ຂປລ. ເນື່ອງ​ໃນໂອກາດວັນປ່ອຍ​ປາ ​ແລະ ອະນຸລັກ​ສັດ​ນ້ຳ–ສັດປ່າ​ ແຫ່ງ​ຊາດ, ທ່ານ ບຸນ​ຍັງ ວໍລະ​ຈິດ ປະທານ​ປະ​ເທດ​ ແຫ່ງ ສປປ ລາວ ພ້ອມ​ດ້ວຍ​ຄອບຄົວໄດ້ຮ່ວມ ປ່ອຍປາລົງສູ່​ແຫລ່ງທໍາ​ມະ​ຊາດ (ນໍ້າງື່ມ) ຈໍານວນ 100.000 ​​ກວ່າ​ໂຕ ໃນວັນທີ 13 ກໍລະກົດ 2017 ນີ້ ບ້ານ​ໄຮ່, ​ເມືອງ​ໄຊ​ຖາ​ນີ, ນະຄອນຫລວງ​ວຽງ​ວຈັນ ຂະນະທີ່ລັດຖະບານລາວ ໄດ້ຕັ້ງເປົ້າຈະປ່ອຍປາລົງສູ່ແຫລ່ງນໍ້າທໍາມະຊາດໃຫ້ໄດ້ 40 ລ້ານໂຕປີ 2017 ນີ້.

ພ້ອມດຽວກັນນີ້ ພິທີ​ປອ່ຍປາ​ດັ່ງກ່າວ ກໍມີ​ບັນດາລັດຖະມົນຕີ, ຮອງ​ລັດຖະມົນຕີ ​ແລະ ຮອງ​ເຈົ້າ​ຄອງ​ນະຄອນຫລວງ, ​ອໍານາດ​ການ​ປົກຄອງບ້ານ, ພ້ອມດ້ວຍພາກສ່ວນ​ທີ່​ກ່ຽວຂ້ອງ ​ເຂົ້າ​ຮ່ວມເຊັ່ນດຽວກັນ.

ທ່ານ ພວງ​ປາຣິສັກ ປຣະວົງ​ວຽງ​ຄໍາ ຮອງ​ລັດຖະມົນຕີ​ ກະຊວງ​ກະ​ສີ​ກໍາ ​ແລະ ປ່າ​ໄມ້ ກ່າວ​ວ່າ: ການ​ປ່ອຍ​ປາ​ລົງ​ສູ່ທໍາ​ມະ​ຊາດ​ຄັ້ງ​ນີ້ ລວມ​ມີ: ປາ​ປາກ, ປາ​ເອິນ, ປາ​ແກງ ແລະ ນົກ​ຈຳ​ນວນ​ໜື່ງ. ​ໃນປີ 2017 ນີ້ ຕາມ​ແຜນ​ການ​ຄາດ​ວ່າ​ ຈະປ່ອຍ​ລູກ​ປາ ໃຫ້​ໄດ້​ຫລາຍ​ກ່​ວາ 40 ລ້ານ​ໂຕ. ໄປ​ຄຽງ​ຄູ່​ກັບການ​ປ່ອຍ​ສັດ​ປ່າເຊັ່ນ: ນົກ, ສັດ​ເລືອ​ຄານ ແລະ ສັດ​ປະ​ເພດ​ອື່ນໆ. ​ເພື່ອ​ແນ່​ໃສ່​ເພີ່ມ​ປະຊາກອນ ຂອງ​ສັດ​ນໍ້າ ​ແລະ ສັດປ່າ ຄວາມ​ອຸດົມສົມບູນ​ທາງ​ດ້ານ​ຊະນິດ​ພັນ ທີ່​ເປັນ​ມໍລະດົກ​ທາງ​ທໍາ​ມະ​ຊາດ​ອັນ​ລໍ້າ​ຄ່າ​ຂອງ​ຊາດ ​ໃຫ້​ໄດ້​ຮັບ​ການ​ປົກ​ປັກ​ຮັກສາ, ຊົມ​ໃຊ້​ແບບ​ຍືນ​ຍົງ.

ທ່ານ ຮອງ​ລັດຖະມົນຕີ​ ກະຊວງ​ກະ​ສີ​ກໍາ ​ແລະ ປ່າ​ໄມ້ ກ່າວ​ຕື່ມວ່່າ: ວຽກ​ງານ​ການອະ​ນຸ​ລັກ​ສັດ​ນ້ຳ ແລະ ສັດ​ປ່າ ​ເຫັນ​ວ່າ​​ນັບ​ມື້​ນັບເພີ່ມ​ຂື້ນ ເປັນ​ຕົ້ນ​ໃນ​ປີ 2015 ​ໄດ້​ປ່ອຍ​ລູກ​ປາ​ທັງ​ໝົດ​ປະ​ມານ 35 ລ້ານໂຕ, ປີ 2016 ໄດ້​ປະ​ມານ 40 ລ້ານ​ໂຕ ແລະ ປີ 2017 ຈະ​ໃຫ້​ໄດ້​ຫລາຍ​ກວ່າ 40 ລ້ານ​ໂຕ.

ແຫລ່ງຂ່າວ: ຂປລ