ຂປລ. ພະແນກກະສິກຳ ແລະ ປ່າໄມ້ ນະຄອນຫລວງວຽງຈັນ(ນວ), ຮ່ວມກັບອົງການປົກຄອງທ້ອງຖິ່ນ ແລະ ພໍ່ແມ່ປະຊາຊົນບັນດາເຜົ່າ ໄດ້ຈັດພິທີປ່ອຍປາ ຈຳນວນ 176.000 ກວ່າໂຕ ລົງສູ່ທຳມະຊາດ (ອ່າງນໍ້າຊວງ) ບ້ານສີວິໄລ ເມືອງນາຊາຍທອງ ນະຄອນຫລວງວຽງຈັນ, ໃນຕອນເຊົ້າວັນທີ 13 ກໍລະກົດ ນີ້ ໃນໂອກາດວັນປ່ອຍປາ ແລະ ອະນຸລັກສັດນ້ຳ-ສັດປ່າ ແຫ່ງຊາດ ປະຈຳປີ 2017 ໂດຍມີ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ທ່ານ ບຸນຂວາງ ຄຳບຸນເຮືອງ ຮອງລັດຖະມົນຕີກະຊວງກະສິກຳ ແລະ ປ່າໄມ້, ບັນດາຫົວໜ້າກົມ-ຮອງກົມ, ພ້ອມດ້ວຍພໍ່-ແມ່ປະຊາຊົນ ພາຍໃນບ້ານ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ປາທີ່ນຳມາປ່ອຍໃນຄັ້ງນີ້ປະກອບມີ: ປານິນ, ປາໄນ, ປາປາກ, ປາເກັດແລບ, ປານວນຈັນ ແລະ ຊະນິດປາອື່ນໆ ນອກນັ້ນຍັງໄດ້ນຳເອົາກົບ ແລະ ນົກ ຈຳນວນໜຶ່ງມາປ່ອຍຕື່ມອີກ ໂດຍເນັ້ນໃສ່ປ່ອຍປາພັນພື້ນເມືອງ ເພື່ອສ້າງເງື່ອນໄຂໃຫ້ປາພັນພື້ນເມືອງ ໄດ້ມີການຂະຫຍາຍພັນຕາມທຳມະຊາດ ເຮັດໃຫ້ສັດນ້ຳຢູ່ຕາມທຳມະຊາດ ມີການຂະຫຍາຍຕົວເພີ່ມຂຶ້ນຢ່າງຕໍ່ເນື່ອງ ແລະ ນັບມື້ຫລາຍຂຶ້ນ, ສ້າງຄວາມສົມດຸນຂອງລະບົບນິເວດ, ສ້າງທ່າແຮງດ້ານສະບຽງອາຫານ ແລະ ກາຍເປັນສິນຄ້າ.
ໃນໄລຍະຜ່ານມາ, ນະຄອນຫລວງວຽງຈັນ ໄດ້ເອົາໃຈໃສ່ສ້າງຂະບວນການ ແລະ ເຜີຍແຜ່ເນື້ອໃນ, ຄວາມໝາຍຄວາມສຳຄັນ ໃນວັນປ່ອຍປາແຫ່ງຊາດທຸກໆປີ ເຮັດໃຫ້ຂະບວນການມີລັກສະນະກ້ວາງຂວາງ ແລະ ໄດ້ຮັບຜົນດີ. ນັບແຕ່ປີ 1994 ຮອດປີ 2016 ຕົວເລກການປ່ອຍປາ ແລະ ສັດນ້ຳອື່ນໆ ບັນລຸເຖິງ 21.882.500 ກວ່າໂຕ ສະເພາະປີ 2017 ນີ້, ຄາດຄະເນຕົວເລກການລະດົມທຸກພາກສ່ວນປ່ອຍປາ ຢູ່ 9 ຕົວເມືອງ ໃນນະຄອນຫລວງວຽງຈັນ ຈະບັນລຸເຖິງ 820.000 ກວ່າໂຕ.
ແຫລ່ງຂ່າວ: ຂປລ