ແຫລ່ງຂ່າວມະຕິຊົນຂອງໄທເປີດເຜີຍໃນວັນ 1/7/2017 ວ່າໄດ້ເກີດມີຄື້ນແຮງງານຈໍານວນຫລາຍຈາກ ມຽນມາ, ກໍາປູເຈຍ ແລະ ລາວ ພາກັນແຫ່ຂ້າມຊາຍແດນເພື່ອກັບປະເທດດ່ວນ ຍ້ອນຢ້ານຕິຄຸກ ແລະ ຖືກປັບໄຫມ.

ທ່ານ ສົມພົງ ຜູ່ອຳນວຍການມູນນິທິສົ່ງເສີມເຄື່ອຂ່າຍຄຸນນະພາບຊີວິດແຮງງານ ກ່າວວ່າ ການນຳໃຊ້ ພ.ຣ.ກ ການບໍລິຫານຈັດການການທຳງານຂອງແຮງງານຕ່າງດ້າວ ປະຈຳປີ 2017 ສົ່ງຜົນໃຫ້ແຮງງານຕ່າງດ້າວທີ່ບໍ່ມີເອກະສານໃດໆ ຫຼື ມີເອກະສານບໍ່ຄົບ ບໍ່ສາມາດຕໍ່ໃບອະນຸຍາດທຳງານໄດ້ຫຼັງເກີນກຳນົດ 15 ວັນ.

ພາຍຫລັງລັດຖະບານໄທປະກາດວ່າຖ້າແຮງງານຕ່າງດ້າວບໍ່ມີເອກະສານ ຫລື ເອກະສານບໍ່ຄົບຈະຖືກຈັບທັນທີ ພ້ອມປັບໄຫມ ຂະນະທີ່ແຫລ່ງຂ່າວຍັງຊີ້ແຈງວ່າມີເຈົ້າຫນ້າທີ່ຕໍາຫລວດໄທຈໍານວນຫນຶ່ງໄດ້ສວຍໂອກາດປັບໄຫມ ແລະ ເອົາເງິນແຮງງານຕ່າງດ້າວປະມານ 5.000 ບາດຕໍ່ຄົນ ເຖິ່ງແມ່ນວ່າ ທ່ານ ປະຍຸດ ນາຍົກລັດຖະມົນຕີແຫ່ງຣາຊະອານາຈັກໄທປະກາດບໍ່ໃຫ້ເກັບ ແລະ ປັບໄຫມກໍ່ຕາມ.

ທ່ານ ສົມພົງ ກ່າວວ່າ ຈາກບັນຫາເຫຼົ່ານີ້ມູນນິທິສົ່ງເສີມເຄື່ອຂ່າຍຄຸນນະພາບຊີວິດແຮງງານ ຈະລະດົມບັນຫາຜົນກະທົບທາງນະໂຍບາຍ ແລະ ການປະຕິບັດ ເພື່ອຍື່ນຂໍ້ສະເໝີແນວທາງການບໍລິຫານຈັດການແຮງງານຂ້າມຊາດທີ່ດີ ເຮັດໃຫ້ເກີດປະໂຫຍດຕໍ່ທຸກຝ່າຍ ພ້ອມກັບຄຳຖາມຕ່າງໆໃຫ້ລັດຖະບານໄດ້ຮູ້ ເພື່ອແກ້ໄຂບັນຫາຕ່າງໆ ກ່ຽວກັບ ພ.ຣ.ກ ສະບັບໃໝ່ ໃນວັນທີ 5 ກໍລະກົດ 2017 ທີ່ຈະຮອດນີ້ທີ່ກະຊວງແຮງງານ.