ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວໄດ້ພົບປະ ແລະ ໃຫ້ທິດຊີ້ນໍາຕໍ່ອໍານາດການປົກຄອງທ້ອງຖິ່ນ ພ້ອມປະຊາຊົນພາຍໃນແຂວງວຽງຈັນໃຫ້ຖືເອົາເອກະລັກແບບພູມປັນດັ້ງເດີມຫັນມາປັບປຸງເປັນສິນຄ້າຕາມຍຸກຕາມສະໄໝສາມາດສ້າງຮັບທີ່ໝັ້ນຄົງ ພ້ອມນີ້ພາກອໍານາດການປົກຄອງແຂວງກໍຕ້ອງໃຫ້ຄວາມສໍາຄັນໃນການສົ່ງເສີມ ແລະ ຊຸກຍູ້ເຂົາເຈົ້າຢ່າງມີຫົວຄິດປະດິດສ້າງຢ່າງກວ້າງຂວາງ.
ໃນວັນທີ 20 ມິຖຸນາ 2017 ນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ພ້ອມຄະນະໄດ້ລົງເຄື່ອນໄຫວຢ້ຽມຢາມສູນຂໍ້ມູນຂ່າວສານນໍາໃຊ້ພະລັງງານ, ສູນສົ່ງເສີມ ແລະ ຝຶກອົບຮົມລາວ-ເກົາຫລີ ແລະ ພື້ນ ຖານການຜະລິດຂອງປະຊາຊົນໂດຍສະເພາະທຸລະກິດຈັກສານທີ່ເປັນພູມປັນຍາທອ້ງຖິ່ນຢູ່ແຂວງວຽງຈັນ ເຊິ່ງ ທ່ານ ນາຍົກກໍໄດ້ພົບປະໂອ້ລົມພະນັກງານຫລັກແຫລ່ງ ແລະ ຜູ້ປະກອບການພາຍໃນແຂວງດັ່ງກ່າວໂດຍເນັ້ນໃຫ້ທຸກໆພາກສ່ວນເພີ່ມທະວີຄວາມເອົາໃຈໃສ່ປະຕິບັດໜ້າທີ່ຢ່າງຕັ້ງໜ້າດ້ວຍຄວາມຮັບຜິດຊອບສູງ, ຮັບປະກັນຄວາມໂປ່ງໃສຍຸຕິທໍາ ແລະ ສຸມໃສ່ການພັດທະນາຢ່າງມີຈຸດສຸມຕິດພັນກັບການອະນຸລັກຮັກສາສິ່ງແວດລ້ອມແບບຍືນຍົງ ນອກຈາກນັ້ນກໍຕ້ອງເພີ່ມທະວີຄວາມສາມັກຄີເປັນປຶກແຜນ, ມີສະຕິລະວັງຕົວ ແລະ ຕີຖອຍທຸກປະກົດ ການຫຍໍ້ທໍ້ໃນສັງຄົມ.
ແຫລ່ງຂ່າວ: ສຳນັກຂ່າວສານປະເທດລາວ