ຕຳຫຼວດປັກກິ່ງຈັບກຸມໂຕ ” ເຈຊີ ຊານ ” ລູກຊາຍຂອງເສິນຫຼົງໄດ້ ພ້ອມກັບ ” ເຄີ ເຈິ້ນຕົງ ” ນັກສະແດງໜຸ່ມ
ດາວຮຸ່ງຊາວໃຕ້ຫວັນໄດ້ ໃນທີ່ພັກຢູ່ນະຄອນຫຼວງປັກກິ່ງ ຕັ້ງແຕ່ວັນທີ 14 ສິງຫາ 2014 ທີ່ຜ່ານມາ ຫຼັງພົບລູກ
ຊາຍຂອງເສິນຫຼົງ ເຈົ້າຂອງຫ້ອງ ແລະ ເພື່ອນດາລາໄຕ້ຫວັນເສບກັນຊາ ພ້ອມກັບມີກັນຊາໃນຄອບຄອງອີກ
100 ກຣາມ.
ສຳນັກຂ່າວຂອງຈີນລາຍງານ ໃນຕອນຄ່ຳຂອງວັນທີ 18 ສິງຫາ 2014 ວ່າ ເມື່ອວັນພະຫັດທີ 14 ສິງຫາ 2014 ຜ່ານ
ມານີ້ ຕຳຫຼວດຂອງນະຄອນຫຼວງປັກກິ່ງຂອງຈີນ ໄດ້ເຂົ້າກວດຄົ້ນສະຖານທີ່ພັກແຫ່ງໜຶ່ງ ໃນເຂດຕົງເສິງຂອງ
ປັກກິ່ງ ໂດຍສາມາດຄວບຄຸມຕົວຜູ້ຕ້ອງຫາໄດ້ສາມຄົນ, ຄົນໜຶ່ງຄືນັກສະແດງຊາວຮົ່ງກົງ ທ້າວ ເຈຊີ ຊານ ຫຼື
ຝາງ ຈູ່ ໝິງ ອາຍຸ 32 ປີ ລູກຊາຍຫົວແກ້ວຫົວແຫວນຂອງ ແຈັກກີ້ ຊານ ຫຼື ເສິນຫຼົງ ດາລານັກສະແດງຊື່ດັງລະດັບ
ໂລກ, ສ່ວນອີກຄົນໜຶ່ງຄື ທ້າວ ເຄີ ເຈິ້ນຕົງ ຫຼື ໄຄ ໂຄ ອາຍຸ 23 ປີ ດາລານັກສະແດງໜຸ່ມໄຟແຮງທີ່ໂດ່ງດັງເທິງ
ເກາະໄຕ້ຫວັນ ແລະ ອີກຄົນໜຶ່ງນັ້ນ ແມ່ນເປັນຜູ້ຊ່ວຍສ່ວນຕົວທີ່ເປັນຊາວປັກກິ່ງ ສະກຸນຊຸນ ອາຍຸ 36 ປີ.
ຕຳຫຼວດປັກກິ່ງເປີດເຜີຍວ່າ ຈາກການທົດສອບພົບວ່າ ທັງຄູ່ເສບກັນຊາ ໂດຍພວກກ່ຽວເອງກໍຍອມຮັບວ່າເສບ
ແທ້ຈິງ ເຊິ່ງຕໍ່ມາຕຳຫຼວດໄດ້ກວດຄົ້ນພົບກັນຊາອີກປະມານ 100 ກຣາມ ແລະ ໄດ້ເກັບໄວ້ເປັນຫຼັກຖານ, ໃນຂະນະ
ທີ່ໃນມື້ຖັດມາ ຕຳຫຼວດກໍໄດ້ຈັບກຸມຊາຍວ່າງງານຄົນໜຶ່ງ ອາຍຸ 33 ເຊິ່ງເປັນຊາວປັກກິ່ງ ດ້ວຍຂໍ້ຫາທີ່ຖືກສົງໄສວ່າ
ເປັນຜູ້ຂາຍກັນຊາໃຫ້ແກ່ພວກກ່ຽວ.
ດ້ານສື່ອອນລາຍຂອງຮົງກົງລາຍໜຶ່ງ ໄດ້ເປີດເຜີຍວ່າ ເຈົ້າໜ້າທີ່ໄດ້ຕັ້ງຂໍ້ກ່າວຫາກັບ ເຈຊີ ຊານ ໃນກໍລະນີໃຫ້ບ່ອນ
ລີ້ຊ່ອນແກ່ຜູ້ເສບຢາອີກດ້ວຍ ໂດຍບົດລົງໂທດສູງສຸດໃນຂໍ້ຫານີ້ ຄືການຈຳຄຸກເຖິງ 3 ປີ.
