ຂປລ. ທ່ານ ສຸລິຈັນ ພອນແກ້ວ ຫົວໜ້າພະແນກແຜນການ ແລະ ການລົງທຶນ, ສະມາຊິກສະພາປະຊາຊົນແຂວງ ໄດ້ລາຍງານຕໍ່ສື່ມວນຊົນ ໃນວັນທີ 11 ກໍລະກົດ 2017 ນີ້ວ່າ: ເລີ່ມແຕ່ປີ 2001-2016 ການລົງທຶນຢູ່ໃນແຂວງອັດຕະປື ລວມທັງພາຍໃນ ແລະ ຕ່າງປະເທດມີທັງໝົດ 60 ໂຄງການ ລວມມູນຄ່າ 2 ຕື້ກວ່າໂດລາສະຫະລັດ ກວມເອົາຂະແໜງພະລັງງານໄຟຟ້າກວມເອົາ 67,4%,  ຂະແໜງກະສິກໍາ 23,9%, ຂະແໜງບໍ່ແຮ່ 8,4% ແລະ ຂະແໜງບໍລິການອື່ນໆ ໃນນີ້ການລົງທຶນຈາກ ສສ ຫວຽດນາມ ກວມເອົາ 58%. ນັບແຕ່ປີ 2001-2016 ໃນນີ້ ສສ ຫວຽດນາມ ໄດ້ລົງທຶນຢູ່ແຂວງອັດຕະປື ລວມມີ 19 ໂຄງການ, ຂະແໜງກະສິກໍາມີ 12 ໂຄງການ, ຂະແໜງບໍ່ແຮ່ 4 ໂຄງການ, ຂະແໜງພະລັງງານ 3 ໂຄງການ ລວມມູນຄ່າປະມານ 1 ຕື້ກວ່າໂດລາສະຫະລັດ ປັດຈຸບັນນີ້ ນັກລົງຈາກ ສສ ຫວຽດນາມ ຍັງໃຫ້ຄວາມສົນໃຈ ຈະສືບຕໍ່ມາລົງທຶນຢູ່ໃນແຂວງ ອັດຕະປືຕື່ມອີກ.

ຫົວໜ້າພະແນກແຜນການ ແລະ ການລົງທຶນຍັງກ່າວຕື່ມອີກວ່າ: ປັດຈຸບັນເຫັນວ່າ ບັນດາບໍລິສັດຈາກ ສສ ຫວຽດນາມມີການຂະຫຍາຍກິດຈະກຳດີຂຶ້ນ ເປັນຕົ້ນແມ່ນ ບໍລິສັດ ຮວ່າງແອ໋ງ ຢາລາຍ,ບໍລິສັດ TTC ໂຮງງານນໍ້າຕານ ແລະ ບໍລິສັດອື່ນໆ ນອກຈາກນັ້ນຍັງມີບໍລິສັດໃຫ້ຄວາມສົນໃຈ ຢາກໃຫ້ທາງພາກລັດ ໂດຍສະເພາະແຂວງອັດຕະປື ສະໜັບສະໜູນປະຊາຊົນ ຂະຫຍາຍເນື້ອທີ່ປູກອ້ອຍເພີ່ມຕື່ມ ເພື່ອນຳສະໜອງເຂົ້າໂຮງງານນ້ຳຕານໃຫ້ຫລາຍຂຶ້ນ. ສະນັ້ນ ເນື່ອງໃນສະເຫລີມສະຫລອງວັນປະຫວັດສາດ ແລະ ວັນສຳຄັນຂອງຊາດ ລາວ-ຫວຽດນາມ ຄື: ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 40 ປີ ແລະ ວັນສ້າງຕັ້ງສາຍພົວພັນການທູດ ຄົບຮອບ 55 ປີ 2017 ນີ້  ແມ່ນການພົວພັນອັນຜ່ອງໃສ,ສະເໝີຕົ້ນສະເໝີປາຍ, ເປັນສັນຍາລັກແຫ່ງຄວາມ ມຸ່ງມາດປາຖະໜາຂອງປະຊາຊົນທັງສອງຊາດ ເພື່ອສືບຕໍ່ເສີມຂະຫຍາຍໃຫ້ຈະເລີນງອກງາມຂຶ້ນຢ່າງບໍ່ຢຸດຢັ້ງ ພິເສດແຂວງອັດຕະປື ກຳລັງຂຸ້ນຂ້ຽວໃນການກະກຽມສະເຫລີມ ສະຫລອງສອງວັນປະຫວັດສາດນັ້ນ ຖືເອົາໂອກາດນີ້ ອວຍພອນໃຫ້ແກ່ການນໍາພັກ-ລັດສອງປະເທດ ປະຊາຊົນທັງສອງຊາດ ໄດ້ຮັກສາສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືແບບຮອບດ້ານນີ້ ຈົ່ງພ້ອມກັນອອກແຮງເສີມສ້າງ ຖະໜອມຫອມຮັກສາຍພົວພັນມິດຕະພາບໃຫ້ຍືນຍົງຄົງຕົວຕະຫຼອດຊົ່ວຟ້າກາລະນານ.

ແຫລ່ງຂ່າວ: ຂປລ