປະເທດສິງກະໂປ ຈະໄດ້ເປັນເຈົ້າພາບອັນດັບຕໍ່ໄປ.
ແຫລ່ງຂ່າວ: ຂປລ