ສຳນັກຂ່າວຕ່າງປະເທດ ລາຍງານໃນວັນທີ 12 ກໍລະກົດຜ່ານມານີ້ວ່າ ເຂດຈົງກວານຊຸນ ຊຶ່ງເປັນຈຸດສູນລວມດ້ານເຕັກໂນໂລຊີ ຢູ່ນະຄອນຫລວງປັກກິ່ງ ສປ ຈີນ ໄດ້ມີການເປີດໃຫ້ບໍລິການຫ້ອງການແຄັບຊູນ ຊຶ່ງຖືກອອກແບບມາສຳລັບເອົາໃຈພະນັກງານບໍລິສັດ ທີ່ຕ້ອງການຢາກນອນພັກຜ່ອນໃນເວລາກາງເວັນ ໂດຍພາຍໃນຫ້ອງການລ້ຳຍຸກດັ່ງກ່າວນີ້ ປະກອບມີຕຽງນອນ, ກະຈຸກອັດຫູປ້ອງກັນສຽງລົບກວນ ແລະ ໂຄມໄຟອຸນຕາໄວໂອເລດ ສຳລັບຂ້າເຊື້ອພະຍາດອີກດ້ວຍ.

ສຳລັບຄ່າໃຊ້ບໍລິການ ຈະຄິດໄລ່ໃນລາຄາ 10 ຢວນ ຫລື ປະມານ 12,210 ກີບ ໃນໄລຍະເວລາແຕ່ 11:00-14:00 ໂມງ, ສ່ວນໃນໄລຍະເວລາອື່ນໆ ຈະຄິດໄລ່ໃນອັດຕາ 6 ຢວນ ຫລື ປະມານ 7,326 ກີບ ສຳລັບການນອນພັກຜ່ອນ 30 ນາທີຕໍ່ໜຶ່ງຄັ້ງ, ອັດຕາຄ່າບໍລິການສູງສຸດ ຖ້າຫາກຕ້ອງການນອນພັກຜ່ອນເປັນມື້ ແມ່ນຢູ່ທີ່ 58 ຢວນ ຫລື 70,818 ກີບ ຕໍ່ມື້.