ສຳນັກຂ່າວສານປະເທດລາວ ລາຍງານ ໃນວັນທີ 7 ພຶດສາພາ 2017 ວ່າ ກອງບັນຊາການທະຫານ ແຂວງສາລະວັນ ໄດ້ມີພິທີຈັດສົ່ງອັດຖິທະຫານ ອາສາສະໝັກ-ຊ່ຽວຊານຫວຽດນາມ ຈໍານວນ 16 ອັດຖິ ທີ່ເສຍສະຫລະຊີວິດໃນ ປາງສົງຄາມ ຢູ່ແຂວງສາວັນ ກັບຄືນຖິ່ນຖານພູມລໍາເນົາ ປະເທດຫວຽດນາມຢ່າງສົມກຽດ ໂດຍມີ ທ່ານ ສີສຸວັນ ວົງຈອມສີ ເຈົ້າແຂວງສາລະວັນ ພ້ອມດ້ວຍຄະນະພັກ, ອຳນາດການປົກຄອງແຂວງ, ພະນັກງານ–ລັດທະກອນ, ທະຫານ-ຕຳຫລວດ, ນັກຮຽນ, ນັກສຶກສາ ແລະ ປະຊາຊົນບັນດາເຜົ່າພາຍໃນ ແຂວງສາລະວັນເຂົ້າຮ່ວມ. ອັດທິດັ່ງກ່າວ ແມ່ນໄດ້ມາຈາກການຂຸດຄົ້ນ ຂອງໜ່ວຍປະຕິບັດ ງານພິເສດ ຂອງກອງບັນຊາການທະຫານ ແຂວງສາລະວັນ ຮ່ວມກັບໜ່ວຍປະຕິບັດງານພິເສດ ຂອງທະຫານຫວຽດນາມ ປະຈຳສົກປີ 2016- 2017.
ທ່ານ ພັນເອກ ພູວຽງ ຫລຽມມະວົງສາ ປະທານທານປະຕິບັດງານພິເສດຂັ້ນແຂວງ-ທັງເປັນຫົວໜ້າກອງບັນຊາການທະຫານແຂວງ ສາລະວັນ ໄດ້ກ່າວວ່າ: 2 ປະເທດ ລາວ-ຫວຽດນາມ ແມ່ນເພື່ອນມິດສະໜິດແໜ້ນ, ຮ່ວມເປັນ, ຮ່ວມຕາຍ, ຮ່ວມສູ້ຮົບໃນຂຸມຄອງດຽວກັນ ແລະ ຮ່ວມຕີສັດຕູໂຕດຽວກັນ ບົນພື້ນຖານຄວາມສາມະຄີແບບພິເສດ. ໃນຂະບວນການຕໍ່ສູ້ ໄດ້ມີຊາວໜຸ່ມຕະລຸມບອນ ໂຮຈິມິນ ຫລາຍແສນຄົນສະໝັກໃຈ ອອກສູ່ແນວ ໜ້າຂ້າມສາຍພູຫລວງ ເຂົ້າສູ່ແນວຮົບພາກຕາວັນຕົກ ຮ່ວມກັບກອງທັບປະຊາຊົນລາວ ຄຽງບ່າຄຽງໄຫລ ລຸກຂຶ້ນຕໍ່ສູ້ຢ່າງພິລະ ອາດຫານຢູ່ສະໜາມຮົບອັນ ດຸເດືອດຂຽ້ວຂາດນັ້ນ ມີຫລາຍສະຫາຍທີ່ໄດ້ເສຍຊີວິດ ໃນໄວໜຸ່ມແໜ້ນ ຍອມເສຍເລືອດເນື້ອ ເພື່ອແລກມາກັບຄວາມເປັນ ເອກກະລາດແຫ່ງຊາດ ຄວາມສະຫງົບ ແລະ ຄວາມສົມບູນພູນສຸກ ຂອງປະຊາຊົນລາວບັນດາເຜົ່າ ກໍຄື ປະຊາຊົນແຂວງ ສາລະວັນ ຈົນຮອດທຸກວັນນີ້.