ຂປລ. ລະຫວ່າງວັນທີ 27-28 ມິຖຸນາ 2017, ເຈົ້າໜ້າທີ່ອາວຸໂສ ພາຍໃຕ້ຄະນະກໍາມາທິການຊາຍແດນຮ່ວມ ລາວ-ໄທ, ໄທ-ລາວ ໄດ້ຮ່ວມກັນລົງກວດກາພື້ນທີ່ຕົວຈິງ ເຂດຊາຍແດນ ລາວ-ໄທ, ທາງບົກ ບໍລິເວນແກ້ງຜາໄດ ແລະ ບໍລິເວນຜາຕັ້ງ-ຜາບ່ອງ ເຊິ່ງເປັນຈຸດຄົງຄ້າງທີ່ນອນໃນ ຈໍານວນ 14 ຈຸດ ຈາກການສໍາຫລວດ ແລະ ປັກຫລັກໝາຍຊາຍແດນ ລາວ-ໄທ ທີ່ເລີ່ມມາແຕ່ປີ 1997, ເບື້ອງລາວຂຶ້ນກັບເມືອງປາກທາ ແຂວງບໍ່ແກ້ວ ແລະ ເບື້ອງໄທຂຶ້ນກັບອໍາເພີວຽງແກ່ນ ຈັງຫວັດຊຽງຣາຍ.
ຄະນະຝ່າຍລາວນໍາໂດຍ ທ່ານ ສະເຫລີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ປະທານຄະນະເຈົ້າໜ້າທີ່ອາວຸໂສ ຮ່ວມ ລາວ-ໄທ ແລະ ຄະນະຝ່າຍໄທນໍາໂດຍ ທ່ານ ວະສິນ ທີລະເວດຊະຍານ ທີປຶກສາກະຊວງການຕ່າງປະເທດ ປະທານຄະນະເຈົ້າໜ້າທີ່ອາວຸໂສຮ່ວມ ໄທ-ລາວ.
ການລົງກວດກາພື້ນທີ່ໃນຄັ້ງນີ້ ແມ່ນປະຕິບັດຕາມຜົນຂອງ ກອງປະຊຸມຄະນະກຳມາທິການຊາຍແດນຮ່ວມ ລາວ-ໄທ; ໄທ-ລາວ(JBC) ຄັ້ງທີ 10, ສະບັບລົງວັນທີ 23 ມັງກອນ 2015 ທີ່ນະຄອນຫລວງວຽງຈັນ ແລະ ປະຕິບັດຕາມການຕົກລົງເຫັນດີ ໃນການພົບປະສອງຝ່າຍ ລະຫວ່າງ ປະທານຄະນະເຈົ້າໜ້າທີ່ອາວຸໂສຮ່ວມທັງສອງຝ່າຍ ຄັ້ງ ວັນທີ 02 ກຸມພາ 2017 ທີ່ດ່ານສາກົນວັງເຕົ່າ-ຊ່ອງເມັກ.
ໃນໂອກາດລົງກວດກາພື້ນທີ່ຄັ້ງນີ້, ປະທານຄະນະເຈົ້າໜ້າທີ່ອາວຸໂສຮ່ວມ ທັງສອງຝ່າຍໄດ້ ຮັບຟັງການລາຍງານ ແລະ ຊີ້ແຈງຈາກກອງສໍາຫລວດ ແລະ ປັກຫລັກໝາຍຊາຍແດນທາງບົກ ຮ່ວມ ລາວ-ໄທ; ໄທ-ລາວ ກ່ຽວກັບເຫດຜົນ ແລະ ຄວາມຄືບໜ້າຂອງການດໍາເນີນການ ສໍາຫລວດ ແລະ ແກ້ໄຂຈຸດຄົງຄ້າງຮ່ວມກັນ ໃນໄລຍະຜ່ານມາ. ຈາກນັ້ນ, ປະທານຮ່ວມທັງສອງຝ່າຍ ກໍໄດ້ແນະນໍາເຈົ້າໜ້າທີ່ກອງສໍາຫລວດທັງສອງຝ່າຍ ຈົ່ງສືບຕໍ່ຮ່ວມກັນປຶກສາຫາລື ຊອກຫາວິທີການແກ້ໄຂທີ່ເໝາະສົມ, ສອດຄ່ອງກັບຫລັກການທາງດ້ານກົດໝາຍ ແລະ ຫລັກການເຕັກນິກ ເພື່ອແກ້ໄຂຈຸດຄົງຄ້າງດັ່ງກ່າວໃຫ້ສໍາເລັດໂດຍໄວ ເປັນຕົ້ນຮ່ວມກັນສໍາຫລວດເກັບລາຍລະອຽດເພີ່ມເຕີມ, ແຕ້ມແຜນຜັງສະໜາມ, ກໍານົດຈຸດທີ່ເໝາະສົມ ແລະ ກໍ່ສ້າງຫລັກໝາຍຊາຍແດນ ພ້ອມທັງຂີດທິດເນັ່ງເສັ້ນຊາຍແດນ ໃນແຜນຜັງສະໜາມເທິງສັນປັນນໍ້າທີ່ຕໍ່ເນື່ອງ ເຊິ່ງເປັນທິດເນັ່ງຂອງເສັ້ນຊາຍແດນ ຕາມສົນທິສັນຍາຝຣັ່ງ-ສະຫຍາມ ສະບັບລົງວັນທີ 23 ມີນາ 1907 ແລ້ວລາຍງານຕາມລໍາດັບຂັ້ນ ຈົນເຖິງປະທານຄະນະກໍາມາທິການຊາຍແດນຮ່ວມ ລາວ-ໄທ; ໄທ-ລາວ ພິຈາລະນາຕໍ່ໄປ.