ທາງການຫວຽດນາມ ໄດ້ຄວບຄຸມໂຕຜູ້ໂດຍສານຊາວໄນຈີເຣຍ 2 ຄົນ ທີ່ສະໜາມບິນ ເຕິນ ເຊິນ ເຍຶດ ນະຄອນໂຮ່ຈິມິນ
ໃນຕອນບ່າຍຂອງວັນອັງຄານທີ 19 ສິງຫາ 2014 ຜ່ານມານີ້ ໂດຍທັງສອງຄົນອອກເດີນທາງຈາກໄນຈີເຣຍ ເມື່ອວັນທີ
18 ສິງຫາ 2014 ກັບສາຍການບິນກາຕາແອຣ໌ເວ ເຊິ່ງກວດພົບວ່າ ໜຶ່ງໃນສອງຄົນມີອາການໄຂ້ສູງ ນຂະນະດຽວກັນ
ທາງການໄດ້ປະກາດຕິດຕາມໂຕຜູ້ໂດຍສານອີກ 4 ຄົນ ທີ່ນັ່ງແວດລ້ອມຢູ່ກັບຊາວໄນຈີເຣຍຄູ່ນີ້ ເພື່ອໃຫ້ໄປພົບແພດ
ຢ່າງຮີບດ່ວນທີ່ສຸດ.
ຕາມການລາຍງານຂອງສື່ຕ່າງປະເທດ ອ້າງຄຳກ່າວຂອງເຈົ້າໜ້າທີ່ຫວຽດນາມວ່າ ເຈົ້າໜ້າທີ່ີຜູ້ຊ່ຽວຊານ ໄດ້ນຳໂຕຜູ້
ໂດຍສານທັງສອງ ຂຶ້ນຍານພາຫະນະພິເສດ ອອກຈາກສະໜາມບິນໄປສົ່ງທີ່ໂຮງໝໍແຫ່ງໜຶ່ງເປັນການຮີບດ່ວນ ກ່ອນ
ທີ່ຈະສົ່ງໄປແຍກການຄວບຄຸມໂຕ ເພື່ອເຝົ້າເບິ່ງອາການ ໂດຍແພດຜູ້ຊ່ຽວຊານໄດ້ກວດເລືອດ ແລະ ດຳເນີນການຕາມ
ກຳມະວິທີປ້ອງກັນ ທີ່ປະຕິບັດມາເປັນເວລາ 2 ອາທິດແລ້ວ.
ໃນວັນດຽວກັນ ກະຊວງສາທາລະນະສຸກຫວຽດນາມ ໄດ້ປະກາດຫາຜູ້ໂດຍສານອີກ 4 ຄົນ ຕາມໝາຍເລກຕັ່ງນັ່ງແຖວ
24, 25, 26 ແລະ 27 ເທິງເຮືອບິນ QR964 ລຳດຽວກັນ ແລະ ແນະນຳໃຫ້ຮີບໄປພົບແພດໃນໂຮງໝໍໃກ້ຄຽງຢ່າງຮີບດ່ວນ
ຫຼື ໃຫ້ຕິດຕໍ່ກັບກົມປ້ອງກັນທາງແພດ ເພື່ອເຂົ້າສູ່ມາດຕະການປ້ອງກັນຮັກສາຕໍ່ໄປ.
ຕາມລາຍງານຂອງອົງການອານາໄມໂລກ ຜູ້ຕ້ອງສົງໄສຕິດເຊື້ອໄວຣັສອີໂບລາ ຈະມີອາການຫຼາຍຢ່າງທີ່ສັງເກດໄດ້ເຊັ່ນ:
ເປັນໄຂ້ກະທັນຫັນ, ຮ່າງກາຍອ່ອນແອໄວ, ປວດກ້າມເນື້ອຮຸນແຮງ ແລະ ເຈັບຄໍ ໂດຍບາງລາຍທີ່ສາຫັດກ່ວານີ້ ຈະມີອາ
ການປວດຮາກ, ຖອກທ້ອງ, ເລືອດອອກທາງທະວານ ຈົນເຖິງຮູຂຸມຂົນ ເຊິ່ງໄວຣັສຮ້າຍດັ່ງກ່າວ ຈະມີໄລຍະການຟັກໂຕ
ປະມານ 21 ມື້ ຫາກບໍ່ໄດ້ຮັບການກວດຮັກສາທັນເວລາ ຜູ້ຕິດເຊື້ອມີອັດຕາເສຍຊີວິດສູງເຖິງ 90%