ວັນທີ 4 ກໍລະກົດ 2017 ທີ່ກົມຄຸ້ມຄອງຊັບພະຍາກອນປ່າໄມ້ ກະຊວງກະສິກຳ ແລະ ປ່າໄມ້ ທ່ານ ອຸດົມ ສີປະເສີດ ຮັກສາການຫົວໜ້າກົມຄຸ້ມຄອງຊັບພະຍາກອນປ່າໄມ້ ໄດ້ຖະແຫຼງຂ່າວເນື່ອງໃນໂອກາດສະເຫຼີມສະຫຼອງວັນປ່ອຍປາ ອະນຸຮັກສັດນ້ຳ ແລະ ສັດປ່າແຫ່ງຊາດ 13 ກໍລະກົດ ປະຈຳປີ 2017 ວ່າ: ພັກ-ລັດຖະບານ ເຫັນໄດ້ເຖິງຄວາມສຳຄັນໃນວຽກງານອະນຸຮັກປົກປັກຮັກສາສັດນ້ຳ ແລະ ສັດປ່າ ເຊິ່ງໃນອະນາຄົດຂອງລູກຫຼານ ອາດຈະບໍ່ມີໃຫ້ຊົມໃຊ້ ຫຼື ອາດຈະບໍ່ມີໃຫ້ຮູ້ເຫັນອີກ ຖ້າພວກເຮົາບໍ່ເອົາໃຈໃສ່ປົກປັກຮັກສາອະນຸຮັກໄວ້ ສະນັ້ນເລີ່ມແຕ່ປີ 1997 ເປັນຕົ້ນມາ ພັກ ແລະ ລັດຖະບານຈຶ່ງໄດ້ກຳນົດເອົາວັນທີ 13 ກໍລະກົດ ເປັນວັນປ່ອຍປາອະນຸຮັກສັດນ້ຳ ແລະ ສັດປ່າແຫ່ງຊາດ ປັດຈຸບັນ ຄົບຮອບ 20 ປີ ເຊິ່ງພໍດີກົງກັບວັນຄ້າຍວັນເກີດຂອງປະທານ ສຸພານຸວົງ ຄົບຮອບ 108 ປີ (13/7/1909-13/7/2017) ແລະ ວັນທີ 13 ກໍລະກົດຂອງທຸກໆປີ ໄດ້ຈັດພິທີສະເຫຼີມສະຫຼອງປ່ອຍປາຄືນສູ່ທຳມະຊາດ ຢູ່ຫ້ວຍໜອງຄອງບຶງ ແມ່ນ້ຳລຳເຊ ຢ່າງເປັນຂະບວນຟົດຟື້ນໃນຂອບເຂດທົ່ວປະເທດ.
ສຳລັບປີ 2017 ຈະສູ້ຊົນຊຸກຍູ້ຂະບວນການປ່ອຍປາຄືນສູ່ທຳມະຊາດໃນລະດັບເມືອງໃຫ້ເພີ່ມຂຶ້ນ ຕົວເລກຄາດໝາຍສູ້ຊົນແມ່ນໃຫ້ໄດ້ 5 ລ້ານໂຕ ໃນຂອບເຂດທົ່ວປະເທດ ເຊິ່ງປີຜ່ານມາ ໃນຂອບເຂດທົ່ວປະເທດສາມາດປ່ອຍປາຄືນສູ່ທຳມະຊາດໄດ້ທັງໝົດຈຳນວນ 4 ລ້ານກວ່າໂຕ ເພື່ອສະແດງຄວາມເປັນເຈົ້າການສ້າງຂະບວນເນື່ອງ ໃນໂອກາດວັນປ່ອຍປາ ອະນຸຮັກສັດນ້ຳ ແລະ ສັດປ່າແຫ່ງຊາດ 13 ກໍລະກົດ ປະຈຳປີ 2017 ໃຫ້ປາກົດເດັ່ນຂຶ້ນກວ່າເກົ່າ ຂໍຮຽກຮ້ອງມາຍັງທຸກພາກສ່ວນ ຕະຫຼອດຮອດພໍ່ແມ່ປະຊາຊົນບັນດາເຜົ່າ ໃນຂອບເຂດທົ່ວປະເທດ ຈົ່ງໃຫ້ຄວາມຮ່ວມມືໃນການສະກັດກັ້ນ ການທຳລາຍຊັບພະຍາກອນປ່າໄມ້ ການລັກລອບຄ້າຂາຍສັດນ້ຳ-ສັດປ່າທີ່ຫາຍາກ ແລະ ໃກ້ຈະສູນພັນ ລວມທັງເຄື່ອງປ່າຂອງດົງທີ່ຜິດກົດໝາຍ ເພື່ອຮັບປະກັນໃຫ້ຊັບພະຍາກອນທຳມະຊາດອັນມີຄຸນຄ່າຂອງປະເທດລາວ ໃຫ້ເປັນມໍລະດົກທາງທຳມະຊາດອັນລ້ຳຄ່າຂອງຊາດເຮົາ ໃຫ້ໄດ້ຮັບການປົກປັກຮັກສາ ແລະ ນຳໃຊ້ແບບຍືນຍົງ ເປັນມໍລະດົກຕົກທອດຮອດລູກຫຼານລາວຕະຫຼອດໄປ ດັ່ງຄຳຂວັນທີ່ວ່າ ສັດນ້ຳມີຄ່າ ສັດປ່າມີຄຸນ.
ແຫລ່ງຂ່າວ: ວຽງຈັນໃໝ່