ສຳນັກຂ່າວຕ່າງປະເທດລາຍງານຈາກນະຄອນຫຼວງ ມອສກູ ປະເທດຣັດເຊຍ ເມື່ອວັນທີ 4 ກໍລະກົດ 2017 ວ່າ ປະທານາທິບໍດີ ວາລາດີເມຍ ປູຕິນ ຕ້ອນຮັບປະທານາທິບໍດີ ສີ ຈິ້ນຜິງ ທີ່ທຳນຽບເຄຣມລິນ ເມື່ອວັນຈັນທີ່ຜ່ານມາ ເນື່ອງໃນໂອກາດທີ່ຜູ່ນຳຈີນເດີນທາງມາຢ້ຽມຢາມຣັດເຊຍຢ່າງເປັນທາງການໃນລະຫວ່າງວັນທີ 3-4 ກໍລະກົດ. ແຕ່ການພົບປະກັນເມື່ອວັນຈັນທີ່ຜ່ານມາຍັງເປັນການຫາລືແບບບໍ່ເປັນທາງການ ກ່ອນມີການປະຊຸມກັນລະດັບເຕັມຄະນະໃນວັນອັງຄານຕາມເວລາທ້ອງຖິ່ນ ເຊິ່ງມີລາຍງານວ່າຈະມີການລົງນາມໃນຂໍ້ຕົກລົງຮ່ວມມືຫຼາຍຢ່າງມູນຄ່າກວ່າ 10,000 ລ້ານໂດລາ
ດ້ານ ທ່ານ ຍູຣິ ຍູຊາຄອຟ ທີ່ປຶກສາດ້ານນະໂຍບາຍຕ່າງປະເທດຂອງທຳນຽບເຄຣມລິນ ກ່າວເຖິງຄວາມສຳພັນລະຫວ່າງຣັດເຊຍ ແລະ ຈີນໃນປັດຈຸບັນ ຢູ່ໃນລະດັບດີທີ່ສຸດໃນປະຫວັດສາດ.