ສຳນັກຂ່າວຣອຍເຕີ້ ລາຍງານໃນວັນທີ 13 ກໍລະກົດນີ້ວ່າ ບໍລິສັດ Culture Machine ຊຶ່ງມີສຳນັກງານຕັ້ງຢູ່ນະຄອນມຸມໄບ ປະເທດອິນເດຍ ໄດ້ອອກນະໂຍບາຍໃໝ່ ອະນຸຍາດໃຫ້ພະນັກງານເພດຍິງ ລາພັກໃນມື້ທຳອິດທີ່ເປັນປະຈຳເດືອນ ຫລື ນະໂຍບາຍ First Day of Period (FOP) ໂດຍທ່ານ ເດບລີນາ ເອັສ ມາຈຸດາ ປະທານຝ່າຍຊັບພະຍາກອນມະນຸດຂອງບໍລິສັດດັ່ງກ່າວໄດ້ລະບຸວ່າ ແມ່ຍິງສ່ວນໃຫຍ່ມັກຈະຮູ້ສຶກບໍ່ສະບາຍ ໃນມື້ທຳອິດຂອງການມີປະຈຳເດືອນ ສະນັ້ນຈຶ່ງຄິດວ່າເຖິງເວລາແລ້ວ ທີ່ຈະຕ້ອງປະເຊີນກັບຄວາມຈິງ ມັນບໍ່ແມ່ນເລື່ອງໜ້າອາຍ ແຕ່ມັນເປັນສ່ວນໜຶ່ງຂອງຊີວິດ.

ທັງນີ້ ສັງຄົມອິນເດຍຖືວ່າ ການມີປະຈຳເດືອນເປັນສິ່ງທີ່ບໍ່ຄວນນຳມາເວົ້າຕໍ່ໜ້າສາທາລະນະ ເຮັດໃຫ້ແມ່ຍິງຈຳນວນຫລວງຫລາຍ ຂາດຄວາມເຂົ້າໃຈທີ່ຖືກຕ້ອງ, ພ້ອມກັນນີ້ ແມ່ຍິງທີ່ຢູ່ໃນໄລຍະປະຈຳເດືອນ ກໍຈະຖືກເບິ່ງວ່າບໍ່ສະອາດ, ບໍ່ບໍລິສຸດ ແລະ ຈະຖືກຫ້າມເຮັດກິດຈະກຳບາງຢ່າງເຊັ່ນ ຫ້າມເຂົ້າວັດ ແລະ ຫ້າມປຸງແຕ່ງ ຫລື ກິນອາຫານບາງປະເພດ ດັ່ງນີ້ເປັນຕົ້ນ.