ຂປລ. ນັກ​ຮຽນລາ​ວ ຈຳນວນ 3 ຄົນ​ທີ່ຮຽນຈົບມັດ​ທະ​ຍົມ​ຕອນ​ປາຍ (ມ7) ຈາກ​ໂຮງຮຽນ​ ມສ ວຽງ​ຈັນ ​ແລະ ​ໂຮງຮຽນ​ມັດທະຍົມ​ຝຣັ່ງ ​ໄດ້​ຮັບ​ທຶນ​ໄປ​ສຶກສາ​ຕໍ່ວິຊາ​ຊີບ ຢູ່​ມະຫາວິທະຍາ​ໄລ​ດ້ານ​ເຕັກ​ໂນ​ໂລ​ຊີ ທີ່​ມີ​ຊື່​ສຽງ ຢູ່​ພາກ​ຕາ​ເວັນ​ອອກ​ສ່ຽງ​ໃຕ້ ຂອງປະ​ເທດ​ຝຣັ່ງ ​ເປັນ​ເວລາ 2 ປີ ພາຍ​ໃຕ້​ບໍລິສັດ​​ໄຟຟ້ານ້ຳ​ເທີນ 2 ​ໃຫ້​ທຶນ​ສະໜັບສະໜູນ. ​

ພິທີ​ເຊັນ​ສັນຍາ​ມອບ​ທຶນ​ດັ່ງ​ກ່າວ ​ໄດ້​ຈັດຂຶ້ນ​ໃນ​ວັນ​ທີ 6 ກໍລະກົດ 2017 ນີ້ ລະຫວ່າງ​ ທ່ານ ນາງ ໂກຣດີນ ເລີດູ​ ເອກ​ອັກຄະ​ລັດຖະທູດ​ຝຣັ່ງ ປະຈໍາລາວ ​ແລະ ທ່ານ ​ເຟຣ​ເດຣິກ ອອບຟ໌ ຜູ້ອຳນວຍການ​ໃຫຍ່​ ບໍລິສັດ​ໄຟຟ້າ​ນ້ຳ​ເທີນ 2 ​ໂດຍ​ມີ​ພາກສ່ວນ​ກ່ຽວຂ້ອງ​ທັງສອງ​ຝ່າຍ ​ເຂົ້າ​ຮ່ວມ​ເປັນ​ສັກ​ຄີ​ພິຍານ.

ນັກຮຽນ​ທີ່​ໄດ້​ຮັບ​ທຶນ ​ໄປ​ສຶກສາຕໍ່ຢູ່​ປະ​ເທດ​ຝຣັ່ງ​ໃນ​ຄັ້ງ​ນີ້ ຈະ​ໄດ້​ອອກ​ເດີ​ນທາງ​ ໃນ​ວັນ​ທີ 21 ກໍລະກົດ 2017 ນີ້, ພາຍຫລັງ​ທີ​ຮຽນ​ຈົບ​ມາ​ແລ້ວ ຈະ​ໄດ້​ມີ​ໂອກາດ​ເຂົ້າ​ເຮັດ​ວຽກ​ກັບ​ບໍລິສັດໄຟຟ້ານ້ຳ​ເທີນ 2. ​ໂຄງການ​ໃຫ້​ທຶນ​ການ​ສຶກສາ​ດັ່ງກ່າວ ​ແມ່ນ​ເລີ່​ມມາ​ແຕ່​ປີ 2015 ​ໂດຍ​ມີ​ນັກຮຽນ​ນັກ​ສຶກສາ​ຈໍານວນ​ 7 ຄົນ ​ເຊິ່ງ ປັດຈຸບັນ​ນີ້ ນັກ​ສຶກສາ​ເຫລົ່າ​ນັ້ນ ​ພວມ​ສຶກສາ​ຮໍ່າຮຽນ​ໃນ​ປະ​ເທດ​ຝຣັ່ງ. ທຶນ​ດັ່ງກ່າວເປັນ​ການ​ປະກອບສ່ວນ ​ເຂົ້າ​ໃນ​ການ​ສ້າງ​ຄວາມ​ເຂັ້ມ​ແຂງ​ດ້ານ​ບຸກຄະລາ​ກອນ ​ແລະ ຕອບ​ສະໜອງ​ຄວາມ​ຕ້ອງການ​ ຂອງ​ອຸດສາຫະກຳ​ພະລັງງານ ​ແລະ ອື່ນໆ.

ແຫລ່ງຂ່າວ: ຂປລ