ອຸດສາຫະກຳການບິນຂອງກາຕາວຸ້ນວາຍຢ່າງໜັກຫຼັງຈາກ 4 ປະເທດຕາເວັນອອກກາງປະກອບດ້ວຍ ຊາອຸດິອະຣາເບຍ, ອີຢິບ, ບາເຣນ ແລະ ສະຫະລັດອາຣັບເອມິເຣດ ຫຼື ຢູເອອີ ປະກາດຕັດຄວາມສຳພັນທາງການທູດກັບກາຕາເພາະໃຫ້ການສະໜັບສະໜູນການກໍ່ການຮ້າຍ ເມື່ອວັນທີ 5 ມິຖຸນາ 2017 ທີ່ຜ່ານມາ ທັງຍັງປະກາດລະງັບການຕິດຕໍ່ເຊື່ອມໂຍງກັບກາຕາທັງທາງອາກາດ, ທາງບົກ ແລະ ທາງທະເລ.
ຄຳສັ່ງດັ່ງກ່າວໄດ້ສົ່ງຜົນກະທົບຕໍ່ກັບອຸດສາຫະກຳການບິນເຊິ່ງເປັນໜຶ່ງໃນອຸດສາຫະກຳຫຼັກທີ່ຂັບເຄື່ອນເສດຖະກິດຂອງກາຕາຢ່າງໜັກ ໂດຍສະເພາະແມ່ນສາຍການບິນກາຕາ ເຊິ່ງເປັນສາຍການບິນແຫ່ງຊາດຂອງກາຕາ ເພາະເທົ່າກັບເປັນການສັ່ງຫ້າມເຮືອບິນກາຕາບິນຜ່ານນ່ານຟ້າ ແລະ ບິນໄປເມືອງຕ່າງໆໃນປະເທດທີ່ຕັດຄວາມສຳພັນ.
ຂະນະທີ່ສາຍການບິນຈາກຊາດເຫຼົ່ານີ້ ເຊັ່ນ: ເອທິຮັດ ເອມິເຣດ ແລະ ກັລເອຣ໌ ຈະຍົກເລີກຖ້ຽວບິນເດີນທາງເຂົ້າ ແລະ ອອກຈາກນະຄອນຫຼວງໂດຮາ ຂອງກາຕາ ນັບຕັ້ງແຕ່ວັນທີ 6 ມິຖຸນານີ້ເປັນຕົ້ນໄປ ຄືກັນກັບສາຍການບິນຕົ້ນທຶນຕໍ່າຢ່າງໄຟ້ດູໄບ ແລະ ເອຣອາຣະເບຍ ທີ່ໄດ້ຍົກເລີກຖ້ຽວບິນໄປກາຕາແລ້ວ.
ນອກຈາກນີ້ປະເທດໃນຕາເວັນອອກກາງທັງ 4 ປະເທດ ຍັງໄດ້ຮຽກຕົວນັກການທູດຂອງຕົນທີ່ປະຈຳຢູ່ກາຕາໃຫ້ເດີນທາງກັບປະເທດດ່ວນ ໂດຍອີຢິບ ແລະ ຢູເອອີໄດ້ແຈ້ງໃຫ້ນັກການທູດຂອງກາຕາເດີນທາງອອກຈາກປະເທດໄປພາຍໃນ 48 ຊົ່ວໂມງ ຂະນະທີ່ປະຊາຊົນກາຕາບໍ່ວ່າຈະເປັນຄົນທີ່ອາໄສຢູ່ໃນປະເທດ ຫຼື ເປັນນັກທ່ອງທ່ຽວທີ່ກຳລັງຢູ່ໃນ 4 ປະເທດທີ່ຕັດຄວາມສຳພັນກັບກາຕາຕ້ອງເດີນທາງອອກຈາກປະເທດບໍ່ໃຫ້ເກີນ 2 ອາທິດ ທັງຍັງມີຄຳສັ່ງຫ້າມປະຊາຊົນຂອງປະເທດຕົນເອງເດີນທາງໄປທີ່ກາຕາອີກ.