ສຳນັກຂ່າວຊິນຮວາ ລາຍງານໃນວັນທີ 12 ກໍລະກົດນີ້ວ່າ ກຳປັ່ນບັນທຸກທະຫານຈີນ ໄດ້ເດີນທາງອອກສູ່ປະເທດຈິບູຕິ ໃນທະວີບອາຟຣິກາ ເພື່ອລິເລີ່ມແຜນການກໍ່ສ້າງຖານອຳນວຍຄວາມສະດວກທາງດ້ານການຂົນສົ່ງ ໃນການໝູນວຽນກຳປັ່ນສູ້ຮົບ ທີ່ເຂົ້າຮ່ວມພາລະກິດຮັກສາສັນຕິພາບ ແລະ ພາລະກິດດ້ານມະນຸດສະທຳ ຢູ່ນອກຊາຍຝັ່ງເຢແມນ ແລະ ໂຊມາລີ ຊຶ່ງຖືເປັນການກໍ່ສ້າງຖານປະຕິບັດການທາງທະຫານ ແຫ່ງທຳອິດຂອງຈີນຢູ່ຕ່າງປະເທດ.
ແຫລ່ງຂ່າວໄດ້ລາຍງານວ່າ ການຈັດຕັ້ງຖານສະໜັບສະໜູນແຫ່ງນີ້ ຖືເປັນການຕັດສິນໃຈຂອງສອງປະເທດ ຫລັງຈາກທີ່ມີການເຈລະຈາກັນ ຊຶ່ງສອດຄ່ອງກັບຜົນປະໂຫຍດຮ່ວມຂອງປະຊາຊົນຈາກທັງສອງຝ່າຍ.
