ເວັບໄຊຂ່າວ ມະຕິຊົນ ອອກໄລນ ລົງຂ່າວເມື່ອວັນທີ 24 ເມສາ 2017 ນີ້ວ່າ ສຳນັກຂ່າວເອຟພີ ແລະ ຣອຍເຕີລາຍງານວ່າ ກອງກຳລັງປ້ອງກັນຕົນເອງທາງທະເລ (ເອັມເອສດີເອຟ) ຂອງຍີ່ປຸ່ນຖະແຫລງການເມື່ອວັນທີ 23 ເມສາ 2017 ລະບຸວ່າ ເຮືອພິຄາດ 2 ລຳ ຂອງເອັມເອສດີເອຟ ໄດ້ເຂົ້າສົມທົບກັບກອງເຮືອໂຈມຕີຄາຣ ວິນສັນ ຂອງສະຫະລັດອາເມລິກາບໍລິວນໜ້ານ້ຳແປຊີຟິກຕະເວັນຕົກຂອງປະເທດໃນວັນດຽວກັນນີ້ເພື່ອຮ່ວມຝຶກຊ້ອມຍຸດທະວິທີທາງທະເລຮ່ວມກັນ ກອງເຮືອໂຈມຕີທີ່ນຳຂະບວນໂດຍ ເຮືອບັນທຸກເຮືອບິນລະດັບຊຸບເປີແຄຣິເອີຣ ຄາຣ ວິນສັນ ເຊິ່ງໄດ້ຮັບຄຳສັ່ງຈາກປະທານາທິບໍດີ ໂດນັລ ທຣັມ ແຫ່ງສະຫະລັດອາເມລິກາໃຫ້ເດີນທາງເຂົ້າມາພື້ນທີ່ໃກ້ກັບຝັ່ງມະຫາສະໝຸດເກົາຫຼື ເພື່ອອວດແສນຍານຸພາບຂອງຕົນກ່ອນໜ້ານີ້.

ເຮືອພິຂາດ 2 ລຳດັ່ງກ່າວຄື ເຮືອຮົບຊາມິດາເຣະ ແລະ ເຮືອຮົບ ອາຊິກາຣະ ອອກເດີນທາງຈາກທາງຕະເວັນຕົກຂອງປະເທດເມື່ອວັນທີ 21 ເມສາ ແລະ ຈະເດີນທາງໄປຮ່ວມກັບກອງເຮືອໂຈມຕີຂອງສະຫະລັດອາເມລິກາໄປທີ່ທະເລຈີນຕະເວັນອອກເປັນຢ່າງນ້ອຍ ໂດຍບໍ່ລະບຸວ່າຈະຮ່ວມເດີນທາງ ແລະ ຝຶກຊ້ອມທາງຍຸດທະວິທີກັບກອງເຮືອຄາຣວິນສັນຢູ່ປະມານຈັກມື້ ແຕ່ລະບຸວ່າ ການຊ້ອມຮົບເທື່ອນີ້ເປັນໄປເພື່ອສະແດງຄວາມເປັນໜຶ່ງດຽວກັບສະຫະ ລັດໃນການປະເຊີນໜ້າກັບໄພຄຸກຄາມຈາກໂຄງການນິວເຄຣຍຂອງເກົາຫຼີເໜືອ.