ເມື່ອບໍ່ດົນມານີ້, ທ່ານ ພັນເອກ ສີທາ ດວງມາລາ ຕາງໜ້າຄະນະປະຕິບັດງານ ພິເສດລັດຖະບານ ແຫ່ງ ສປປລາວ ພ້ອມດ້ວຍຜູ້ຕາງໜ້າຈາກ 3 ແຂວງຄື: ແຂວງຊຽງຂວາງ, ໄຊສົມບູນ ແລະ ແຂວງວຽງຈັນ ພ້ອມຄະນະ ໄດ້ເດີນທາງໄປຮ່ວມພິທີປົງ ອັດຖິທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫລະຊີວິດ ໃນປາງສົງຄາມຢູ່ລາວ ປະຈໍາສົກປີ 2016-2017 ທີ່ເມືອງ ຫງິລົກ ແຂວງເຫງະອານ ສສ ຫວຽດນາມ.
ການເດີນທາງ ເພື່ອນຳອັດຖິໄປປົງທີ່ເມືອງຫງິລົກນີ້ ໄດ້ຜ່ານບັນດາເມືອງຂອງ ແຂວງຊຽງຂວາງ ແລະ ບັນດາເມືອງຂອງ ແຂວງເຫງະອານ ເຊິ່ງໄດ້ຈັດພິທີຈູດທູບໄຫວ້ອາໄລ ເຖິງດວງຍິນຍານຂອງບັນດາ ທະຫານອາສາສະໝັກ ແລະ ຊ່ຽວຊານຫວຽດນາມ ຢ່າງສົມກຽດ ເຊິ່ງຂຸດຄົ້ນຊອກຄົ້ນທ້ອນໂຮມໄດ້ໃນ 3 ແຂວງຂອງ ສປປ ລາວ ຄື: ແຂວງຊຽງຂວາງ ສາມາດຂຸດຄົ້ນທ້ອນໂຮມໄດ້ 90 ອັດຖິ, ແຂວງໄຊສົມບູນໄດ້ 9 ອັດຖິ, ແຂວງວຽງຈັນໄດ້ 5 ອັດຖິ ລວມທັງໝົດ 104 ອັດຖິ.
ແຫລ່ງຂ່າວຈາກ: www.kpl.gov.la