ວັນທີ 14 ມິຖຸນາ 2017 ມື້ວານນີ້ ຢູ່ທີ່ອາຄານຕະຫຼາດຫຼັກຊັບລາວ ບ້ານໂພນທັນ ເມືອງໄຊເສດຖາ ນະຄອນຫຼວງວຽງຈັນ ໄດ້ມີການປະຊຸມປຶກສາຫາລືຮ່ວມລະຫວ່າງ ທະນາຄານແຫ່ງ ສປປ ລາວ ກັບ ບໍລິສັດ ພີເອັສ ສົ່ງເສີມກະສິກຳ ແລະ ອຸດສາຫະກຳ ຂາເຂົ້າ-ຂາອອກ ຈຳກັດຜູ້ດຽວ ກ່ຽວກັບການເຄື່ອນໄຫວຂອງບໍລິສັດພີເອັສ ໂດຍການເປັນປະທານຂອງທ່ານ ດຣ ອາຄົມ ປຣະເສີດ ຫົວໜ້າກົມຄຸ້ມຄອງສະຖາບັນການເງິນ ເຊິ່ງປະກອບມີບັນດາຂະແໜງການທີ່ກ່ຽວຂ້ອງ ທັງພາກສ່ວນ ປກສ, ອຸດສາຫະກຳແລະການຄ້າ, ທ່ານນາງ ສຸກນາລີ ເທບສີເມືອງ ປະທານບໍລິສັດພີເອັສ ແລະຕົວແທນສະມາຊິກບໍລິສັດພີເອັສເຂົ້າຮ່ວມ.

ຈຸດປະສົງຂອງກອງປະຊຸມແມ່ນ ໃຫ້ບໍລິສັດພີເອັສ ສົ່ງເສີມກະສິກຳແລະອຸດສາຫະກຳ ຂາເຂົ້າ-ຂາອອກ ຈຳກັດຜູ້ດຽວ ລາຍງານສະພາບການເຄື່ອນໄຫວຂອງບໍລິສັດໃນໄລຍະທີ່ຜ່ານມາ, ຖານະການເງິນຂອງບໍລິສັດ (ສະຫຼຸບລາຍຮັບ, ລາຍຈ່າຍ, ຈຳນວນຊັບສິນທັງໝົດຂອງບໍລິສັດ, ໜີ້ສິນທີ່ຕ້ອງສົ່ງຄືນສະມາຊິກ, ບັນຊີເງິນຝາກ ທັງຢູ່ພາຍໃນແລະຕ່າງປະເທດ, ຈຳນວນສະມາຊິກ, ຈຳນວນເງິນທີ່ລະດົມຈາກສະມາຊິກ ແລະການນຳໃຊ້ເງິນທີ່ລະດົມຈາກສະມາຊິກ ແລະອື່ນໆ) ແລະວິທີແກ້ໄຂບັນຫາຂອງບໍລິສັດພີເອັສຕໍ່ກອງປະຊຸມ.

ຜ່ານການປຶກສາຫາລີແລະຄົ້ນຄວ້າໃນກອງປະຊຸມ ກອງປະຊຸມໄດ້ຕົກລົງເຫັນດີເປັນເອກະພາບ ດັ່ງນີ້:

1. ການດຳເນີນທຸລະກິດຂອງບໍລິສັດພີເອັສ ຍັງບໍ່ທັນສອດຄ່ອງຕາມວັດຖຸປະສົງທີ່ໄດ້ຮັບອະນຸຍາດ ເຊິ່ງ ບໍລິສັດພີເອັສຮັບຮູ້ ແລະຂໍປັບປຸງແກ້ໄຂ.
2. ທາງບໍລິສັດພີເອັສສະເໜີປັບປຸງການດຳເນີນທຸລະກິດໃຫ້ສອດຄ່ອງກັບລະບຽບກົດໝາຍ.
3. ບໍລິສັດພີເອັສ ຍິນດີສະໜອງຂໍ້ມູນຕ່າງໆ ໃຫ້ກັບທາງພາກລັດຕ້ອງການ ຖືກຕ້ອງຄົບຖ້ວນ ແລະເປັນຈິງ.
4. ກ່ຽວກັບການປະຕິບັດແຈ້ງການເລກທີ 335/ທຫລ ທາງບໍລິສັດແມ່ນເຫັນດີປະຕິບັດຕາມແຈ້ງການຄື: ຜູ້ທີ່ຕ້ອງການຖອນແມ່ນສາມາດຖອນໄດ້. ສຳລັບຜູ້ທີ່ຕ້ອງການຢູ່ນຳບໍລິສັດຕໍ່ ແມ່ນຈະເຂົ້າເປັນຜູ້ຖືຫຸ້ນ ຫຼື ຕົວແທນ ໂດຍຕ້ອງສະເໜີຂໍອະນຸຍາດກັບຂະແໜງການທີ່ກ່ຽວຂ້ອງ. (ສຳລັບຜູ້ທີ່ຕ້ອງການຢູ່ຕໍ່ນຳບໍລິສັດ ກໍສາມາດເປັນຜູ້ຖືຫຸ້ນ ຫຼືຕົວແທນຈຳໜ່າຍ ແຕ່ບໍລິສັດຕ້ອງປ່ຽນແປງຮູບແບບໃຫ້ເໝາະສົມ ຕາມການອະນຸຍາດຈາກພາກສ່ວນທີ່ກ່ຽວຂ້ອງ ພາຍຫຼັງແກ້ໄຂບັນຫາຊຳລະໜີ້ສິນແລ້ວ.
5. ໃຫ້ບໍລິສັດພີເອັສເປີດກອງປະຊຸມພາຍໃນ ລວມທັງສາຂາແລະແມ່ທີມ ເພື່ອແກ້ໄຂບັນຫາຕາມແຈ້ງການເລກທີ 335/ທຫລ ພ້ອມທັງໃຫ້ມີຄວາມສະຫງົບຮຽບຮ້ອຍ.

ກອງປະຊຸມດັ່ງກ່າວ ໄດ້ດຳເນີນໄປແລະຈົບລົງໃນວັນດຽວກັນ.