ຕອນເຊົ້າຂອງວັນທີ 30 ພຶດສະພາ 2017 ນີ້ ຢູ່ສະໂມສອນໃຫຍ່ຂອງແຂວງ ໄດ້ຈັດພິທີສະເຫຼີມສະຫຼອງວັນເດັກນ້ອຍສາກົນຂື້້ນ, ເຂົ້າຮ່ວມມີ ທ່ານ ເພັດສາຄອນ ຫຼວງອາໄພ ເຈົ້າແຂວງ-ແຂວງອຸດົມໄຊ ພ້ອມດ້ວຍພັນລະຍາ, ມີຄະນະປະຈໍາພັກແຂວງ, ຄູອາຈານ, ພໍ່ແມ່ຜູ້ປົກຄອງ ແລະ ລູກຫຼານນັກຮຽນ ເຂົ້າຮວ່ມຢ່າງພ້ອມພຽງ.
ການຈັດກິດຈະກຳໃນຄັ້ງນີ້ກໍເພື່ອ ສະເຫຼີມສະຫຼອງວັນເດັກນ້ອຍສາກົນ ວັນທີ 1 ມີຖຸນາ, ໃນງານມີຫຼາຍກິດຈະກຳທີ່ນຳມາສະແດງເພື່ອໃຫ້ເດັກນ້ອຍໄດ້ມ່ວນຊື່ນ ທັງສົ່ງເສີມທາງດ້ານສະຕິປັນຍາທັກສະໃນດ້ານຕ່າງໆ ຕາມພອນສະຫວັນຂອງເດັກນັກຮຽນໃຫ້ຖືກຕາມເກນອາຍຸຂອງແຕ່ລະຄົນ.
ລາຍການທີນຳມາສະແດງປະກອບມີ ບົດຟ້ອນ, ບົດເພງ, ຂັບ, ລໍາ, ເຕັ້ນແອລາບິກ, ຖາມ-ຕອບຄວາມຮູ້ຮອບຕົວ ພ້ອມທັງ ການກວດສຸຂະພາບເດັກ, ຊັກຢາ-ຢອດຢາກັນພະຍາດ, ກິນຢາຂ້າແມ່ທ້ອງ ແລະ ກິນຢາວິຕາມິນ.
ກິດຈະກຳແຕ່ລະລາຍການແມ່ນດຶງດູດຄວາມສົນໃຈພ້ອມທັງສຽງເຊ່ຍ, ສຽງຕົບມືຈາກຜູ້ຊົມໄດ້ເປັນຢ່າງດີ ແຕ່ຕົ້ນຕະຫຼອດປາຍ ໃນໂອກາດນີ້ທາງແຂວງກໍ່ໄດ້ມອບຂອງຂວັນລາງວັນໃຫ້ນັກກິລາທີມີຜົນງານ ແລະ ນັກຮຽນເກັ່ງຂັ້ນແຂວງຕື່ມອີກ.
ການຈັດງານໃນຄັ້ງນີ້ກໍເພືື່ອແນ່ໃສ່ສຶກສາອົບຮົມເດັກໃຫ້ເປັນຄົນຮູ້ຜູ້ດີ ທັງເປີດໂອກາດໃຫ້ເດັກໄດ້ພົບປະແລກປ່ຽນກິດຈະກໍາຮ່ວມກັນ ດ້ວຍຄວາມເບີກບານມ່ວນຊື່ນ ທັງໃຫ້ຜູ້ປົກຄອງເດັກຮັບຮູ້ ແລະ ເຂົ້າໃຈເຖິງສິດທິພື້ນຖານຂອງເດັກນ້ອຍ, ການສະເຫຼີມສະຫຼອງວັນເດັກທາງແຂວງອຸດົມໄຊປີນີ້ເຫັນໄດ້ວ່າມີຄວາມຄຶກຄື້ນເປັນພິເສດ ເດັກຫຼາຍຄົນ, ມາຈາກຫຼາຍໂຮງຮຽນໄດ້ມາຮ່ວມຕົວ ແລະ ໄດ້ມີສ່ວນຮ່ວມໃນການສະຫຼອງວັນເດັກຂອງຕົນຢ່າງຝົດຟື້ນ.
ແຫລ່ງຂ່າວ: ສຳນັກຂ່າວສານປະເທດລາວ