ຂປລ. ປັດຈຸບັນການດຳເນີນທຸລະກິດດ້ານການຄ້າ, ການລົງທຶນທັງພາຍໃນ ເເລະ ຕ່າງປະເທດຢູ່ເເຂວງໄຊຍະບູລີ ນັບມື້ນັບຂະຫຍາຍຕົວທາງດ້ານປະລິມານ ເເລະ ຄຸນນະພາບ ເຊິ່ງປັດຈຸບັນ ເເຂວງໄຊຍະບູລີ ໄດ້ອານຸຍາດສ້າງຕັ້ງ ເເລະ ດຳເນີນທຸລະກິດໂຮງງານອຸດສາຫະກຳ ເເລະ ຫັດຖະກຳ ຈຳນວນ 2.144 ເເຫ່ງ.
ຕາມຂໍ້ມູນຈາກພະເເນກ ອຸດສາຫະກຳ ເເລະ ການຄ້າເເຂວງໄຊຍະບູລີ ໃຫ້ຮູ້ວ່າ: ໃນ 6 ເດືອນຕົ້ນປີ 2017 ໄດ້ອານຸຍາດສ້າງຕັ້ງໂຮງງານອຸດສາຫະກຳ ແລະ ຫັດຖະກຳໄດ້ 52 ແຫ່ງ ໃນນັ້ນ ສືບຕໍ່ອານຸຍາດດຳເນີນທຸລະກິດໂຮງງານ 37 ເເຫ່ງ ແລະ ອອກອານຸຍາດສ້າງຕັ້ງ ກິດຈະການໂຮງງານໃໝ່ 15 ເເຫ່ງ. ທົ່ວເເຂວງມີໂຮງງານທັງໝົດ 2.144 ເເຫ່ງ, ໃນນັ້ນ ມີໂຮງງານຂະໜາດໃຫຍ່ 48 ເເຫ່ງ, ຂະໜາດກາງ 53 ເເຫ່ງ, ຂະໜາດນ້ອຍ 325 ເເຫ່ງ ແລະ ນ້ອຍເເບບຄອບຄົວ 1.781 ເເຫ່ງ, ມີທຶນທັງໝົດ 1.000 ຕື້ກວ່າກີບ, ມີເເຮງງານທັງໝົດ 8.920 ຄົນ. ເຊິ່ງໄດ້ສ້າງມູນຄ່າການຜະລິດອຸດສາຫະກຳ ເເລະ ຫັດຖະກຳ ບັນລຸໄດ້ 88,12 ຕື້ກີບ ເເລະ ຍອດມູນຄ່າຈຳໜ່າຍ ບັນລຸ 104,11 ຕື້ກີບ.
ສ່ວນວຽກງານການຂຶ້ນທະບຽນວິສາຫະກິດ ມີທັງໝົດ 167 ທະບຽນ, ມີທຶນຈົດທະບຽນ 82,4 ຕື້ກວ່າກີບ. ໃນນັ້ນ ຂະເເໜງອຸດສາຫະກຳມີ 21 ທະບຽນ, ຂະເເໜງການຄ້າ 93 ທະບຽນ, ຂະເເໜງບໍລິຫານ 50 ທະບຽນ ເເລະ ຂະເເໜງກະສິກຳ 3 ທະບຽນ. ປະຈຸບັນນີ້ທົ່ວເເຂວງ ມີຫົວໜ່ວຍທຸລະກິດທັງໝົດ 8.342 ຫົວໜ່ວຍ, ມີທຶນທັງໝົດ 2.941 ຕື້ກວ່າກີບ ໃນນີ້ລົງທຶນຫລາຍກວ່າ ໝູ່ເເມ່ນຂະເເໜງການຄ້າ 3.035 ທະບຽນ, ມີທຶນ 766 ຕື້ກວ່າກີບ.
ແຫລ່ງຂ່າວ: ຂປລ