ງານວິໄຈຈາກອັງກິດເຜີຍວ່າເດັກນ້ອຍທີ່ໃຊ້ເວລາຫຼິ້ນສະມາດໂຟນ ຫຼື ແທັບເລັດຫຼາຍໆ ຈະສົ່ງຜົນໃຫ້ນອນຫຼັບຍາກກວ່າເດັກນ້ອຍທົ່ວໄປ

ມະຫາວິທະຍາໄລເບີເບັດໃນນະຄອນຫຼວງລອນດອນປະເທດອັງກິດ ໄດ້ເຮັດການວິໄຈກຸ່ມພໍ່ແມ່ທີ່ມີລູກອາຍຸຕ່ຳກວ່າ 3 ປີ ຈຳນວນ 715 ຄອບຄົວ ພົບວ່າເດັກນ້ອຍເຖິງ 75% ໄດ້ໃຊ້ສະມາດໂຟນ ແລະ ແທັບເລັດລະບົບໜ້າຈໍສຳພັດໃນຊີວິດປະຈຳວັນ ໂດຍເດັກນ້ອຍແຕ່ອາຍຸ 6-11 ເດືອນມີ 51% ແລະ ເດັກນ້ອຍໄວອາຍຸ 2-3 ປີ ມີເຖິງ 92% ເຊິ່ງຈາກການວິໄຈພົບວ່າການທີ່ໃຫ້ເດັກນ້ອຍຫຼິ້ນສະມາດໂຟນ ຫຼື ແທັບເລັດນັ້ນຈະນອນນ້ອຍກວ່າເດັກນ້ອຍທີ່ບໍ່ຫຼິ້ນ ໂດຍສະເລ່ຍການຫຼິ້ນສະມາດໂຟນ 1 ຊົ່ວໂມງ ຈະເຮັດໃຫ້ເດັກນ້ອຍນອນໜ້ອຍລົງ 15 ນາທີ

ດັ່ງນັ້ນຜູ່ເປັນພໍ່ແມ່ຈີ່ງຄວນຈຳກັດການໃຊ້ງານຂອງລູກ ບໍ່ໃຫ້ຫຼິ້ນອຸປະກອນພວກນີ້ຫຼາຍຈົນເກີນໄປ ໃຫ້ຫຼິ້ນມື້ລະ 1 ຊົ່ວໂມງກໍ່ພໍແລ້ວ ແລະ ບໍ່ຄວນໃຫ້ຫຼິ້ນກ່ອນຮອດໂມງນອນ ເຊັ່ນດຽວກັນກັບການຈຳກັດເວລາເບິ່ງໂທລະທັດ ເພື່ອໃຫ້ລູກນ້ອຍໄດ້ໄປເຮັດກິດຈະກຳອື່ນໆເຊັ່ນການອອກກຳລັງກາຍ ເຕະບານ, ແຕ້ມຮູບ, ຮ້ອງເພງ, ຫຼິ້ນດົນຕີ, ອ່ານໜັງສື, ແລ່ນຫຼິ້ນກັບເພື່ອນ, ຫຼິ້ນກັບພໍ່ແມ່ພີ່ນ້ອງ ເປັນຕົ້ນ