ເປັນທີ່ຊັດເຈນແລ້ວວ່າ ທ່ານ ມຸນ ແຈ ອິນ ຈາກພັກປະຊາທິປະໄຕເກົາຫຼີ ອະດີດທະນາຍຄວາມດ້ານສິດທິມະນຸດ ແລະອະດີດຄູ່ແຂ່ງຊິງຕຳແໜ່ງປະທານາທິບໍດີເກົາຫຼີໃຕ້ ທ່ານນາງ ປາກ ກຶນ ເຮ ເມື່ອປີ 2012 ທີ່ຄວ້າໄຊຊະນະຢ່າງລົ້ນພົ້ນໃນການເລືອກຕັ້ງຄັ້ງນີ້ດ້ວຍຄະແນນສຽງເຖິງ 41.4% ຕາມມາດ້ວຍ ທ່ານ ຮົງ ຈຸນ ພະໂຢ ຜູ້ສະໝັກຈາກພັກເສລີພາບເກົາຫຼີ ທີ່ໄດ້ໄປ 23.3% ຂະນະທີ່ທ່ານ ອັນ ຊອນ ຊູ ອະດີດເຈົ້າພໍ່ວົງການເທັກໂນໂລຢີ ຢູ່ໃນລຳດັບສາມທີ່ 21.8%.
ທ່ານ ມຸນ ແຈ ອິນ ເປັນຜູ້ມີແນວຄິດສາຍກາງ ປະກາດປ່ຽນແປງນະໂຍບາຍຕໍ່ເກົາຫຼີເໜືອ ໂດຍເນັ້ນການເຈລະຈາຄວບຄູ່ກັບການດຳເນີນມາຕະການອື່ນ ການກ້າວຂຶ້ນມາດຳລົງຕຳແໜ່ງປະທານາທິບໍດີຂອງທ່ານ ມຸນ ຖືກເບິ່ງວ່າຈະສົ່ງຜົນກະທົບຕໍ່ທ່າທີແລະຄວາມສຳພັນຂອງເກົາຫຼີເໜືອຕໍ່ສະຫະລັດ.
ທ່ານ ມຸນ ລະບຸວ່າ ເຂົາຈະເປັນຜູ້ຂັບເຄື່ອນປະເທດອອກຈາກຍຸກສະໄໝຂອງຂ່າວລົບ ຂອງ ທ່ານນາງ ປາກ ໂດຍກ່າວໃນລະຫວ່າງໄປລົງຄະແນນສຽງວ່າ ບໍ່ໄດ້ມີພຽງໂຕເຂົາແລະພັກຂອງເຂົາ ແຕ່ເຊື່ອວ່າປະຊາຊົນເກົາຫຼີໃຕ້ກໍຕ້ອງການໃຫ້ເກີດການປ່ຽນແປງໃນລັດຖະບານຢ່າງແຮງເຊັ່ນກັນ.
ທ່ານ ມຸນ ແຈ ອິນ ກ່າວຕໍ່ມວນຊົນໃນເວລາປະກາດໄຊຊະນະວ່າ ”ມື້ອື່ນຂ້າພະເຈົ້າຈະເປັນປະທານາທິບໍດີ ຂ້າພະເຈົ້າຈະເປັນປະທານາທິບໍດີທີ່ເຮັດວຽກເພື່ອປະຊາຊົນ ທັງຜູ້ທີ່ໃຫ້ການສະໜັບສະໜຸນແລະຜູ້ທີ່ບໍ່ໄດ້ໃຫ້ການສະໜັບສະໜຸນ“.
ແຫຼ່ງຂ່າວ: ມະຕິຊົນ