ສຳນັກຂ່າວຕ່າງປະເທດ ລາຍງານໃນວັນທີ 12 ກໍລະກົດນີ້ວ່າ ສານສິດທິມະນຸດເອີຣົບ ຫລື  ECHR ໄດ້ອອກຄຳຕັດສິນຢືນຢັນຕາມລັດຖະບານແບນຊິກ ໃນການອອກກົດໝາຍຫ້າມນຸ່ງເສື້ອຜ້າຄຸມຫົວມຸດສະລິມແບບປິດບັງທັງໃບໜ້າ ຢູ່ສະຖານທີ່ສາທາລະນະ ໂດຍອ້າງວ່າ ເພື່ອປົກປ້ອງສິດທິ ແລະ ເສລີພາບສ່ວນບຸກຄົນ ແລະ ເປັນຫລັກປະກັນຕໍ່ສັງຄົມແບນຊິກ ໃນການຢູ່ຮ່ວມກັນ ແລະ ປະກັນສິດທິ ແລະ ເສລີພາບຂອງບຸກຄົນອື່ນ.

ທັງນີ້ ເນື່ອງຈາກລັດຖະບານແບນຊິກ ໄດ້ປະກາດນຳໃຊ້ກົດໝາຍດັ່ງກ່າວໃນຂອບເຂດທົ່ວປະເທດ ເມື່ອປີ 2011 ແຕ່ມີຍິງຊາວມຸດສະລິມແບນຊິກ 2 ຄົນຄື ຊາເມຍ ເບນຄາເຊມີ (Samia Belcacemi) ແລະ ຢາມິນາ ເອົາຊາ (Yamina Oussar) ໄດ້ຍື່ນຟ້ອງຕໍ່ສານ ເພື່ອຕ້ອງການໃຫ້ຄຳສັ່ງດັ່ງກ່າວຖືກລະງັບໄວ້, ແນວໃດກໍຕາມ ຄະນະຜູ້ພິພາກສາໄດ້ອອກຄຳຖະແຫລງວ່າ ການປະກາດໃຊ້ຄຳສັ່ງຫ້າມດັ່ງກ່າວນີ້ ບໍ່ໄດ້ລະເມີດສິດທິສ່ວນບຸກຄົນ ແລະ ຊີວິດຄອບຄົວ ລວມເຖິງເສລີພາບໃນການນັບຖືສາສະໜາ ຫລື ການກີດກັນທາງກົດໝາຍ ແຕ່ຢ່າງໃດ.